იტვირთება...
| მთავარი » სტატიები » სტატიები |
| რატომ ითვლება სიგარეტის მოწევა ცოდვად
ყველა მორწმუნე ქრისტიანმა იცის, რომ ლოცვას უდიდესი ძალა აქვს, მაგრამ განსაკუთრებული მადლი მაშინ აქვს, როცა სხვაზე ლოცულობ. ამასთან, მართლმადიდებლებმა ისიც უნდა იცოდნენ, რომ ის ბოროტი, რომელიც ცოდვით დაცემული ადამიანის სულშია დაბუდებული, მლოცველთან იწყებს ბრძოლას, ცდილობს, დაამარცხოს, ლოცვის ძალა დააკარგვინოს, მაგრამ ამან არ უნდა შეგვაშინოს, მოყვასზე ლოცვა არ უნდა შეგვაწყვეტინოს. მოძღვრები ყველას აძლევენ კურთხევას, ძალა მოიკრიბონ და სხვებისთვისაც ისევე ილოცონ, როგორც საკუთარი თავისთვის.
ზოგი ფიქრობს, რომ სიგარეტის მოწევასა ან აზარტული თამაშებით გართობაში ცუდი არაფერია და ეს საქციელი არ შეიძლება ცოდვად ჩაითვალოს. არის თუ არა ასე? ამ და სხვა საკითხებზე იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება. – მამაო, რას ნიშნავს მანიაკალური მიდრეკილებები ადამიანში და შესაძლებელია თუ არა ლოცვით მათი დახმარება? – თუ ადამიანს მანიაკალური მიდრეკილებები აქვს, ეს უკვე ნიშნავს, რომ ეშმაკეულია. მისგან გათავისუფლება საკმაოდ ძნელია. ხშირ შემთხვევაში ადამიანს არ ჰყოფნის ზნეობრივი ძალები, რომ ამას შეებრძოლოს, თუმცა აღიარებს, რომ მისი ქმედება და სურვილი არ არის კეთილი. იყო შემთხვევა, როცა კაცს პერიოდულად ვინმეს მოკვლის ჟინი იპყრობდა, გონება უბნელდებოდა. ასეთი პერიოდების გადატანა ძალიან უჭირდა, მაგრამ, მიუხედავად ამისა, მაინც ვაზიარებდით. თუმცა ისიც უნდა ითქვას, რომ მისი აღსარების მოსმენას გვარიანი ძალა სჭირდებოდა. ასეთები ლოცვაში უნდა მოვიხსენიოთ ხოლმე. იშვიათია ნარკომანი, რომელსაც არ უნდა, რომ ამ სენისგან განიკურნოს, გათავისუფლდეს, მაგრამ, სამწუხაროდ, უმეტესობას ეს არ შეუძლია. როცა ადამიანი ნარკოტიკებით კვდება, ეს ცოდვა თავისი სიმძიმით თვითმკვლელობას უტოლდება. არ შეიძლება, ასეთს არ დაეხმარო, მაგრამ არიან ადამიანები, რომლებიც შეგნებულად განადიდებენ მანკიერებას და მას ადამიანის ნორმალურ მდგომარეობად მიიჩნევენ. თავიანთი ნებით კლავენ საკუთარ სულს. ასეთებზე ლოცვა კი ძნელია. სანამ დანამდვილებით არ გავიგებთ ადამიანის მდგომარეობას, არ მოვისმენთ მის შეხედულებებს, მანამდე არ გვაქვს მიზეზი, რომ მათთვის არ ვილოცოთ. ადამიანის გადარჩენის აუცილებელი პირობაა, რომ მისი თავისუფალი ნება, მსოფლმხედველობა, ღმრთის სიტყვას არ შეეწინაღმდეგოს. მანკიერი სულის მქონე ადამიანთან საუბარმა შეიძლება კარგი შედეგი გამოიღოს, მის გონებაში კეთილი ზრახვები აღძრას, გამოაღვიძოს, რათა გაუჩნდეს თუნდაც მცირედი სურვილი, რომ ჭეშმარიტებას დაუახლოვდეს. – როცა ცოდვებით დამძიმებულ ადამიანზე ლოცულობს, ამ დროს რა ემართება მლოცველს? – მისთვის მლოცველი საკუთარ თავზე იღებს ვალდებულებას, რომ ცოდვით დაცემული ადამიანის მაცდუნებელ ბოროტს შეებრძოლოს და ამით მოყვასს დაეხმაროს. რაციონალურად ამის გაგება შეუძლებელია, მაგრამ ყოველმა მღვდელმა, რომელსაც უხდება აღსარებების მოსმენა, იცის, რა შედეგი მოაქვს ასეთ ლოცვებს. – მამაო, რატომ არის სიგარეტის მოწევა ცოდვა? ამას ხომ ზოგიერთი მღვდელიც აკეთებს? – წმინდა