იტვირთება...
| მთავარი » სტატიები » სტატიები |
| "უფალი მხოლოდ საქმეებს კი არ განსჯის, არამედ ნათქვამ სიტყვებსაც
და გულში გაფიქრებულსაც" სახარებასა და წმინდა მამათა ცხოვრებაში არაერთგან ვკითხულობთ ქრისტეს სამსჯავროსა და განკითხვის დღის შესახებ. ამის შესახებ ყველა მორწმუნისათვის ცნობილია, რომ ადამიანი სიკვდილის შემდეგ მარადიულ სიცოცხლეს იძენს სამოთხეში ან ჯოჯოხეთში. მანამდე კი დგება საშინელი სამსჯავრო, როცა უკლებლივ ყველა ადამიანი განიკითხება და კაცობრიობის ცოდვები გამხელილი იქნება. ამავე დროს ერთ–ერთი დიდი წმინდა მამა ბრძანებს, რომ არც ერთ მოკვდავს ძალუძს იცოდეს, რა არის სინამდვილეში ღვთის სამსჯავრო, რას ნიშნავს ღვთის სასჯელი, ვის ეკისრება იგი და ვის – არა, ამაზე ადამიანებს არ ძალუძთ ჭეშმარიტად ილაპარაკონ. ამ თემაზე განმარტებებს წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვაძლევს. – მამა გიორგი, ჩვენ წაკითხული და გაგონილი გვაქვს მეორედ მოსვლისა და განკითხვის ჟამის შესახებ. რაიმე თუ არის ცნობილი იმის შესახებ, რა არის საშინელი სამსჯავრო? – ახალი აღთქმის წიგნიდან ვიცით, რომ უფალი იესო ქრისტე "კვალად მომავალ არს, განსჯად ცხოველთა და მკვდართა", რაც მრწამსშიც არის ნახსენები. ჩვენ ყველანი უნდა გამოვცხადდეთ ქრისტეს სამსჯავროს წინაშე, რათა თითოეულმა მიიღოს იმის მიხედვით, რასაც სხეულის სიცოცხლის დროს აკეთებდა, "კეთილს თუ ბოროტს" – ამბობს პავლე მოციქული. თვით უფალი ბრძანებს, რომ, როცა ძე კაცისა მოვა, "დაჯდება თავისი დიდების ტახტზე, შეიყრება მის წინაშე ყოველი ერი, რათა თითოეული განკითხულ იქნეს თავისი საქმეებისთვის". იმაზე, რომ სწორედ კაცის ძე იქნება სამყაროს მსაჯული, მან თვითონ თქვა გარკვევით: "რადგან მამა არავის არ სჯის, არამედ მთელი სამყარო ძეს გადასცა, რათა ყველამ სცეს პატივი ძეს, როგორც მამას სცემენ. ვინც ძეს არ სცემს პატივს, ის არც მამას სცემს პატივს, რომელმაც იგი მოავლინა". ვისაც ქრისტე სწამს, როგორც ჭეშმარიტი ღვთის ძე და აღასრულებს მის მცნებებს, საშინელ სამსჯავროზე გამართლდება. საშინელი სამსჯავროს შესახებ მითითებულია, რომ მართალნი იქ გამოირჩევიან ცოდვილთაგან, მსგავსად "მწყემსის მიერ ცხვართა და თხათა ერთმანეთისაგან განცალკევებისა". წმინდა წერილი ამბობს, არაფერია დაფარული, რომ არ გაცხადდეს წმინდა მსაჯულის წინაშე. ამასთან უფალი მხოლოდ საქმეებს კი არ განსჯის, არამედ ნათქვამ სიტყვებსაც და გულში გაფიქრებულსაც. საშინელ სამსჯავროზე იქნება გამოვლენილი კაცობრიობის ყველა ცოდვა და მაშინ განირჩევიან ერთმანეთისაგან მართლები და ცოდვილნი. – ამქვეყნად უცოდველი არავინაა, რა უნდა გავაკეთოთ, რათა გავმართლდეთ საშინელ სამსჯავროზე? – მორწმუნეებს არამარტო ერთმანეთი უნდა უყვარდეთ, არამედ ყველა, ვინც უფლის ხატებას ატარებს, მტრებიც კი. ამიტომ ამბობს უფალი: "ვინც ამბობს, რომ ღმერთი მიყვარსო, თავისი ძმა კი ეჯავრება, იგი ცრუა, ვინაიდან ვისაც არ უყვარს თავისი ძმა, რომელსაც ხედავს, როგორღა ეყვარება ღმერთი, რომელსაც ვერ ხედავს". რა არის საჭირო? მართლებს იესო ქრისტე სამსჯავროზე ეტყვის: "მოდით, მამაჩემის კურთხეულნო, დაიმკვიდრეთ წუთისოფლის დასაბამიდან თქვენთვის გამზადებული სასუფეველი, ვინაიდან მშიოდა და საჭმელი მომეცით, მწყუროდა და მასვით, უცხო ვიყავ და მიმიღეთ, შიშველი ვიყავ და შემმოსეთ, სნეული ვიყავ და მომიკითხეთ, საპყრობილეში ვიყავ და მომაკითხეთ". მაშინ მართლები ეტყვიან მას პასუხად: "უფალო, როდის გიხილეთ შენ მშიერი და დაგაპურეთ? ან მწყურვალი და გასვით? როდის გიხილეთ უცხო და მიგიღეთ? ან შიშველი და შეგმოსეთ?". მეუფე მიუგებს მათ პასუხად: "ჭეშმარიტად გეუბნებით თქვენ, რაც კი გაუკეთეთ ერთს