იტვირთება...
| მთავარი » სტატიები » სტატიები |
| პური ჩვენი არსობისა და არა – ფული ჩვენი არსობისა!
დღევანდელი თემა ვერცხლისმოყვარეობის ცოდვას ანუ ფულისადმი მონებას შეეხება. საეკლესიო სწავლებით, ფულის დემონი მამონაა, რომელმაც მრავალი ადამიანი მოაქცია თავის გავლენის ქვეშ. რატომ და როგორ ღუპავს ვერცხლისმოყვარეობა ადამიანის სულს, წმინდა იოანე ღვთისმეტყველის ტაძრის დეკანოზი, მამა გიორგი (სხირტლაძე) განგვიმარტავს. – მამაო, რა იგულისხმება ვერცხლისმოყვარეობაში? – ვერცხლისმოყვარეობის ცოდვაში იგულისხმება ადამიანის გამძაფრებული სწრაფვა ამქვეყნიური ქონების, ხილული, მატერიალური დოვლათის დაგროვებაში. ადამიანები, რომლებსაც განსაკუთრებული მიზიდულობა გააჩნიათ ფულის, ოქროულობის, ძვირფასი თვლების გროვებისადმი, განსაკუთრებულ ზიანს აყენებენ საკუთარ თავს და ცნობილები არიან, როგორც ენერგოვამპირები, როგორც მწოველები გარკვეული დოვლათისა და სიმდიდრისა და სხვა ადამიანების ხარჯზე საკუთარი თავის გამდიდრების მსურველები. ნორმალური ადამიანი ვერ იქნება ვერცხლისმოყვარე, მით უმეტეს, ჩვენს პირობებში, დღევანდელ რეალობაში. იშვიათად, რომ იგი უკანონო გზით არ იყოს მიღებული და გადამეტებულ ვნებას არ იყოს მიცემული. აქ იგულისხმება არა მარტო ფული, მატერიარული ვერცხლი, ძვირფასი და ნახევრადძვირფასი თვლები, არამედ თანამოზიარობა მამონას სულთან. ასეთი ადამიანები ხშირად ფსიქიკურად იცვლებიან და მათი შემდეგი თაობებიც, როგორც დაკვირვებები გვიჩვენებს, იმავე ფსიქიკურ მდგომარეობაში იმყოფებიან. ვერცხლისმოყვარე ადამიანები, პირველ რიგში, თავიანთ თავს ვნებენ, ტოვებენ ნორმალურ, ქრისტიანულ საზოგადოებას და ვამპირები ხდებიან, სასაფლაოს ქმნიან თავიანთ გარშემო. მათი ცხოვრება მესაფლავის ცხოვრებას უფრო ჰგავს, რომელიც მარხავს ამა თუ იმ ადამიანს თავის სიმდიდრეში. მათ არ სჭირდებათ ცოცხალი ადამიანები, რომლებსაც დაეხმარებიან. მათ სჭირდებათ გვამები, უსულო, მონები, რომლებსაც ზომბირებული არსებების სახით ათამაშებენ. სიკვდილის გზის ერთ–ერთი მთავარი ბილიკი ვერცხლისმოყვარეობის ბილიკია. ეს ცოდვა მართლმადიდებელ ეკლესიაში ერთ–ერთ მომაკვდინებელ ცოდვად ითვლება. მართლმადიდებელი ქრისტიანი თავს უნდა იცავდეს ზედმეტი სიმდიდრისაგან. "მამაო ჩვენო"–ში წერია: "პური ჩვენი არსობისა მომეც ჩვენ დღეს" და არა ფული ჩვენი არსობისა. კეთილგონიერი ქრისტიანი, მოაწესრიგებს რა თავის ვნებებს, კეთილად წარმართავს თავის ნებას. ზოგჯერ ადამიანს ნება ერევა ვნებაში. ჩვენი დაცემული ვნებები სხვაა და ღვთის ნება – სხვა, რომელსაც ჩვენი მართალი არჩევანი უნდა ეთანხმებოდეს. – სიძუნწე თუ არის ვერცხლისმოყვარეობა? – როგორც ელვას ახლავს ქუხილი, ისე ვერცხლისმოყვარეობას სიძუნწე ახლავს თან, ეს