პავლე მოციქული გვმოძღვრავს, რომ ყველაფრით, ყოველი ჩვენი საქმიანობით და ყოფითი ცხოვრებით, ღმერთი უნდა ვადიდოთ. რელიგიური გაგებით, ადამიანი დინამიკური არსებაა. იგი ან უახლოვდება უფალს, ან შორდება მას. თუ შენი ცხოვრებით ღმერთს არ ადიდებ, მაშინ შორდები უფალს; თუ შენი გზა ღვთისკენ არ მიდის, მაშინ სცილდები ჭეშმარიტებას და სწორედ ეს არის ცოდვა. ამგვარი შეფასებით, თამბაქოს მოწევა, რა თქმა უნდა, ცოდვაა. შეიძლება შედარებაც მოვიყვანოთ. ერთი ჭიქა ღვინით შეიძლება ღმერთი ვადიდოთ, რის მაგალითსაც ქართული სუფრა გვაძლევს, ხოლო სიგარეტის გაბოლებით უფალს ვერ ვადიდებთ, პირიქით, გაბოლება და იმავდროულად უფალზე საუბარი, მით უმეტეს, თუ ეს წმინდა ხატებთან ხდება, რა თქმა უნდა, ღვთის შეურაცხყოფაა. არ უნდა დაგვავიწყდეს, რომ თამბაქოს მოწევა წარმართული დროიდან მოდის. ის ამერიკელი ინდიელების საკმეველია. ინდიელთა საკმევლის კმევის ფორმა თანამედროვე ცხოვრებაში უცვლელად გადმოვიტანეთ. მწეველი კაცი ნიკოტინზე ხდება დამოკიდებული და ამით გარკვეული ხარისხით თავისუფლებასაც კარგავს. მორწმუნე ქრისტიანმა კი კარგად იცის, რომ ღმერთს არ უყვარს, როდესაც რაღაცაზე დამოკიდებული ხდები. რაც მთავარია, თამბაქოს მოწევა გარკვეულ რელიგიურ დატვირთვას ატარებს. ადამიანი ყოველთვის რაღაცას ეძებს, სიცარიელეს გრძნობს და ზოგჯერ მის შესავსებად სიგარეტს იყენებს; როცა აფორიაქებულია და სიმშვიდეს ეძებს, ისევ თამბაქოს მიმართავს. ქვეცნობიერად გრძნობს, რომ საჭიროა საკუთარ თავს ჩაუღრმავდეს და იმის ნაცვლად, ღმერთზე იფიქროს, ბოლს უშვებს ფილტვებში, სიგარეტს იხდის მეგობრად. ყოველ ადამიანს უნდა უყვარდეს ღმერთი და მის გარეშე ვერ უნდა ძლებდეს. მწეველს კი თამბაქო უყვარს და მის გარეშე არ შეუძლია. ვერ ვიტყვით, რომ მწეველი ისევე სცოდავს, როგორც მრუში, მკვლელი, ქურდი, მკითხავი, დედის მაგინებელი, მემთვრალე და ა. შ. მაგრამ თუ იგი უფლის სიყვარულისთვის თამბაქოს მოწევას თავს არ დაანებებს, მაშინ ეს ჩვევა შეიძლება სასიკვდილო ცოდვას გაუთანაბრდეს. რაც შეეხება მწეველ მღვდლებს, უცოდველნი არც სასულიერო პირები არიან. ისინი შეიძლება სხვადასხვა გზით სცოდავდნენ და, სამწუხაროდ, მათ შორის – თამბაქოს მოწევითაც. – აზარტული თამაშების არსზეც ვისაუბროთ. ეკლესია მათი სასტიკი წინააღმდეგია. – ყოველივე, რაც ღმერთს გვაცილებს, ცოდვაა. ამიტომ აზარტი, რომელიც სულის სიმშვიდეს გვაკარგვინებს, დიდი ცოდვაა. ფულთან დაკავშირებული აზარტი კიდევ მეტი ცოდვაა. აზარტულ თამაშში მოგებული ყოველი თეთრი სატანისაგან ნაჩუქარი ფულია, ამიტომ, რაც მეტს მოიგებ, უფრო საშიშია. ისინი, ვინც ამ საქმიდან სულ მოგებული რჩებიან, ანუ ამგვარი დაწესებულებების – ტოტალიზატორის, კაზინოს და ა.შ. მფლობელები, სულს ეშმაკს უთმობენ, რაც მათი გარდაცვალებისთანავე გაცხადდება. – როგორ შეიძლება ამ სენისგან თავის დაღწევა? – ამ სენისგან თავის დახსნა მხოლოდ ღვთის წყალობით შეიძლება. თუ ჩვენი ახლობელი სცოდავს ამგვარად, მისთვის უნდა ვილოცოთ! ანა ნოდია | |
| კატეგორია: სტატიები | დაამატა: mamao (2012-01-21) | ავტორი: მამა გიორგი სხირტლაძე | |
| ნანახია: 3472 | |
შესვლა საიტზე