იტვირთება...
| მთავარი » სტატიები » სტატიები |
| ადამიანურ სისუსტეებზე გამარჯვების შესაძლებლობა ყველაზე დიდი თავისუფლებაა
ჩვენი სასაუბრო თემა, რომელიც შეეხება ღვთის ხატად და მსგავსად შექმნილ ადამიანს – მცირე კოსმოსს, ორ ნაწილად გაიყოფა. "სარკის" წინამდებარე ნომერში წმინდა იოანე ღვთისმეტყველის ტაძრის დეკანოზი, მამა გიორგი (სხირტლაძე), გვესაუბრება ღვთის ხატად და მსგავსებად შექმნილი ადამიანის თავისუფალ ნებაზე, ადამიანად ყოფნის არსზე, საღმრთო მადლის მიღების საშუალებაზე. მეორე ნაწილში კი, "სარკის" მომდევნო ნომერში, საუბარი იქნება ბოროტების პრობლემაზე.
– მამაო, რას ნიშნავს ადამიანისთვის ის, რომ იგი ღვთის ხატად და მსგავსად არის შექმნილი? – მსგავსებაც, როგორც პოტენციური შესაძლებლობა, ხატებასთან ერთად ჩადებულია, მაგრამ მსგავსება უფრო დავალებაა, რომ ადამიანი ემსგავსოს მადლით ღმერთს, იყოს სრული, ვითარცა ღმერთი არის სრული და ადამიანმა იმ ბაღს, იმ ქვეყანას მოუაროს, რომელიც ღმერთმა ჩააბარა და თანაზიარი გახადოს იმ სათნოებებისა, სრულყოფილებებისა, რომლებსაც ის ატარებს. ადამიანი პასუხს აგებს გარემოზე, იმ ქვეყანაზე, იმ ბაღზე, რომელიც ღმერთმა ჩააბარა. ბაღში იგულისხმება მთელი მისი სამსახურებო არეალი, სადაც მისი ძალისხმევა ივრცობა. მოყვასიც ისევე უნდა უყვარდეს ადამიანს, როგორც საკუთარი თავი, იმიტომ, რომ ღმერთის უხილავი სიყვარული პირდაპირ დაკავშირებულია ხილული მოყვასის სიყვარულთან. როგორც ვიცით, ღმერთმა ადამიანი შექმნა არა მარტო სიტყვიერი ბრძანებით, არამედ თავისი ხატებით. მას ცალკე მიანიჭა ყოფიერება, შთაბერა სული. მასში ჩადო ყოველივე ის, რასაც ჰქვია განღმრთობის უნარი. რაც უნდა განწმენდილი იყოს ადამიანი, მაინც მეუფეა უფალი. ადამიანი არა ბუნებით მიემსგავსება ღმერთს, არამედ მადლით. – მამაო, ადამიანის თავისუფალ ნებაზე გვესაუბრეთ. – ვიცით, რომ თავისუფლება და სიყვარული გულისხმობს არჩევანის უნარს, გულისხმობს იმ რისკს, რასაც ჰქვია ადამიანში ჩადებული ღვთის უარყოფის შესაძლებლობაც. თვითგანადგურების შესაძლებლობის რისკიც არის ჩადებული ადამიანში. ადამიანი თავისუფალ არსებად არის შექმნილი. დიდი საიდუმლოა ისიც, რომ ადამიანს აქვს წინააღმდეგობის გაწევის უნარიც. თავისუფალი ნების გამოვლინებაშიც, რომელიც ითვალისწინებს წინააღმდეგობებს, ვლინდება ღვთის განსაკუთრებული სიყვარული ადამიანისადმი, მისი განსაკუთრებული მზრუნველობა. ღმერთმა არა მარტო ფიზიკურად გამოძერწა ადამიანი, არამედ მთლიანად, სულით და სამშვინველით. ადამიანი პიროვნული არსებაა, მას შეუძლია სიყვარული, საკუთარ თავზე მეტი სიყვარულიც, რომ თავი დადოს მოყვასისათვის. ესეც ქრისტესმიერი მსგავსებაა. ღვთის ხატება ადამიანურ ბუნებაზე მაღლა დგას. ბუნებრივ უძლურებაზე გამარჯვება ხდება ზუსტად ამ ღვთის ხატებითა და მსგავსებით. ადამიანურ სისუსტეებზე გამარჯვების შესაძლებლობა ყველაზე დიდი თავისუფლებაა. ადამიანს საოცარი უნარი აქვს იმისა, რომ თავი შეიკავოს, არ გააკეთოს ის, რაც მას უნდა, არამედ გააკეთოს ის, რასაც ითხოვს მისგან სიტუაცია, აუცილებლობა და საჭიროება. ადამიანურ ბუნებაზე, ინსტინქტებზე მაღლა დადგომის უნარი ათავისუფლებს და ანიჭებს ადამიანს თავისუფლებას, რომ იგი აკეთებს არა იმას, რაც უნდა, არამედ იმას, რასაც ითხოვს მისგან სარწმუნოება, საჭიროება, ვალდებულება, აუცილებლობა, მცნება. მცნების დაცვით კი თავისუფლად განსაზღვრავს ადამიანი თავის არჩევანს. უნდა ვიცოდეთ, რომ მთავარი განმასხვავებელი მორწმუნესა და ურწმუნო ადამიანს შორის არის მისი აზრობრივი დისციპლინა. – როდის