იტვირთება...
| მთავარი » სტატიები » სტატიები |
| "იფხიზლეთ, იღვიძეთ, ვინაიდან თქვენი მტერი ეშმაკი დაძრწის"
21-ე საუკუნეში ადამიანების გარკვეული ნაწილი ზებუნებრივ ძალებს სკეპტიკურად უყურებს. ამტკიცებენ, რომ ბოროტი ძალები არ არსებობენ, რომ ისინი მხოლოდ მითური არსებები არიან. წმინდა იოანე ღვთისმეტყველის სახელობის ტაძრის დეკანოზმა, მამა გიორგიმ (სხირტლაძე) გვითხრა, რომ ყველაზე დიდი სატანიზმი სწორედ ბოროტი ძალის, ეშმაკის უარყოფაა. წმინდა მამები მორწმუნე ქრისტიანებს სიფხიზლისკენ მოუწოდებენ. ბოროტისგან თავის დასაცავად ყველაზე კარგი საშუალება ლოცვა, მარხვა, ზიარება და ყველა იმ წესის დაცვაა, რასაც მართლმადიდებელი ეკლესია გვასწავლის. არსებობენ თუ არა დემონები, რამდენია მათი რიცხვი, არსებობს თუ არა მათ შორის იერარქიული დაყოფა და ა.შ., "სარკე" მამა გიორგის ესაუბრა.
– მამა გიორგი, ბევრს არ სჯერა, რომ ბოროტი ძალა არსებობს, შესაბამისად, არც სატანის არსებობას იჯერებენ. რას გვეტყვით თქვენ? – მართლმადიდებელი ეკლესია ამტკიცებს, რომ დემონები რეალურად არსებობენ. ზოგადად, სიკეთის უდიდესი საიდუმლო პიროვნებაშია დამარხული, ბოროტებასაც პიროვნული ხასიათი აქვს, უბრალოდ, დემონი რაციონალური ძალის მატარებელია. გრიგოლ ნოსელის აზრით, ვინც ემორჩილება ეშმაკს, იგი არარსებულში ცხოვრობს. წმინდა დიოდოქტოს ფოტიელი ამბობს: "ბოროტება არ არსებობს ან უფრო სწორად, იგი არსებობს მხოლოდ იმ დროს, როცა მას სჩადიან". წმინდა მამები გვასწავლიან, როგორც კი ჩვენ მაცხოვრის გზას ავირჩევთ, აუცილებლად წავაწყდებით სატანას, "რომელიც დაძრწის, როგორც მბრდღვინავი ლომი და ეძებს მსხვერპლს". – როდის ბრაზდება ყველაზე მეტად სატანა? – როცა კათაკმეველი მართლმადიდებელ ქრისტიანად ინათლება. ნათლისღების საიდუმლოში ერთ–ერთ მთავარი ადგილი სატანის უარყოფას, მისი მოძღვრების დაგმობას უკავია. ნათლობის შემდეგ ადამიანს აუცილებლად უხდება ბნელსა და კოსმიურ ძალებთან შეჯახება, რომლებიც მას ქრისტეს ნათელთან მისასვლელ გზას უღობავენს. სასიკვდილოდ დაჭრილი ეშმაკი სამკვდრო–სასიცოცხლო ომს უცხადებს ყოველ ქრისტიანს. ამიტომ ყველა მორწმუნემ კარგად უნდა გააცნობიეროს, რას გვასწავლის ეკლესია ბოროტების შესახებ, რადგან ამის გარეშე სულიერი წინსვლა არ ექნება. ყველაზე დიდი სატანიზმი სწორედ ეშმაკის არსებობის უარყოფაა. საღმრთო წერილში ანგელოზთა ცალკეული ციტატებია მოყვანილი, სადაც კეთილი სულების შესახებ გვამცნობენ, იგივე წმინდა წერილში ასევე საუბარია ბოროტ სულებსა და დემონებზე, რომლებსაც სხვადასხვა სახელით მოიხსენიებენ. პეტრე მოციქული გვაფრთხილებს: "იფხიზლეთ, იღვიძეთ, ვინაიდან თქვენი მტერი ეშმაკი დაძრწის!". – მამაო, არის თუ არა განსაზღვრული დემონთა რიცხვი? – რაც შეეხება ბოროტ სულთა რიცხვს და იერარქიას, საღმრთო წერილი ამას ზუსტად არ განსაზღვრავს, მაგრამ წერია, რომ მათი რიცხვი უზარმაზარია. როცა ქრისტე ბოროტი სულით შეპყრობილ ადამიანს განკურნავს, ეშმაკეულის პირით დემონები თავიანთ სახელს რიცხვით