იტვირთება...
| მთავარი » სტატიები » სტატიები |
| "ანტიქრისტიანული მიმდინარეობები ერთიანი ახალი რელიგიის შექმნას ცდილობენ"
მორწმუნე ადამიანი რაც უფრო ეცნობა არასწორ სწავლებებს, მით უფრო მტკიცდება მართლმადიდებლობაში, იცის, თუ რა არის ჭეშმარიტი რწმენა. მას აქვს უზარმაზარი საუნჯე იმისათვის, რომ ნებისმიერ ცრუმოძღვრებას დაუპირისპირდეს არგუმენტაციით. ასეთი ადამიანი შეიარაღებულია ძლიერი საჭურველით როგორც გონებრივად, ასევე სულიერად. დღევანდელი თემა ეხება სექტებს და ცრუსწავლებებს, რაზეც წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება.
– მას შემდეგ, რაც საქართველო ღია გახდა დანარჩენი მსოფლიოსთვის, იმ უამრავი სექტისა და რელიგიის შესახებაც დიდი ინფორმაცია შემოვიდა ჩვენში, რაც მსოფლიოშია გავრცელებული და არამარტო ინფორმაცია, მათი წარმომადგენლებიც მრავლად გამოჩნდნენ. მამა გიორგი, ამბობენ, მეორედმოსვლის ერთ–ერთი ნიშანი სხვადასხვა სექტის მომრავლებაც არისო. ეს იგი გვაქვს შეშფოთების საფუძველი? – ჩვენ ვიმყოფებით განსაკუთრებულად მძიმე დროში, სადაც უამრავი გამრუდებული ცნობიერების ადამიანი ცხოვრობს. გვმართებს უფრო მეტი შიში ღვთისა და უფრო მეტი ლოცვა, რაც გვაძლევს გადარჩენის საშუალებას. ადამიანის მიერ წარმოთქმული ერთი ლოცვა, ეს იქნება სახლში თუ გარეთ, დიდი ძალის მატარებელია. განსაკუთრებით კი ამას იესოს ლოცვაზე ამბობენ წმინდა მამები. სექტანტებთან, ერესებთან დასაპირისპირებლად ყველაზე დიდი ძალაა მართლმადიდებლური სარწმუნოება და მართლმადიდებლური ჯვარი. წმინდა მამები ამბობენ, ნიშანი ანტიქრისტეს მოსვლისა ძალიან ბევრია, თუმცა დრო და ჟამი არავინ იცის. თუ დავაკვირდებით, კაცობრიობის დრამა ძირითადად გასულია, თითქოს კაცობრიობა მეორედმოსვლის მოლოდინშია. ამას მიანიშნებს ყველა სულიერ–მორალური ნიშანი, ეზოთერული სწავლებების სიმრავლე და პოპულარობა, მათი პროპაგანდის გაზრდა, რის ფონზეც სიყვარულმა ძალიან მოიკლო ადამიანებში. ფსევდოდემოკრატიული სისტემები, მსოფლიო ანტიქრისტიანული პროცესები, რომლებიც ცდილობენ მოამზადონ ცრუმესიის მოსვლა, გვაძლევს საფუძველს იმისას, რომ უფრო მეტად ჩავუღრმავდეთ და შევისწავლოთ, არა მარტო ჩვენი სარწმუნოება, არამედ სექტოლოგიაც. ოკულტური, ეზოთერული სწავლებები შემოსულია დიდი ინტენსივობით და ძალიან პოპულარულიც გახდა. ჩვენი სარწმუნოება განიცდის ანტიქრისტიანული მიმდინარეობების შემოტევას. ამით ახალ რელიგიას ამზადებენ. – რა საშუალებებს იყენებენ სექტები ადამიანების გადასაბირებლად? – სექტანტები აგრესიულად ცდილობენ, რომ ადამიანის გონებაში მცდარი, დემონური პრინციპები ჩადონ, რომ ყველა რელიგია არის ერთი და იგივე, ანუ ეს არის სხვადასხვა გზა მიმავალი ერთი ღმერთისკენ. ფართო გავრცელება ჰპოვა აღმოსავლურმა რელიგიებმა და ორთაბრძოლებმა. დღეს მსოფლიოში ხდება გარკვეული ცენტრების მიერ ინფორმაციების მართვა, დემონიზაციური მასობრივი კომუნიკაციებით კონტროლი ადამიანის ცნობიერებისა, ტელეფონებით, კომპიუტერებით და ა.