ან მცირე ძმათაგანს, მე გამიკეთეთ". ხოლო მათ ვინც სიყვარულის მცნებებს არ აღასრულებდა, ეტყვის მსაჯული: "წადით ჩემგან, წყეულნო საუკუნო ცეცხლში, რომელიც გამზადებულია ეშმაკისათვის" და წავლენ ისინიც საუკუნო სატანჯველში. მართლები კი მარადიულ სასუფეველს დაიმკვიდრებენ. – კი მაგრამ, როგორ ეთავსება ერთმანეთს ღვთის მართლმსაჯულება და მისი უსაზღვრო გულმოწყალება? – სინამდვილეში სწორედ ამაშია უფლის მადლის ორი მხარე, რადგან ცოდვილის მიმართ მისი მოუნანიებელი, ამქვეყნიური ცოდვების გამო მიღებული სასჯელი სინამდვილეში უფლის წყალობაა. წარმოიდგინეთ იმ ადამიანების მდგომარეობა მართალთა სამეფოში, ვისაც უფლის სიყვარული არ ჰქონდა და მხოლოდ საკუთარი სურვილების შესრულებას ემსახურებოდა, როგორი ურთიერთობა შეიძლება ჰქონდეთ იმათ მართლებთან, ვისაც მხოლოდ საკუთარი თავის სიყვარული არ ამოძრავებდა. "უმჯობესია მეხი დაგეცეს უამრავჯერ, ვიდრე უფლის სათნო სახე და მისი ნათელი თვალები შენგან პირშექცეული იხილო, რომელსაც ჩვენი დანახვა არ ძალუძს!". – წმინდა წინასწარმეტყველებით და მრწამსშიც ასე ნათქვამი, ყველა გარდაცვლილი სული მკვდრეთით აღდგება განკითხვის ჟამს. ამაში რა იგულისხმება? – "მოველი აღდგომასა მკვდრეთით", – მოწმობს მრწამსი ეკლესიის რწმენის შესახებ მიცვალებულთა აღდგომაზე. ახალ აღთქმაში მკვდრების აღდგომა უფალ იესო ქრისტეს უკავშირდება. აღდგომა საყოველთაო იქნება, რათა ყველა ცოცხალი და მკვდარი წარდგეს ღვთის უკანასკნელი სამსჯავროს წინაშე. უფალი იესო ქრისტე ამბობს, რომ მეორედ მოსვლისას "ყველანი, ვინც სამარხებში არიან, მის ხმას მოისმენენ, კეთილის მოქმედნი სიცოცხლის აღდგომისათვის გამოვლენ, სიავის მქმნელნი კი სამსჯავროს აღდგომისათვის". უფალი იესო ქრისტეს მეორედ მოსვლის მოწმე იქნება ასევე ყველა ის ადამიანი, ვინც იმ დროისათვის იცხოვრებს დედამიწაზე. – ალბათ ყველა მორწმუნე ადამიანი ერთხელ მაინც დაფიქრებულა, თუ რა ხდება ცათა სასუფეველში. – მრწამსში ჩვენ ვკითხულობთ, რომ ქრისტეს სასუფეველს დასასრული არ ექნება. ამიტომ ქრისტიანები მოელიან "ცხოვრებასა მერმისსა მის საუკუნნოსსა". უფლის სასუფეველში მარადიული ნეტარებაა. ნეტარება კი სამუდამო ცხოვრებისა არის უფლის ჭვრეტა, ღვთის შემეცნების სისავსე, მასთან უახლოესი ურთიერთობა. სრულყოფილი უფლის შემეცნება კი, თავის მხრივ, ადამიანის სრულყოფილ განღმრთობას გამოიწვევს. წმინდა იოანე ღვთისმეტყველი სწერს ამის შესხებ ქრიასტიანებს: "საყვარელნო! ამიერიდან ღვთის შვილნი ვართ, მაგრამ ჯერ არ გამომჟღავნებულა, რანი ვიქნებით. ვიცით, რომ როცა გამომჟღავნდება, მისი მსგავსნი ვიქნებით, რადგან ვიხილავთ მას როგორიც არის". ქრისტეს სასუფეველში აღარ იქნება სიკვდილი, გლოვა–გოდება და ტკივილიც. ამგვარად ის დროებითი სატანჯველი, რაც ადამიანს გარდახდება თავს ამ ცხოვრებაში, მით უმეტეს, ქრისტეს მოწმობის გულისათვის, განუზომლად უფასდება ქრისტეს სასუფეველში საუკუნო ნეტარებით. როგორც ესაია წინასწარმეტყველი იტყოდა: "თვალს არ უხილავს, ყურს არ სმენია და ადამიანს გულშიც კი არ გაუვლია ის, რაც ღმერთმა მის მოყვარულთ განუმზადა". "ცათა სასუფეველი არის მჭვრეტელობა, – მიუთითებს წმინდა ბასილი დიდი, – ახლა ნივთების ლანდს ვხედავთ სარკეში, ხოლო მომავალში, განვთავისუფლდებით რა მიწიერი სხეულისაგან და შევიმოსებით უხრწნელი და უკვდავი სხეულით, ვიხილავთ მათ პირველსახეს. ეს კი მაშინ მოხდება, თუ ჩვენს ცხოვრებას სწორი გზით წარვმართავთ და ვიზრუნებთ ჭეშმარიტ სარწმუნოებაზე, რომლის გარეშეც ვერავინ ნახავს უფალს". ანა ნოდია | |
| კატეგორია: სტატიები | დაამატა: mamao (2012-02-06) | ავტორი: მამა გიორგი სხირტლაძე | |
| ნანახია: 1463 | |
შესვლა საიტზე