იტვირთება...
| მთავარი » სტატიები » სტატიები |
| "სხვის ხარჯზე ცხოვრება იგივე ქურდობაა!"
"არა იპარო" – უფლის ეს მცნება, ერთი შეხედვით, მხოლოდ ქურდობასთან, სხვისი საკუთრების მითვისებასთან ასოცირდება, თუმცა მას სხვა მრავალი გაგებაც აქვს, რომელიც ყველა ქრისტიანმა უნდა იცოდეს. მერვე მცნება ადამიანს ასწავლის შრომისმოყვარეობას, გლახაკების დახმარებას, უანგარობას, გულმოწყალებას და სხვა მსგავს სათნოებებს. ამ თემაზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება.
– მამა გიორგი, რა იგულისხმება სიტყვებში "არა იპარო", გარდა იმისა, რომ ვიცით, ქურდობა ცოდვაა? – გასაგებია, რომ ეს მცნება, ერთი მხრივ, პირდაპირი გაგებით უნდა გვესმოდეს, ანუ ქურდობა თავისთავად ცოდვაც არის და დანაშაულიც. უფლისათვის ქურდობის ყოველგვარი სახე საძაგელი და მიუღებელია, როგორიც უნდა იყოს, ეს იქნება სხვისი ნივთის ჩუმად აღება და მითვისება, დაუკითხავად რაიმეს წაღება, ვინმეს დაყაჩაღება, სიყალბით რაიმეს მოპარვა, ყალბი ფულით რაიმეს შეძენა, მყიდველის მოტყუება თუ ა.შ. ქურდობას არაფერი ამართლებს. ზოგიერთი ადამიანი ძალიან მიწიერად და პრიმიტიულად მსჯელობს. ფიქრობს, რომ მართალია, უკანონო გზით მოიპოვა გარკვეული თანხა, მაგრამ თუკი ამ ფულიდან მცირე ნაწილს უფალს შესწირავს, მაშინ ეს უსჯულოება თავისთავად, ავტომატურად იქნება გამოსყიდული. ეს ასე არაა, უფალს არაფერი სჭირდება, ყველაფერი ხომ მის ხელშია, ყოველივე მას ეკუთვნის. იგი უყურებს არა შემონაწირის რაოდენობას, არამედ იმას, თუ რა გულითაა შენაწირი. ხშირად მოგვისმენია ტელევიზიით ეკლესიის გაძარცვის შესახებ. ამაზე ამაზრზენი და საშინელი ცოდვა როგორ უნდა ჩაიდინოს ადამიანმა?! მსგავსი საქციელი კიდევ უფრო ამძიმებს ქურდობის ცოდვას. თუკი ქურდობა ცოდვაა, განუზომლად დიდ ცოდვას სჩადს ის, ვინც უფლის სახლს – ეკლესიას, მონასტერს ან ეკლესიასთან დაკავშირებულ დაწესებულებას ეხება. ამიტომ ასეთ ადამიანებს სრულებით არ უნდა ჰქონდეთ იმედი, რომ ამ მოპარული ფულით რაიმეს გააკეთებენ. ფულის მოპარვაა იმ შემთხვევაშიც, როცა მაღაზიაში გამყიდველი ზედმეტ ხურდას გადმოგაყოლებს და შენ უკან არ დაუბრუნებ მას. რაც შენი არ არის, ის არ უნდა აიღო. წმინდა მამები მიწაზე დაგდებული მუხუდოს ერთ მარცვალსაც კი არ ახლებდნენ ხელს: რაც შენ არ დაგიკარგავს, შენი არ არის! თუ რამე იპოვე, შეეცადე, დაუბრუნო დამკარგავს. სამწუხაროდ, დღევანდელობაში ქურდობის ცოდვას ფესვები ღრმად აქვს გადგმული. – როცა ადამიანი გაჭირვების გამო იპარავს, მასაც მძიმედ მოეკითხება ეს ცოდვა? – ეს მცირედმორწმუნეობის გამო ხდება. ქურდობით მატერიალურ პრობლემების გადაჭრას ცდილობენ, მაგრამ სერიოზულ სულიერ პრობლემებს იქმნიან, თანაც ვერც მატერიალურ პრობლემებს ჭრიან, იმიტომ, რომ ნაქურდალი არავის შეერგება. როცა ადამიანს უჭირს, იქნება