შ. მიმდინარეობს სატანიზმის, ძალადობის აშკარა და ღია რეკლამა, მასობრივი საინფორმაციო საშუალებების კონტროლი. ტოტალური შეტევა მიდის ახალგაზრდობაზე სატანური ჯაზ–როკ–დისკო–რეპ და ვიდეო, ცრუკულტურის საშუალებით, დამხმარე საშუალებებით, ესაა ნარკოტიკები, აბები და სხვა. საოცარი შეტევაა ეროტიკული მაგიისა და ყოველგვარი ოკულტური ცრუსწავლებისა. ამავდროულად ხდება მაგიური სექტანტიზმის ქადაგება. გამოიცემა ამ თემაზე უამრავი წიგნი, არსებობს ნახატები და პორნოგრაფიული საიტები ინტერნეტში. ტელევიზიის საშუალებით ხდება, ულტრათანამედროვე მაგებისა და ექსტრასენსების ცრუსწავლებების დემონსტრირება. ამ ყველაფრის მიზანი არის ის, რომ ადამიანის სული დაცემულ სულებთან კონტაქტში შეიყვანონ და წარწყმიდონ. მასობრივი შეტევაა დემონებისა და პოლტერგეისტების სახით. ტელევიზიით უამრავი გადაცემა გადმოიცემა ამაზე, რითაც ხალხი გაოცებულია. მაგალითად, ჭიქა ფრინავს, წიგნები იხევა, კაკუნი ისმის და ა.შ. ინფორომაციის გავრცელება ხდება უცხოპლანეტელებზე და სხვა არამიწიერ არსებებზე. ეს ყველაფერი ისევ და ისევ ცრუ მიზნებს ემსახურება. მასობრივ საინფორმაციო საშუალებებში კულტია შექმნილი სადიზმის, მაზოხიზმისა და ძალადობისა, რამაც მოიტანა კოლოსალური ზრდა დამნაშავეობისა ბავშვებში. არის თვითმკვლელობების ეპიდემია. დღეს უპრეცედენტო რეკლამაა დასავლური ცხოვრების წესისა. გაძლიერებულია აგრესია. მშვიდობის დროს ხდება ომის ქადაგება, რაშიც დიდი თანხები იხარჯება, რათა მოხდეს ერთმანეთის განადგურება. გააქტიურდა საერთაშორისო ფონდები, რომელთა უკან დგანან შავი ლიდერები. არის სპეციალური პროგრამები მსოფლიო მმართველობის შექმნისა. მიდის ექსპერიმენტები, რათა მხეცის ბეჭედი იქნეს აღბეჭდილი ხელზე. ეს იქნება უხილავი, ამოუშლელი ლაქა, რომელიც კეთდება სხივებით და მისი საშუალებით შეიძლება ბანკის კრედიტის აღება, შეასრულებს პასპორტის მოვალეობასაც. იოანე ღვთისმეტყველი ამბობს, ანტიქრისტეს მოსვლის შესახებ. პავლე მოციქული ტიმოთელთა ეპისტოლეში ამბობს, რომ მოვა დრო, როდესაც ჯანმრთელ სწავლებას არ მიიღებენ, არამედ თავიანთი ვნებებით აირჩევენ მწვალებლებსო. ასევე ამბობს, ისეთი დრო მოვა, რომ ზოგიერთები სარწმუნოებას განეშორებიან და მაცდურ სულებს დაუგდებენ ყურს, ანუ ეშმაკურ სწავლებებსო. იოანეს მეოთხე თავში