იტვირთება...
| მთავარი » სტატიები » სტატიები |
| "დღეს ადამიანს მადლის დაბრუნების საშუალება აქვს"
რა მნიშვნელობის მატარებელია ძველი და ახალი აღთქმის წიგნები, რას ნიშნავს "აღთქმა", რა არის გარდამოცემა, რომელიც ზეპირსიტყვიერებით მოვიდა ჩვენამდე, რატომ განკაცდა უფალი იესო ქრისტე და რატომ ეცვა ის ჯვარს კაცობრიობის გამო? ამ და სხვა კითხვებზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება. – მამა გიორგი, ბიბლია ორი ნაწილისაგან შედგება, ეს არის ძველი და ახალი აღთქმა. რა არის ძველი და რა ახალი აღთქმის მთავარი აზრი და რას ნიშნავს სიტყვა "აღთქმა"? – დიახ, ბიბლია იყოფა ძველ და ახალ აღთქმად. ძველი აღთქმის წიგნები დაწერილია ქრისტეს შობამდე, ხოლო ახალი აღთქმის – ქრისტეს შობიდან. ორივე წიგნი, ერთი სიტყვით, ღვთაებრივ სწავლებებს შეიცავს, რომელიც ღმერთმა აღუთქვა ადამიანებს. სიტყვა "აღთქმა" საერთოდ ნიშნავს კავშირს, მოლაპარაკებას (ძველ აღთქმაშია მაცხოვრის მოსვლის აღთქმა). მთავარ აზრად ძველ აღთქმას გასდევს ის, რომ ღმერთი ადამიანებს ჰპირდება მაცხოვარს, ქვეყნიერების მხსნელს, ამზადებს მის მისაღებად ხალხს თანდათანობით, გამოცხადებით, სწავლებებით, წინასწარმეტყველებებით, წინასახეებით, ლოცვებით ღვთისმსახურებით. ახალი აღთქმის ძირითადი არსი მდგომარეობს იმაში, თუ როგორ მოვიდა მაცხოვარი, როგორ მიეცა ადამიანებს აღთქმული მესია – მხოლოდშობილი ძე ღვთისა, ისეო ქრისტე, რომელმაც მისცა ადამიანებს სწავლება ახალი აღთქმისა. თვითონ მაცხოვარი მთელი სისავსით გვაძლევს სახარების სწავლებას, თავის ღვთაებრივ გამოცხადებას ადამიანებისადმი. ამ წიგნების ღვთის მსახურებაზე ლაპარაკობს ის ფაქტიც, რომ ამ წიგნების კითხვა ადამიანს ცვლის, რეაქციას ახდენს ადამიანის სულზე, წმენდს მის გულს. ქრისტიანობის წინააღმდეგ აღიძვრებოდა წარმართული სამყარო, მთელი თავისი ბოროტებით, მაგრამ ათასობით ქრისტიანი მოწამეობრივად წირავდა თავს და ამგვარად, ღვთის სიტყვა ვრცელდებოდა და მტკიცდებოდა ხალხში. იყო ისეთი შემთხვევებიც, როცა ადამიანები, კრიტიკული მიზნებით – რომ უარეყოთ ბიბლია, იღებდნენ ხელში ბიბლიურ წიგნებს და შემდეგ თვითონ ხდებოდნენ ყველაზე დიდი მორწმუნეები. ასეთი უამრავი შემთხვევაა. აი, რას უშვრება ღვთის სიტყვა ადამიანებს! ვინც ყურადღებით წაიკითხავს წმინდა წერილს, იგი თავის თავზე გამოცდის ღვთის ჭეშმარიტი სიტყვების მოქმედებას, ძალას ამ სიტყვებისას, დარწმუნდება, რომ ეს მართლაც ღვთივგამოცხადებული წმინდა წერილია და ღვთივგამოცხადებული წმინდა სწავლებაა. არის წმინდა გარდამოცემები, რომლებიც წმინდა წერილში არ შევიდა, მაგრამ სიტყვიერად იქნა გადმოცემული ან წმინდა ადამიანების მიერ იქნა დაწერილი. ეს არის წმინდა ნაშრომები, წმინდა მამების თხზულებები, უამრავი რამ, რომლებიც ატარებენ ქრისტიანულ ფასეულობას. ეკლესია წმინდა გარდამოცემასაც ისე ინახავს, როგორც წმინდა წერილს. ჩვენ რომ ვკითხულობთ წმინდა წერილს და წმინდა გარდამოცემის სიტყვებს, ჩვენც თანამონაწილეები ვართ ამ მოვლენებისა, რაც იქ არის აღწერილი. – რას ნიშნავს ღმერთის განკაცება და რატომ განკაცდა უფალი? – უფალი განკაცდა და თვითონ მოგვცა სამების დოგმატი, თვითონ მოგვცა მონოთეისტური სწავლება და ერთი ღმერთის თაყვანისმცემლები ვართ. ეს საიდუმლო კი იმის გამო მოგვეცა, რომ უფალი განკაცდა. ეს განკაცებულმა ღმერთმა მოგვცა, არა წინასწარმეტყველებმა ან სხვამ, უშუალოდ პირდაპირ ქრისტემ მოიტანა სწავლება სამების შესახებ. ეს ყოველივე კი ადამიანის გადარჩენისთვის მოხდა. უფალი გახდა ძე კაცისა, რათა ადამიანი გამხდარიყო ძე ღვთისა, ე.