იტვირთება...
| მთავარი » სტატიები » სტატიები |
"ჯოკერი ეშმაკის პრიმიტიული ვარიანტია"
ცნობილია, რომ აზარტული თამაშები ეკლესიის მიერ არ არის დაშვებული. დღევანდელი ჩვენი თემა კი კონკრეტულად სამაგიდო თამაშებს ეხება. ყველა დროში ადამიანები თავს იქცევდნენ ნარდით, დომინოთი, ბანქოთი... ყველაზე გავრცელებული და პოპულარული თამაში ჯოკერია. წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) განგვიმარტავს, ვის მიერ არის იგი შექმნილი და რა სიმბოლიკის მატარებელია. – მამაო, რა დატვირთვა აქვს ბანქოს, იგივე კარტის თამაშს, რა საფრთხის შემცველია იგი მორწმუნე ადამიანისთვის? – კარტი – ეს არის ეგვიპტურ–ინდური ტრადიციიდან მომდინარე იეროგლიფური სიმბოლიზმი. საერთოდ, არის 78 კარტი, მინორული და მაჟორული არკანები. ასე ითვლება. ეს არის ოკულტური სიმბოლოები, რომლებიც ფართოდ გამოიყენება სამკითხაო ტექნიკაში, სპირიტიზმში, მაგიაში, ეზოთერიზმში, კაბალაში, დასავლურ და აღმოსავლურ ოკულტიზმსა და გნოსტიციზმში. კარტის ეგვიპტური წარმომავლობა ძალიან შორეულ დროს ეკუთვნის, იეროგლიფებისა და ჰერმესის მისტერიების დროს. მაგრამ შემდეგ გამარტივდა თანამედროვე ოკულტისტების ძალისხმევით და 78 კარტისგან დარჩა რაღაც ნაწილი, საიდანაც ძირითადად სათამაშოდ გამოიყენებენ 36 არკანს. ამათ აქვთ სამკითხაო მნიშვნელობაც. საჭიროა ოკულტურ–ეზოთერული ცოდნა, რომ ეს ოკულტური სიმბოლიკა "წარმატებით" იქნეს გაშიფრული. ამას სჭირდება სპეციალური სახელმძღვანელოები, სპეციალისტები და, რა თქმა უნდა, საიდუმლო გასაღები, რომელიც ყველამ არ იცის. ამიტომ სხვადასხვა ჯურის მკითხავები თავს და ბოლოს ვერ იგებენ, ბოლოს სხვასაც აბრკოლებენ და თავსაც იბრკოლებენ. ამის გამოყენება სათამაშოდ, აზარტული კუთხით უარყოფითი შედეგების მიზეზი შეიძლება გახდეს, მით უმეტეს, მართლმორწმუნე ქრისტიანისთვის. წმინდა მამათა დარიგება არის ასეთი – კარტს არ შეეხოთო. აზარტულ თამაშზე კი საერთოდ არ არის ლაპარაკი. სიტყვა "ჯოკერი" ხუმარას, თავისი არსით ერთ–ერთი მაჟორული არკანის, მთავარი ფიგურის, ეშმაკის გავულგარიზებული, გაფამილარულებული ვარიანტია, გაპრიმიტივებულ–გაუბრალოებული იეროგლიფია. ყველა სიმბოლო, რაც არის კარტში, დაკავშირებულია ოკულტურ, კაბალისტურ ტრადიციასთან, რომელიც ახლოსაა იმ იეროგლიფებთან, რომლებიც გამოიყენებოდა ოკულტურ სამკითხაო პრაქტიკებში. ამ ყველაფერში გამარტივებულია რთული სიმბოლოები, ეს იქნება ჯვარი, აგური, ყვავი თუ სხვა. თანაგანცდა ამ ოკულტური და ეზოთერული საიდუმლოებებისა ადამიანს ჩაახედებს ისეთ ლაბირინთში, სადაც, არ არის სასურველი, რომ ჩაიხედოს. ზოგჯერ შეიძლება საპასუხოდ ისეთი მზერა დაიჭიროს იქიდან, რაც მას ამოუშლელ სულიერ ტრავმას მიაყენებს. – არის კარტით უწყინარი და გასართობი მკითხაობები, რომლებიც ძირითადად ახალგაზრდებშია გავრცელებული. – არანაირი მკითხაობა, ეს