წერია: "საყვარელნო, ყველა სულს არ დაუჯეროთ, ანუ გამოსცადეთ, ღმერთისაგან არის თუ არა ის, რადგან მრავალი ცრუწინასწარმეტყველი გაჩნდება ქვეყანაზე". – როგორია სექტანტების მიდგომა ადამიანებისადმი, როგორ ზემოქმედებენ მათზე? – ყველა სექტა მართლმადიდებელი ეკლესიის გარეთ დგას და ყველა ერთსა და იმავე ცდუნებაში აგდებს ხალხს, ანუ თვითონაც იღუპებიან და სხვასაც ღუპავენ. სექტანტებისთვის არ არსებობს დედა, მამა, და–ძმა და ა.შ. სიყვარული და ჰუმანიზმი მათ არ გააჩნიათ. ისინი კონტროლირებას უწევენ ადამიანის ცნობიერებას, ლაპარაკობენ ისეთ მარტივ ენაზე, რომელიც ყველასთვის გასაგებია. მათი ფერადი, მარტივი ენით დაწერილი ჟურნალების შინაარსი უბრალო ხალხისთვისაც გასაგებია, ანუ პრიმიტიულია. ამით კი ხალხს ითრევენ სექტაში. ისინი დიდად არ ხმარობენ ისეთ სიტყვებს, როგორიცაა "მონანიება", "მარხვა", "ლოცვა", "ცოდვა", "ერესი", "პასუხისმგებლობა", "დოგმატი" და ა.შ. თუ ხმარობენ, სულ სხვა მნიშვნელობას დებენ შიგ. განსაკუთრებით ეს ეხება ისეთ სექტებს, რომლებმაც დიდხანს გაძლეს, როგორიცაა იეღოველები, მორმონები, საინტოლოგია, ჰაბბარდისტები. არსებობენ ისეთი სექტები, რომლებიც უცებ იბადებიან და უცებვე კვდებიან. სექტების სწავლების პირველი ნიშანია ეკლექტიზმი. მიდის მუშაობა იმაზე, რომ შეიმუშაონ ეგრეთ წოდებული ერთიანი დოქტრინა. ცდილობენ, ერთიანი "პირველყოფილი" რელიგიის შექმნას. მათი აზრით, ეს რელიგია არც ქრისტიანობაა, არც მუსლიმანობა, არც კონფუციანელობა და ზოროასტრიზმი, არც იუდაიზმი და ინდუიზმი, არამედ სხვა რაღაც, რომელიც ყველაზე მაღლაა. სექტანტები, პირველ რიგში, ითხოვენ ძველი ცოდნის დავიწყებას, უარყოფას, ანუ რაც წარსულში იყო, ყველაფერი მიჩნეულია ცოდვად. – როგორია ზოგადად სექტანტების ცხოვრების წესი? – სექტაში დამყარებულია ძალიან მკაცრი ცხოვრების რეჟიმი. დღეში ძალიან ცოტა სძინავთ, რადგან ცოტა ძილი გონებას ხდის მგრძნობიარეს და ადვილად კონტროლირებადს. გარკვეულ დროს იღვიძებენ, რათა რაღაც დავალებები მიიღონ. მუდმივად იმყოფებიან გარკვეულ კვებით რეჟიმში – უჭმელობის განცდა უნდა ჰქონდეთ. ამიტომაც მათგან ყოველთვის აგრესია მოდის. ყველა სექტა ერთიანდება იმაში, რომ ცდილობს ადამიანის ცნობიერების კონტროლირებას. მრავალფეროვანი მიმდინარეობები მოუმზადებელ ადამიანს თავბრუს ახვევენ. ამიტომ განსაკუთრებით მნიშვნელობას იძენს დღეს საღვთო სჯულისა და მართლმადიდებლური სარწმუნოების ზედმიწევნით შესწავლა, რაც ადამიანს უსათუოდ ჭეშმარიტ ორიენტირს მიანიჭებს ცხოვრების გზაზე. ანა ნოდია | |
| კატეგორია: სტატიები | დაამატა: mamao (2012-02-15) | |
| ნანახია: 1587 | |
შესვლა საიტზე