ი. "ქრისტე განკაცდა, რათა ადამიანი განიღმრთოს", როგორც ამბობს ათანასე დიდი. ეს დიდი საიდუმლოა. ღმერთმა აღიქვა სრული კაცობრივი ბუნება, რათა კაცობრივი ბუნება ყოფილიყო განღმრთობილი და დაინათესავა იგი. ღმერთი მაქსიმალურად დაახლოვდა ადამიანთან. იმაზე მეტი დაახლოება ადამიანისა ღმერთთან, რაც ქრისტიანობაშია, შეუძლებელია ვინმემ წარმოიდგინოს. ამაღლება, ჯვარცმა, სულიწმინდის გარდამოსვლა – ეს ყოველივე ისტორიულ დროში მოხდა. ღმერთისთვის არ არსებობს დრო: აწმყო, წარსული, მომავალი. ეს ჩვენთვის არის. ღმერთისთვის არსებობს მარადიულობა. ახალ აღთქმაში თვითონ უფალმა გახსნა სამების საიდუმლო, ეს დიდი საიდუმლო კი მან განცხადების სახით მოგვცა, ე.ი. განცხადდა. ვიმეორებ, ჩვენ მონოთეისტები ვართ. ღმერთი ერთია, მაგრამ სამგვამოვანი. რიცხვი 3 ღვთის არსებაში საიდუმლოდ დევს. ეს სამგვამოვნება, რა თქმა უნდა, არ არის ადვილი გასაგები. წმინდა გრიგოლი ღვთისმეტყველი ამბობს, რომ "ეს დიდი ჯვარია ადამიანის გონებისთვის". რაც ადამიანის გონებისთვის ბოლომდე მიუწვდომელია, რწმენისთვის მისაწვდომია. ის, რაც გონებისათვის შეუცნობადია, შეიმეცნება იმ ღვთისმეტყველების პრაქტიკაში, რასაც ჰქვია წირვა–ლოცვა. ეს საიდუმლო არამარტო ყურით, ინტელექტითა და გონებით შეიმეცნება, არამედ შეისისხლხორცება ზიარების დროს. მთელი ჩვენი ცხოვრება სჭირდება "მრწამსის" გაგებას და შემეცნებას. ამას სჭირდება ქრისტიანული ცხოვრების წესი, რომელმაც შეიძლება ნორმაში მოიყვანოს ადამიანის დანგრეული ბუნება. ქრისტეს გარეშე ადამიანი იღუპება, წყდება და მიდის დეგრადაციისკენ. ადამიანმა რომ ირწმუნა, ეს არ ნიშნავს იმას, რომ გაჩერდეს და მიღწეულით დაკმაყოფილდეს. რწმენის მარცვალი აუცილებლად უნდა იზრდებოდეს. იზრდება რა რწმენა, მატულობს შემეცნებაც და სიყვარულიც. რადგან არ შეიძლება არ იცოდე რამე და ისე გიყვარდეს. – რა განსხვავებაა ძველსა და ახალ აღთქმას შორის? – ძველი აღთქმის ცნობიერება სულ სხვანაირია – ჯერ კიდევ ღმერთი გამოჩენილი, მოსული კაცად არ არის. ახალი აღთქმის ცნობიერება კი სულ სხვა არის. აქ ღმერთი მოსულია ადამიანად. ჩვენი დღევანდელი მდგომარეობა რადიკალურად განსხვავებულია იმასთან შედარებით, რაც იყო ძველ აღთქმაში. ის, რასაც დღეს ვაკეთებთ, გზახსნილი და შემეცნებადია, ძველ აღთქმაში ვერ იყო შემეცნებადი. დღეს შეიძლება მოინანიოს ადამიანმა და ისევ ქრისტეს დაუბრუნდეს, მაშინ კი ცოდვის შედეგად ადამიანი იღუპებოდა და დაღუპვისთვის იყო განწირული. დღეს ადამიანს მადლის დაბრუნების საშუალება აქვს. ქრისტეს შემდეგ იგი სულ სხვა ქმნილებაა. სამების დოგმატთან მიახლოება მხოლოდ ქრისტეთი შეიძლება. რაოდენ დიდია ქრისტიანული სარწმუნოება, რადგან, პირველ ყოვლისა, ადამიანთან მოვიდა! რაოდენ დიდი უმადურებაა ადამიანის მიერ ისევ ბნელ ცნობიერებაში დაბრუნება; რაოდენ დიდია ადამიანის ცდომილება, როდესაც ის თაყვანს სცემს ქმნულს და ვერ მიდის შემოქმედამდე, ერთ ღმერთამდე. ადამიანის დანიშნულება კი ეს არის. წმინდა მამა ამბობს, რომ ადვილია ლაპარაკი ღმერთზე, მაგრამ საკუთარი თავის მომზადება სულიწმინდის მისაღებად, განწმენდა საკუთარი თავის უფლისთვის, უკვე მეორე საქმეა და არ არის ადვილი. ეს საკმაოდ მტკივნეული და შრომატევადი რამ არის. ადამიანში არ უნდა მოიძებნოს ისეთი წერტილი, რომელშიც ქრისტეს მადლი არ იყოს შესული. ანა ნოდია | |
| კატეგორია: სტატიები | დაამატა: mamao (2012-02-15) | |
| ნანახია: 3972 | |
შესვლა საიტზე