იქნება ნამდვილი თუ ხუმრობით, არ არის დაშვებული. ბავშვები შეიძლება ბევრ რამეს ეხუმრებოდნენ, მაგრამ სანამ ადამიანი დაიწვავს ხელს და მიხვდება, რომ მავნეა, მანამდე უნდა შეეშვას. სასურველია ჩვენი შემეცნება ბავშვების დონეს გასცდეს. თუ გვინდა, ჩვენს ტყავზე გამოვცადოთ ყველაფერი, კარგი და ცუდი, უნდა ვიცოდეთ, რომ ამის დრო უბრალოდ არ აქვს ქრისტიანს. უნდა დავუჯეროთ ეკლესიას და წმინდა გარდამოცემას, თუ რას გვირჩევენ ისინი. გვირჩევენ, რომ კარტის თამაში არის ცოდვა, ეს ცოდვა მოსანანიებელია. – ჭადრაკი, დომინო, ნარდიც ეკლესიის მიერ აკრძალულია? – არის თამაშები, რომლებიც ინტელექტუალური სპორტის სახეობაა. ადამიანს ბავშვობიდან თამაში ახასიათებს, გარკვეულწილად ადამიანი მოთამაშე არსებაა, მაგრამ თამაში ღვთის სადიდებლად უნდა იყოს მიმართული. როდესაც ეს თამაში, იქნება ჭადრაკი, დომინო თუ ფეხბურთი, გადადის წარმართულ კულტში, რომელიც ფაქტობრივად ადამიანს მიამსგავსებს ცხოველს და თამაშები გადადის შოუბიზნესში, დაუოკებელ ვნებათაღელვაში, რა თქმა უნდა, არ არის დაშვებული და მიზანშეწონილი. ადამიანს ისედაც ცოტა დრო აქვს, რომ თავის სულის ცხონებას მოახმაროს და ამ დროს ის თავს იქცევს რაღაც არაფრისმომცემი გასართობებით, ეწყება აზარტი. აზარტული თამაშებისთვის ერთ–ერთი დამახასიათებელი ნიშანი არის ის, რომ ადამიანმა შეიძლება დაკარგოს კონტროლი, წააგოს ყველაფერი, რაც კი გააჩნია, მათ შორის – საკუთარი თავი და სულიც კი, რაც ხდება მისი ფსიქიკის დაზიანების მიზეზი. ასეთი არაერთი შემთხვევა ყოფილა. აზარტულ თამაშებს ადამიანი ბოროტ სულებთან ურთიერთობაში შეჰყავს, რაც უცვლის სულიერ და ფიზიკურ ფასადს და ხდება მარიონეტი. არ აქვს მნიშვნელობა, ეს ჭადრაკი იქნება, დომინო თუ შაში. რა მნიშვნელობა აქვს, რა დაღუპავს მას?! ნებისმიერი სახის თამაში, რომელიც მას აბრკოლებს განღმრთობის პროცესში, დამღუპველია. მით უმეტეს, ისეთი ოკულტური საფუძვლის მქონე თამაშები, როგორიცაა კარტი. დომინო ჩინური თამაშია, რომელიც აგებულია ჩინური იძინის წიგნზე, ცვლილებათა წიგნზე, რომელსაც ტრიგრამების დოქტრინა უდევს საფუძვლად. ტრიგრამების დოქტრინა დომინოში თითქმის აღარ ჩანს, დამალულია. ასევე ნებისმიერ სხვა თამაშს რაღაც უდევს საფუძვლად. ბოშათა მომთაბარე ტომები ტაროს კარტს "წარმატებით" იყენებენ მაგიურ მკითხაობებში. ზოგადად დროის უქმად კარგვა, მკითხაობა, ამაოდ მეტყველება, უქმად თამაში, ეს ყველაფერი არის ცოდვა და დაუშვებელია. ამა თუ იმ გუნდის წარმატება სრულიად არ ნიშნავს ამა თუ იმ ერის სულიერ წარმატებას, პირიქით, შეიძლება ეს უკუმაჩვენებელიც კი იყოს. ძალიან დიდი სიფრთხილე მართებს ადამიანს გასართობი თამაშებისას. ანა ნოდია | |
| კატეგორია: სტატიები | დაამატა: mamao (2011-12-18) | ავტორი: რატომ არის საშიში აზარტული თამაშები | |
| ნანახია: 2131 | |
შესვლა საიტზე