იტვირთება...
| მთავარი » სტატიები » სტატიები |
| "ხუცური ანბანის თვალიერებაც კი ადამიანზე დადებითად მოქმედებს" ქრისტიანობა გვასწავლის, რომ ადამიანს აქვს სული და მასთან ერთად სამშვინველიც. ამ უკანასკნელის დანიშნულება ბევრისთვის გაურკვეველია. საეკლესიო მამების განმარტებით, სამშვინველი არის სწორედ ის იმპულსები და ინსტინქტები, რაც ადამიანებს გვახასიათებს. მისი დაკნინება სხეულის დაზიანებას იწვევს. სამშვინველს კი აკნინებს შური, ვნება და სხვა ცოდვები. როგორ უნდა მოვუფრთხილდეთ ან ვუმკურნალოთ მას, რომ ფიზიკური სხეულიც დავიცვათ, ამ თემაზე უფრო ვრცლად წმინდა იოანე ღვთისმეტყველის სახელობის წინამძღვარი, დეკანოზი მამა გიორგი (სხირტლაძე) გვესაუბრება.
– მამაო, მოძღვრები ხშირად ახსენებენ სულს, სამშვინველს და ხორცს. რა განსხვავებაა სულსა და სამშვინველს შორის? – ძალიან დიდი განსხვავებაა. სულიერი და სამშვინველისეული ძალები სხვადასხვანაირად ვლინდება ცხოვრებაში. სული, სამშვინველი, სხეული – ეს არის ის, რაც ღვთის შემეცნებისკენ მიემართება ღვთის საიდუმლოს გასაგებად; ეს არის ის, რაც ადამიანს ეხმარება იმავე ნივთიერებათა ცვლაში, გულის შეკუმშვაში. ჩვენ ხომ არ ვკუმშავთ გულს, თვითონ იკუმშება. ათას ბიოქიმიურ პროცესს ორგანიზმში სამშვინველისეული ძალები აწესრიგებს. – კიდევ რას აწესრიგებს? – სამშვინველისეულ ძალებთან არის დაკავშირებული ემოცია, ხელოვნების აღქმა, გარკვეული სექსუალური ინსტინქტები, ძილის თუ საკვების მიღების ინსტინქტები და ა.შ. – ამ ყველაფერს როგორ აწესრიგებს? – სხეული ითხოვს რაღაცას, მაგრამ სამშვინველი აწესრიგებს ამას, რადგან ის სულთან კავშირშია. სხეული კი არ იკვებება სამშვინველით და სამშვინველისგან – სული, არამედ პირიქით, სამშვინველი იკვებება სულით და სამშვინველისგან – სხეული. სული ზევით არის, მისგან უნდა იკვებებოდეს ყველაფერი და არა – პირიქით. გადმობრუნებული არ უნდა იყოს ადამიანი, სხეული არ უნდა დომინირებდეს და სული გაუბედურებული არ უნდა იყოს, რაც დღეს, სამწუხაროდ, ხშირად ხდება. დღეს სული ყველაზე ცოტა ადგილს იკავებს ჩვენს ცხოვრებაში, ვიდრე სხეული. ზოგს ჰგონია, აქ მოსული ვართ სულისა და სამშვინველის მოსაკვდინებლად და სხეულის გასაცოცხლებლად. არადა პირიქით არის. მოსული ვართ სხეულის მოსაკვდინებლად, ოღონდ არა – პირდაპირი მნიშვნელობით და გაგებით, რომ სხეულს რაღაც ზიანი მივაყენოთ. სხეულისთვისაც იბრძვის ქრისტიანობა. მთავარია, სხეულს არ ვავნოთ ისე, რომ სულიერი საკვები ვეღარ მივიღოთ. სულმა ღმრთისგან უნდა მიიღოს საზრდო, შემდეგ სამშვინველმა – სულისგან და სხეულმა – ამ ორივესგან. – რა ხდება მაშინ, თუ სული ცუდ მდგომარეობაშია? – თუ სულში გამრუდებაა, ეს აისახება სამშვინველზეც და შემდეგ – სხეულზეც ათასი ავადმყოფობის სახით. ღმერთს არაფერი ეშლება. როცა ადამიანი რაღაცით არის ავად, მაშინ მან რაღაც ცოდვა ჩაიდინა, რაც აირეკლა სულმა, გადმოვიდა სამშვინველში და გამომჟღავნდა სხეულში ავადმყოფობის სახით. ამიტომ სულს უნდა ვუმკურნალოთ. – რა კურნავს სულს? – ეკლესია, ზიარება. ამიტომ არის ნათქვამი, რომ ზიარებას იღებ სულისა და ხორცის საკურნებლად. ურწმუნო ხალხში სამშვინველისეული იმპულსები ანუ ინსტინქტები დომინირებს. ინსტინქტებით ცხოვრებაა მოდაში. ადამიანს ეუბნებიან, რომ ცხოველი გახდეს, მას მიემსგავსოს, ანუ გამრავლდეს, ჭამოს, სვას, თუ ღრიალი უნდა, იღრიალოს, თუ სექსუალური იმპულსები აქვს, გამოამჟღავნოს და ა.