ეს ხორციელი თუ სულიერი ავადმყოფობა, მატერიალური გაჭირვება, მისი მფარველი, პირველი შემწე არის უფალი. ღმერთი დახმარებას ადამიანების ხელით გვიგზავნის. შეიძლება ეს უნებურად ისეთმა ადამიანმაც კი გაგვიკეთოს, ვინც საერთოდ თავისი ბუნებით არ არის მიდრეკილი მოწყალებისაკენ. გაჭირვების გამო მოპარვა არ არის გამართლებული. ქურდობა ყველა შემთხვევაში ქურდობაა და უფლის მიერ მოცემული მცნების დარღვევად ითვლება. ყველა ადამიანს, თუკი ის არ არის ავადმყოფი, შრომა შეუძლია. უშრომელობა და სხვის ხარჯზე ცხოვრება იგივე ქურდობაა. როცა რაღაცას ვთაკილობთ ან გვეზარება და სხვის ხარჯზე ცხოვრებით გაგვაქვს თავი, ცოდვას ჩავდივართ. მშრომელს აქვს უფლება, ისარგებლოს კიდეც ნაშრომის ნაყოფით. ჯერ კიდევ სამოთხეში უბრძანა ღმერთმა კაცს შრომა და მისცა უფლება ქვეყანაზე, მაგრამ სახარება არ გვეუბნება, რომ მდიდრებმა მთელი თავისი ქონება უთუოდ ღარიბებს დაურიგონ ან სხვებს მისცენ. უპოვარება ყველასათვის არ არის სავალდებულო, არამედ მხოლოდ მისთვის, ვისაც შეუძლია შესრულება და დატევება ამ სათნოებისა ისევე, როგორც უბრძანა მაცხოვარმა მდიდარ ჭაბუკს: "უკეთუ გნებავს, რათა სრულ იყო, წარვედ, განჰყიდე მონაგები შენი და მიეც გლახაკთა და გაქნევდეს საუნჯე ცათა შინა" (მათე 19, 21). – რომელ ცოდვებს კრძალავს ეს მცნება? – ამ მცნებით აკრძალულია თავისთავად მოპარვა, სხვისი ნივთის მითვისება, გაძარცვა, მოტყუებით სხვისი საკუთრების მითვისება, სხვისი გასამრჯელოს მიღება მუქთახორობით, სხვისი მოწყალებით ცხოვრება, როცა შეუძლიათ მუშაობა. ეს მცნება კრძალავს მოპარვას, იგივე ელექტროენერგიის და ა.შ. ვალის გადაუხდელობა და მომიზეზება იმისა, რომ ფული ვერ შეაგროვეთ, ცოდვაა. მერვე მცნების საწინააღმდეგო ცოდვაა, როცა ადამიანებს ავალდებულებთ, საჩუქრები მოგართვან, ეს იქნება დაბადების დღე თუ სხვა დღესასწაული. მერვე მცნება კრძალავს აზარტულ თამაშებს. თუკი აზარტულ თამაშებს მისდევთ, აუცილებლად უნდა მოინანიოთ. ამ მცნების საწინააღმდეგო ცოდვებია ძუნწობა, ქრთამის აღება. მსგავსი ცოდვით ჩვენი ერი ძალიან არის დაზიანებული. უფალს ვევედროთ, რომ ამ მდგომარეობიდან გამოვიდეთ. – ამ მცნებით რა სათნოებები გვევალება? – უფალი გვავალებს უანგარობას, გულმოწყალებას, გლახაკთა და უძლურთა დახმარებას. აუცილებლად გვევალება გლახაკთა განკითხვა, ანუ მათი დახმარება, რადგან თუკი ადამიანს ამის საშუალება აქვს და არ იყენებს სწორად, ის ცოდვაში ვარდება. როცა ადამიანს შეუძლია სხვას დაეხმაროს, ეს აუცილებლად უნდა გააკეთოს, რადგან ყველაფერი, რაც გვაქვს, ღმერთს ეკუთვნის. სიმდიდრე, ღვთის განგებულებით, ღარიბთა დასახმარებლად გვეძლევა. ანა ნოდია | |
| კატეგორია: სტატიები | დაამატა: mamao (2012-01-16) | ავტორი: "სხვის ხარჯზე ცხოვრება იგივე ქურდობ | |
| ნანახია: 1300 | |
შესვლა საიტზე