გამოხატავენ – "ლეგიონი". – მათ შორის იერარქიული ურთიერთობა თუ არსებობს? – დემონები შეადგენენ სამეფოს თავიანთი იერარქიული წყობით. ზოგი წმინდა მამა აპოკალიფსის მიხედვით ამბობს, რომ სატანამ ანგელოზთა სამყაროს ერთი მესამედი აცდუნა. "და აჰა, ვეშაპი ცეცხლისაი დიდი, რომელსა ედგნეს თავნი შვიდნი და რქანი ათნი და თავთა ზედა მისთა შვიდნი გვირგვინი, და კუდი მისი მიითრევდა მესამედსა ვარსვკვლავთა ცისათადა გარდმოეყარნა იგი ქვეყნად". პავლე მოციქული დემონთა დასში განასხვავებს "მთავრობათა და ხელმწიფებათა" და "ამ ბნელი საწუთროს ქვეყნის მპყრობელთა" იერარქიებს, ანუ მოციქული თითქმის იგივე სახელწოდებით აღწერს დემონთა იერარქიას, როგორითაც წმინდა დიონისე არეოპაგელი განარჩევს ანგელოზებრივ დასებს. წმინდა მამათა აზრით, დემონებს შორის ეს ურთიერთმორჩილება არის ნაშთი იმ იერარქიული სრულყოფილებისა, რაც მათ ანგელოზურ სამყაროში გააჩნდათ. – მამაო, ასეთი რამეც გამიგია, რომ ბოროტება მხოლოდ და მხოლოდ სიკეთის ნაკლებობაა... – წმინდა მამათა აზრით, ბოროტება ნაკლია, ის, რაც აკლია ბუნებას იმისთვის, რომ სრულყოფილი იყოს. ბოროტება არ არის პიროვნების ბუნება, იგი პარაზიტია, რომელიც მხოლოდ ცოცხალი ორგანიზმის ხარჯზე არსებობს. – მამაო, ანგელოზი დაეცა ამპარტავნების გამო, ანუ ეს თვისება ყველაზე საშიში და დამღუპველი ცოდვაა ადამიანისათვის? – ბოროტებას საწყისი დაედო ერთი ანგელოზის ცოდვით, ამპარტავნებით, რომელიც განუდგა უფალს და ყველა ცოდვა აქედან იღებს სათავეს, ცოდვების ძირი, ფესვი სწორედ ადამიანის ამ თვისებიდან მოდის. წმინდა იოანე ოქროპირი ამბობს: "ამპარტავნებისთვის ანგელოზები ზეცით გარდამოცვივდნენ და ეშმაკად შეიცვალნენ. იმან, ვინც პირველი იყო მოწოდებული განღმრთობისაკენ, თავად მოინდომა ღმერთად გახდომა". გაღმერთების სურვილი, სიძულვილი მადლისადმი – აი, ეს არის ამპარტავნება და ყველა ცოდვათა სათავე. ძველი აღთქმის, ისევე როგორც აპოკალიფსის, "დასაბამის გველი" სატანაა. – სწორედ გველის სახით გამოეცხადა სატანა ადამსა და ევას სამოთხეში. ბევრი სვამს კითხვას, რატომ დაუშვა უფალმა, რომ ეშმაკს ედემის მკვიდრნი ეცდუნებინა? – სატანა მიწიერ სამოთხეში იმიტომ იმყოფებოდა, რომ ადამიანს თავისუფლების გამოცდა გაევლო. მას უფალმა თავისუფალი ნება მიანიჭა, მისი ასარჩევი იყო, რა გზას გაივლიდა – მიიღებდა თუ არა აკრძალულ ნაყოფს. ადამმა და ევამ ცდუნებას ვერ გაუძლეს და ამიტომაც დაკარგეს მიწიერი სამოთხე. – მორწმუნე ქრისტიანები ალბათ მუდმივად მზად უნდა იყვნენ ეშმაკთან საბრძოლველად? – პავლე მოციქული ამბობს: "ჩვენ ვიბრძვით არა სისხლისა და ხორცის, არამედ მთავრობათა და ხელმწიფებათა, ამ ბნელი საწუთროს ქვეყნის მპყრობელთა და ბოროტების ზეციურ სულთა წინააღმდეგ". ასე რომ, სატანა არ არის მითური არსება, ის ნამდვილად არსებობს და ყველამ სიფხიზლე უნდა გამოვიჩინოთ. ანა ნოდია | |
| კატეგორია: სტატიები | დაამატა: mamao (2012-02-06) | ავტორი: მამა გიორგიმ (სხირტლაძე) | |
| ნანახია: 1346 | |
შესვლა საიტზე