მიემსგავსება ადამიანი ჭეშმარიტად ღმერთს თავის ხატებითა და მსგავსებით? – ჭეშმარიტი ხატება და მსგავსება ადამიანში მაშინ არის აღსრულებული, როცა ადამიანი ხელთუქმნელი მადლით განიღმრთობა. ადამიანის ღირსებაა ზუსტად ადამიანურ ბუნებაზე, ინსტინქტებზე, უდისციპლინობაზე, ცოდვისკენ მიდრეკილებაზე ქრისტეს ხელთუქმნელი მადლის მეშვეობით, სინერგიით მიაღწიოს გამარჯვებას. იმ ადამიანზე მეტი გახდეს, ვიდრე არის თვითონ – "იყვენით სრულ, ვითარცა მამაი თქვენი ზეცათა სრულ არს". ქრისტიანობაში არ არის ადამიანის პიროვნების, ბუნების განადგურება. აღმოსავლურ რელიგიებში პიროვნება ითვლება არათუ სასურველად, არამედ პირიქით, ხელისშემშლელ, დამაბრკოლებელ ფაქტორად, ის, რაც უნდა იქნეს განადგურებული. ქრისტიანობა იმ ადამიანურს უფრთხილდება, იმ "მე"–ს უფრთხილდება, რომელიც ღმერთმა შექმნა. გრიგოლ ღვთისმეტყველი ამბობს, თავისუფლების მიზანი არის ის, რომ ის სიკეთე, რომელსაც ადამიანი ირჩევს, მართლა მას ეკუთვნოდეს. სიკეთე, რომელსაც ღმერთი აძლევს, ადამიანმა განღმრთობით უნდა შეისისხლხორცოს. ღმერთი ადამიანისგან ელის თავისუფალ არჩევანს. ღმერთი არაფერს ითხოვს ჩვენგან, გარდა სინანულისა, გარდა თავისუფალი ნებით სიყვარულისა, სარწმუნოებისა და სასოებისა. ადამიანს თავისი თავის ცხონება და გადარჩენა რომ შეეძლოს, როგორც იოგაშია, კარატეშია ან სხვა აღმოსავლურ რელიგიურ სწავლებებში ან სუნთქვის ვარჯიშებში და სხვა ტექნიკაში, მაშინ დიდი ხანი ყველა "ცხონებული" იქნებოდა. ადამიანს საკუთარი თავის ცხონების, თვითგადარჩენის უნარი არ აქვს. ის გადარჩება მხოლოდ და მხოლოდ ღვთის მადლით. თავმდაბალი ადამიანი უყვარს ღმერთს, ამპარტავანს კი ებრძვის. შეუგნებლად ვერავინ ცხონდება. რაც უნდა მექანიკურად მიაღებინო ადამიანს რელიგია, მას შენ ძალით ვერ ალოცვინებ და ძალით ვერ აფიქრებინებ. ერთს ჰკითხეს, სადაური ხარო. წარმოშობით რუსი ვარ, მაგრამ გავიზარდე ჩინეთში, ისე ინდურად ვლაპარაკობო. მაშინ მითხარი, რა ენაზე ფიქრობო. რუსულადო. ე.ი. რუსი ყოფილხარო. რა ენაზეც ფიქრობს ადამიანი, იმ ეროვნებისაა. ამიტომ, რაც უნდა მოგახვიონ გარეგნულად, შენში რა ეროვნული გენიც არის, იმ ენაზე ილოცებ. არსებობს კანონი (წესი) "დიდ კურთხევანში", რომ თუ ადამიანმა, რომელიც სიკვდილის შიშით, ძალადობით ან სხვა მიზეზით სხვა რელიგიისაკენ ძალით მიდრეკილ იქნა ან დაგმო ღმერთი შეუგნებლობით, მერე მოინანია და მოიქცა, ეკლესიაში მისი თავიდან მიღების წესი მაინც არსებობს. ადამიანის თავისუფალ ნებას პატივს სცემს და უფრთხილდება მართლმადიდებელი ეკლესია. ღმერთის აბსოლუტური ნებით არის შექმნილი ადამიანი, მაგრამ მარტო ღმერთის ნებით კი არ განიღმრთობა, არამედ საჭიროა ადამიანის თანხმობა. ერთი ნება არ არის საკმარისი, საჭიროა ორი ნება. ეკლესია და ეკლესიური წესები შენ არ უნდა მოირგო, არამედ შენ უნდა მოერგო, შეეწყო და შეეთვისო ღვთის ნებას. ადამიანი რომ მადლით ღმერთის მსგავსი გახდეს, დავალება მსგავსებისა უნდა შეასრულოს. ადამი დაეცა და გამოხსნილ იქნა ქრისტეს მიერ. ჩვენც ჩვენს გამოხსნასა და ჩვენს თავს ვპოულობთ ქრისტეში და ამ გამოხსნის განგებულებას ვეზიარებით და ვისისხლხორცებთ ქრისტეს სისხლისა და ხორცის მიღებით. მადლის მიღების უდიდესი საშუალება არის ზიარება. ზიარება კი ადამიანმა ხშირად უნდა მიიღოს, რომ მადლი არ დაკარგოს და მიმსგავსებულ იქნეს ქრისტეს, თავის ხატებითა და მსგავსებით. ანა ნოდია | |
| კატეგორია: სტატიები | დაამატა: mamao (2012-02-21) | ავტორი: მამა გიორგი (სხირტლაძე) | |
| ნანახია: 1210 | |
შესვლა საიტზე