შ. ეს არის დღევანდელი საზოგადოების სტერეოტიპი – ადამიანი–მხეცი. ასეთი ცხოვრებით ადამიანები სამშვინველსაც აზიანებენ. ხმაური, კომპიუტერი, ბევრი ბეჭდვა, შური (სხვისი მანქანის, სახლის და ა.შ. მიმართ), ვნების წარმოშობა და ა.შ. აზიანებს სამშვინველისეულ ძალებს და შემდეგ აქედან მოდის გინება, ბილწსიტყვაობა და ა.შ. მერე წარმოიშობა ავადმყოფობები – იმუნიტეტის დაცემა... განსაკუთრებით ბავშვის სამშვინველია სუსტი. ადამიანი ცხოველურად ვერ იცხოვრებს. მის სამშვინველს, ცხოველისგან განსხვავებით, სხვა მოვალეობა აქვს (ცხოველსაც გააჩნია სამშვინველი და სხეული, ოღონდ, რა თქმა უნდა, სხვა ტიპის). რა მოვალეობა აქვს ადამიანის სამშვინველს? ის უნდა განიღმრთოს. მადლი მიიღოს, როგორც სულმა. სხეული ჩვენი მტერი არ არის. ეკლესია სხეულისთვისაც იბრძვის. სხეული შენი მეგობარი, შენი ჩოჩორია, რომელზეც ქრისტეა ამხედრებული. სამშვინველისეულ ძალებთან ხუმრობა არ შეიძლება, ანუ მათ უდიერად არ უნდა მოვეპყრათ. ხელოვნება კარგია, ოღონდ ქრისტიანული, მაგრამ თანამედროვე მუსიკა – მეტალი, როკი, მძიმე რეპი... სამშვინველს ძალიან აზიანებს. ეს არის დემონური გამოვლინებები, რაც სამშვინველს სპობს. იგივე ითქმის თამბაქოს მოწევაზე, ნარკოტიკებზე აღარაფერს ვამბობ, ის სულიერ ძალებსაც კი სწვდება. ნარკოტიკი, შედის როგორც რვაფეხა, როგორც ავთვისებიანი სიმსივნე და მსხვერპლად ეწირება ბოროტ სულს. თამბაქო კი მავნეა, მაგრამ ნარკოტიკთან ვერ მივა. როცა ადამიანი ნარკოტიკს ეწევა ან ინექციას იკეთებს და ტვინის უჯრედებს კლავს, მას სამშვინველი ხომ დაზიანებული აქვს, მაგრამ სულიერ ძალებსაც აზიანებს. ჯოჯოხეთს უხსნის გზას. ჯოჯოხეთის კარის გაღება არ შეიძლება. იმ წუთში ამოდის იქიდან დემონი. ეს ძალიან საშიშია! ერთი კი არა, შეიძლება ძალიან ბევრი ამოვიდეს და შევიდეს იმ ადამიანის სულში. იმიტომაც არის ამდენი შეპყრობილი. – ასეთივე მავნეა სულისთვის ალკოჰოლიც? – ალკოჰოლიზმიც ასეთია. ადამიანის სულს კლავს თითქმის იმ გაგებით, რომ მას მადლს უსპობს. გარდა ეკლესიისა, ამას ვერაფერი შველის. მრუშობა ასევე ანადგურებს სამშვინველს. ამ დროს ადამიანი სულიერად შიშველი რჩება, გადის მისგან ანგელოზი, ღმერთი და ბოროტისთვის ხელმისაწვდომი ხდება... სამშვინველი იმიტომ მოგვცა ღმერთმა, რომ მადლით ქრისტეს მივემსგავსოთ; რომ ჩვენი მთელი არსება იყოს სრული. ღვთის ხატება არის ჩადებული სამშვინველში. სამივე – სული, სხეული, სამშვინველი უნდა იყოს განღმრთობილი. – რა მოქმედებს სამშვინველზე კარგად? – ლოცვა და ზიარება გვმართებს. ამით იწმინდება სამშვინველი. სინანული წმენდს სამშვინველს. სხვათა შორის, ხუცური ანბანით კითხვა ამშვიდებს ძალიან და არ არის აუცილებელი, მაინცდამაინც მღვდელი ან დიაკონი იყოს ადამიანი, რომ ხუცური იცოდეს. ადამიანი ამ ანბანს ერთ კვირაში ისწავლის, თუ მოინდომებს. ყველას ვურჩევდი, რომ ხუცურად წაიკითხონ. ამ ანბანის უბრალო თვალიერებაც კი დადებითად მოქმედებს ადამიანზე. არ შეიძლება უაზრო ცნობისმოყვარეობა და ყველაფერში ცხვირის ჩაყოფა, ყველაფრის ჭამა, ყველაფრის გასინჯვა, ყველაფრის ყურება, ყველგან სიარული, ყველაფრის თავზე დასხმა, სუნამოდან დაწყებული სხვა საცხებით დამთავრებული. ვერ იტყვი, რა სუნამო არ უნდა დაისხა ან სად არ უნდა წახვიდე. ეს ადამიანმა თვითონ უნდა იგრძნოს. ზოგჯერ ვერ გრძნობს და ამიტომ არის საჭირო, მოძღვარს უსმინო. მანანა ნოდია | |
| კატეგორია: სტატიები | დაამატა: mamao (2012-10-13) | ავტორი: მამა გიორგი (სხირტლაძე) | |
| ნანახია: 1256 | |
შესვლა საიტზე