იტვირთება...
| მთავარი » სტატიები » სტატიები |
| როგორ გავაღვიძოთ ჩვენში თანდაყოლილი სათნოება
სულიერი მხედველობა და უხილავი სამყარო – ეს არის თემა, რომელიც არც ერთი გონიერი, მორწმუნე ადამიანისთვის არის უცხო, თუმცა ბევრმა მათგანმა არ იცის, რატომ არსებობს უხილავი სამყარო, რატომ უნდა გაგვეხსნას სულიერი ხედვა, როგორ შევძლოთ სხვადასხვა სათნოების შეძენა და როგორ ავარიდოთ თავი დრტვინვას, რომელსაც ეშმაკი განსაცდელების სახით გვიგზავნის. სწორედ ამ თემაზე გვესაუბრება წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე).
– მამაო, რას ნიშნავს სულიერი ხედვა? – გარდა თვალებით ხედვისა, ადამიანს გააჩნია, ე.წ. გონებრივი მხედველობა. წმინდა მამების სწავლების თანახმად, ჩვენი გონება და გული წარმოადგენს ორგანოებს, რომლებიც აღიქვამს არა – მატერიალურ საგნებს, არამედ რეაგირებს აზრებსა და გრძნობებზე. სულიერი ხედვა ხელს უწყობს ლოცვას, იგი გონების აზროვნების ძალას ღვთაებრივი ხილვის ჭვრეტამდე აღამაღლებს. ვისაც ოდნავ მაინც გააჩნია სულიერი ხედვა, ის ამჩნევს ღვთის უჩვეულო ზრუნვას დიდსა თუ პატარაზე. მართლაც, თუ უფალმა ადამიანისათვის მსხვერპლად გაიღო ყველაზე ძვირფასი, თავისი ძე, მაშინ როგორღა დაინანებს სხვა რამეს, რამეთუ ამ მსხვერპლის წინაშე არად ღირს მთელი სამყაროც კი. უფალი არაფერს იშურებს განსაკუთრებით მათთვის, ვინც მისკენ ისწრაფვის, ვინც მისი სიტყვის შესრულებას ცდილობს. ხოლო ვისი გულიც შემუსვრილია თითოეული ჩადენილი ცოდვის გამო, ის უფლის ნების დამრღვევი, უყურადღებო, უმადურია უფლის მიმართ და არ უყვარს იგი. გონება და გული მიეკუთვნება სულს. ამიტომაც გონების და გულის მიერ აზრებისა და შეგრძნებების აღქმა, რომლებიც გარე სამყაროდან მომდინარეობს, სულიერ ხედვად იწოდება. ამ უნარის შეძენა კი ნიშნავს ადამიანის გონების განათებას ღვთიური მადლით. – როგორ უნდა მოიპოვო სულიერი ხედვა? – ნათლობა პირველი გზაა სულიერი ხედვის გასახსნელად, მაგრამ მის მოსაპოვებლად მხოლოდ ეს არ არის საკმარისი. ადამიანი იწმინდება ცოდვისგან, მაგრამ არ თავისუფლდება მისი ჩადენის ჩვევისგან. ამიტომ ადამიანის ერთ–ერთი მთავარი მოვალეობა არის, სწორედ სულიერი ხედვის გახსნისთვის იშრომოს, სულიერი სიბრმავისაგან განიკურნოს. სულიერი ხედვის ნიჭის მოსაპოვებლად, სიბრმავისაგან სიცრუის და შეცდომათაგან გასათავისუფლებლად უნდა შევიგრძნოთ გარკვეული შინაგანი განწყობა, რომელიც მართლმადიდებლობაში გამოსახულია ისეთი მნიშვნელოვანი ცნებებით, როგორიცაა სინანული და მორჩილება. – რატომ არის სამყაროს ნაწილი ადამიანთათვის უხილავი? – მიზეზი იმისა, რომ ჩვენ ვერ შევიგრძნობთ უხილავ სამყაროს, არის პირველი ადამიანების ცოდვით დაცემა. ადამიანის სხეული და მისი შესაძლებლობები შეიცვალა. ცოდვით დაცემის შემდეგ ადამიანის სულიც და სხეულიც გადასხვაფერდა. მანამდე ადამიანს უნარი ჰქონდა, უხილავი სამყარო აღექვა. ცოდვით დაცემის შემდეგ მან ეს უნარი დაკარგა. განმანათლებელი ეგნატე ბრიანჩანინოვი ამას ასე ხსნის: "პირველი ადამიანების ცოდვით დაცემის შემდეგ, ვიდრე უფალი მათ სამოთხიდან გააძევებდა, სასჯელი დაუდგინა, გაუკეთა მათ ტყავის სამოსელი და შემოსა". "ტყავის სამოსელი", წმინდა მამების ახსნით, ნიშნავს ჩვენს უხეშ სხეულს, რომლითაც დაცემის შემდეგ შევიმოსეთ, დავკარგეთ რა სიფაქიზე და სხეულის სულიერება და სხეულმა სიტლანქე შეიძინა. ჩვენ მოვიპოვეთ ბოროტებისკენ ბუნებით სწრაფვა, რაც სრულიად ბუნებრივი რამ გახლავთ დაცემული არსებებისათვის. – რას ნიშნავს დრტვინვა და როგორ უნდა ებრძოლოს ადამიანი ცუდ შეგრძნებებს? – დრტვინვა ცოდვაა, ამიტომ ადამიანმა ამის ნაცვლად, ჯობია, ილოცოს. ამ ცოდვის განგდება ღვთის დიდებითაა შესაძლებელი. ეშმაკი მრისხანებს და მიდის მასთან, ვინც დრტვინვაშია, რათა მას უმეტესი უსიამოვნებები შეამთხვიოს. რაც უფრო მეტად დრტვინავს ადამიანი, მით მეტად ინგრევა სულიერად. ზოგჯერ ეშმაკი გარს მოგვადგება და შთაგვაგონებს, რომ ყველაფრით უკმაყოფილონი ვიყოთ. ყველაფერს, რაც კი შეიძლება შეგვემთხვეს, სულიერი სიხარულით და ღვთის დიდებით უნდა შევხვდეთ. სწორედ ასეთ დროს გადმოვა ღვთის კურთხევა ჩვენზე. მდრტვინავი ადამიანი საკუთარ თავს წყევლის, მერე კი მას ღვთის რისხვა ატყდება თავს. დიდება ღვთისა უდიდესი საქმეა. ადამიანმა შესაძლოა დრტვინვა დაიწყოს მაშინ, როცა საკუთარ ძალებზე აღმატებულ სიმძიმეს იტვირთავს. ის მრისხანებასა და განკითხვაშიც ჩავარდება. დრტვინვას გავექცეთ და თავი მოვთოკოთ, ამით ბევრად დიდ ღვაწლში ვიქნებით. – როგორ გამოიმუშაოს ადამიანმა საკუთარ თავში სათნოება? – სათნოება ადამიანს თანდაყოლილად აქვს. ნათლობის შემდეგ იმ ყველა სიკეთის გაღვიძება არის შესაძლებელი ადამიანში, რაც კი მას გააჩნია. და თუკი ეძებ, აუცილებლად პოულობ. საამისოდ კი, კვლავაც აღვნიშნავ, რომ მოძღვრის აყვანა, ეკლესიური ცხოვრება, თავმდაბლობა და სინანულია საჭირო. იმისთვის, რომ სათნოებები გაგვაჩნდეს, ღმერთი მრავალ მოსახერხებელ შემთხვევას გვაძლევს. ძალიან ბევრი კი, მიუხედავად იმისა, რომ ღმერთს ევედრება ამგვარი შესაძლებლობები მისცეს, საკმარისია, რაიმე სირთულეს წააწყდეს, მაშინვე დრტვინვას იწყებს. ის სირთულეები, რომლებიც დღევანდელ მსოფლიოში არსებობს, სულიერი ცხოვრების მოსურნე ადამიანებს აიძულებს, რომ არ დასუსტდნენ, არ ჩაეძინოთ. სამწუხაროდ, ბევრია ჩაძინებული. სწორედ ამიტომ უნდა გამოვიმუშაოთ სათნოებები, რომ ვიფხიზლოთ. ადამიანმა ყველა დრო, მშვიდობიანი თუ პირიქით, რთული, სულიერი წარმატებისათვის უნდა გამოიყენოს: უნდა მოიშოროს ნაკლოვანებები და სათნოებები გამოიმუშაოს. წუთისოფელი გამოსაცდელი ვადაა ადამიანებისათვის და ეს დრო სწორედ სულიერ ხედვის გახსნას, სათნოებების შეძენას უნდა დავუთმოთ. სათნოებების შეძენას სასულიერო ლიტერატურის კითხვა ეხმარება. ამგვარი საკითხავები ათბობს სულსაც და გონებაც სულიერ სფეროში გადაინაცვლებს. ანა ნოდია | |
| კატეგორია: სტატიები | დაამატა: mamao (2012-03-21) | ავტორი: მამა გიორგი (სხირტლაძე) | |
| ნანახია: 2177 | |
შესვლა საიტზე