მისი ტყუპისცალია. სიძუნწე, პირველ რიგში, იწყება ადამიანის შინაგანი ლპობით. შემდეგ ეს გადადის ვამპირიზმში, რასაც ვერცხლისმოყვარეობის ვამპირიზმი ჰქვია. ყოველდღიურად ვაწყდებით ჩვენ ამ ცოდვას. ასეთი ვამპირიზმი ადამიანში მხეცს ქმნის და ისინი ანტიქრისტეს წინამორბედები არიან. ანტიქრისტეს წინამორბედები არიან ზუსტად ის ფსევდოოლიგარქები, ახალი მდიდრები, რომლებიც ყველაზე უფრო იკატუნებენ თავს უქონელებად. ისინი ბოლო ჟამს, ნილოს მირონმდინარის წინასწარმეტყველებით, იმდენად მოიკატუნებენ თავს უქონელებად, რომ ამით კიდევ უფრო მეტ ფულს და ოქროს მოაგროვებენ ხალხზე მოწყალების სპეკულირებით. როცა დადგება ჟამი, რომ საჭმელი პური არ იქნება, ხალხი იძულებული გახდება, მიწა მოზილოს და ის მიიღოს. ღმერთი დაუშვებს, რომ მიწა მოზილონ, შეჭამონ და გაძღნენ, თუმცა ანტიქრისტეს მსახურები თავიანთი ძალაუფლებით ავად ისარგებლებენ. ამ შავი ძალების მოქმედების რეპეტიციას ჩვენ უკვე გავდივართ. უნდა მოვემზადოთ იმისათვის, რომ მივიღოთ სულიერი მარაგი, სულიერი ცოდნა, რაც მოგვეცა ღვთის მადლით და ეკლესიის ძალით. უნდა დავუპირისპირდეთ ამ ანტიქრისტიანულ მამონას მექანიზმს, რომელიც ჩვენზე გამანადგურებლად მოქმედებს. ყველამ, ვისაც უნდა ქრისტიანობაში წინ წავიდეს, თავი უნდა დაიმდაბლოს, ღვთის მორჩილებას შეუდგეს, ნამდვილი მორიდებულობა გამოიჩინოს სხვების მიმართ, არ შეაწუხოს სხვა თავის ქონებით, თუ მას რამე გააჩნია, დაეხმაროს სხვას და შეეცადოს თავისი მოწყალების საზღვრები გააფართოვოს, კი არ შეავიწროვოს და სხვის ხარჯზე ქულები დაიწეროს, რომ კარგი გამოჩნდეს. – საქართველოში გავრცელებულია ასეთი თილისმა – ერთდოლარიანს ინახავენ იმისთვის, რომ ფული გაუმრავლდეთ. რასთან გვაქვს საქმე? – არსებობს მაგიის მრავალი სახე. ერთ–ერთი ფორმა მაგიისა არის ხმარება გარკვეული ბანკნოტების, მათზე გამოსახული მაგიური ნიშნებით, რომლებიც უხვად გვხვდება თუნდაც ერთდოლარიანზე. უხვად გვხვდება მაგიურ–მასონური სიმბოლიზმი. პირდაპირ ოკულტური სიმბოლოების ენციკლოპედიაა ერთდოლარიანი კუპიურა. ერთდოლარიანში თუ გავიხედავთ, იქ შესანიშნავად ჩანს მთელი ოკულტურ–მაგიურ–მასონური დოქტრინის ძირითადი მრწამსი. ამით ხდება ადამიანზე ენერგოვამპირული და ენერგოვიბრაციული მასაჟები, რომლებიც ამ ადამიანების აურას ამახინჯებს. ეს არის მაგიური ცდუნება, რომელიც ახალი არ არის კაცობრიობის ისტორიაში. ამაზე დახვეწილი ხერხებიც არსებობდა. ეს ოცდამეერთე საუკუნის სიახლეა, რომელიც მშვენივრად გამოიყენება შავ მაგიაში. რა თქმა უნდა, ცოდვაა, ვინც ამას ატარებს. მკრეხელობის ერთ–ერთი ფორმაა. | |
| კატეგორია: სტატიები | დაამატა: mamao (2012-02-25) | ავტორი: მამა გიორგი (სხირტლაძე) | |
| ნანახია: 1271 | |
შესვლა საიტზე