იტვირთება...
| მთავარი » სტატიები » სტატიები |
| "ღმერთს არ უყვარს ადამიანი, რომელიც რაიმეზე ხდება დამოკიდებული"
ალკოჰოლიზმი, იგივე მემთვრალეობა, ერთ–ერთი უმძიმესი და დამღუპველი ცოდვა, სულისა და სხეულის სნეულებაა, სადაც სამედიცინო ჩარევასთან ერთად ეკლესიის დახმარებაც აუცილებელია. ლოთი მხოლოდ საკუთარ თავს არ ვნებს, ის გარშემომყოფებსაც აბრკოლებს და ცოდვაში აგდებს. ამ თემაზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება. – მამაო, ბევრს არ ესმის, რატომ არის დათრობა ცოდვა, რადგან ეს მდგომარეობა ხომ რამდენიმე საათში გადის. თუკი ადამიანი ალკოჰოლით განწყობას გამოიკეთებს, ვის რას დაუშავებს? – ღმერთს არ უყვარს ადამიანი, რომელიც რაიმეზე ხდება დამოკიდებული, მიჯაჭვული. იგივე ითქმის აზარტულ გასართობ თამაშებზე, სიგარეტსა და ნარკოტიკზე. ლოთობა მხოლოდ ავადმყოფობა კი არა, ის არის ვნება, ცოდვილი სულის სნეულება. სულის განკურნება კი ჩვენი სულისა და ხორცის მხოლოდ ერთ მკურნალს, იესო ქრისტეს ძალუძს. თუკი ადამიანი საკუთარ თავს ამჩნევს ამ მიდრეკილებას, სწორედ უფალ იესო ქრისტეს უნდა მიმართოს და ეძებოს ის ეკლესიაში. ლოთი ადამიანი, პირველ რიგში, საკუთარ თავს ვნებს, ცოდვაში იგდებს თავს. მეორე მხრივ კი, ის გარშემომყოფებს აბრკოლებს. მემთვრალეობას სიბილწე და ყველა ცუდი საქმის ჩადენის სურვილი მოსდევს. ერთ მეგვიპტელ მეუდაბნოეს ეშმაკი დაპირდა, რომ აღარ შეაწუხებდა, თუკი იგი სამიდან ერთ–ერთ ცოდვას მაინც ჩაიდენდა. არჩევანი მკვლელობა, მრუშობა და სიმთვრალე იყო. ეშმაკმა უთხრა, ჩაიდინე რომელიმე ცოდვა: ან კაცი მოკალი, ან იმრუშე, ან დათვერი და ამის შემდეგ სიმშვიდეში იცხოვრე. მეუდაბნოეს კაცის მოკვლის შეეშინდა, რადგან ეს თავისთავად დიდი ცოდვაა, რომელიც საღმრთო სამართლითაც სიკვდილით ისჯება და სამოქალაქოთიც. მრუშობის შერცხვა, თქვა – სხეულის სისუფთავე რომ შეურაცხვყო ჯერ უცნობი სიბილწით, ცოდვაში ჩავვარდებიო. დათრობა კი თითქოს არ უნდა იყოს დიდი ცოდვა, რადგან მთვრალი გამოიძინებს და გამოფხიზლდება, დავთვრები, რომ ეშმაკმა აღარ შემაწუხოს და შემდეგ მშვიდად ვიცხოვრებ უდაბნოშიო, იფიქრა მეუდაბნოემ. მან წაიღო თავისი ხელსაქმე ქალაქში, გაყიდა და დუქანში შევიდა. იქ დათვრა. ეშმაკის მანქანებით მთვრალს ერთ ურცხვ მეძავთან მოუხდა ლაპარაკი, მოიხიბლა და დაეცა მასთან, ცოდვის ჩადენისას ქმარმა მოუსწრო მათ და ცოლის შეურაცხმყოფელს ცემა დაუწყო, მან კი ცემითვე უპასუხა, მოერია და მოკლა. ასე რომ, განდეგილმა დაიწყო სიმთვრალით, მერე კი იმრუშა და ბოლოს მოკლა კიდეც. სიფხიზლეში მას ამ ცოდვების ეშინოდა და ერიდებოდა, მთვრალმა კი ჩაიდინა და თავისი მრავალწლოვანი ღვაწლი წყალს გაატანა. მხოლოდ ჭეშმარიტი სინანულით შეძლო მან კვლავ მოეპოვებინა დაკარგული, რადგან სინანულით მოქცეულ ადამიანს ღმრთის გულმოწყალებით უბრუნდება ცოდვის გამო დაკარგული ადრინდელი დამსახურება. ჭეშმარიტებას ამბობს მოციქული: "მემთვრალეთა სასუფეველი ღმრთისაი ვერ დაიმკვიდრონ". – უკვე გალოთებულ ადამიანს შეუძლია საკუთარ თავს დაეხმაროს? – იმისათვის, რომ ცოდვით დაცემა აიცილოს თავიდან, ადამიანი ყოველივე იმას უნდა გაურბოდეს, რაც მასში ცოდვის ამ პროვოცირებას ახდენს. მაგალითად, თუკი ლოთს სურს, რომ სმას თავი დაანებოს, მაშინ მან ყველანაირად უნდა მოარიდოს თავი ისეთ ადგილს, სადაც სასმელია. აუცილებელია მცირეოდენი მონდომება და კეთილი განწყობა. ასეთ დროს კი სახიერი ღმერთი სირთულეების გადალახვაში დაგვეხმარება. ამას გვასწავლის მამა პაისი. ამიტომ, როცა ადამიანი ცდილობს გამოსწორდეს, რაღაც შეცვალოს ცხოვრებაში უკეთესობისაკენ, როცა საამისოდ ლოცულობს და იღწვის, უფალი მას აუცილებლად შეისმენს და დაეხმარება სიკეთით. მაგრამ, როგორ მიანიჭებს უფალი მადლს იმ ადამიანს, რომელიც თავად არ ცდილობს, რომ შეიცვალოს და ცოდვის აღსრულებას განაგრძობს? – ამ შემთხვევაში როგორ უყურებთ მედიცინის ჩარევას, რომ ადამიანები განიკურნონ? – გარდა იმისა, რომ რელიგია და ეკლესია ყველა ადამიანს სულიერად ეხმარება, ურჩევს, ლოცულობს მასზე, არსებობს მედიცინის დახმარებაც, რაც ადამიანს ფიზიკურად აჯანსაღებს. ეკლესია მედიცინას არ უარყოფს, პირიქით. მედიკამენტებით მკურნალობის ზოგიერთი მეთოდი ალკოჰოლზე ფიზიოლოგიური დამოკიდებულების მოხსნასა და ორგანიზმის ტოქსინებისგან განწმენდაში ეხმარება. თუმცა, თუკი ადამიანი სულიერად არ განიწმინდა, თუკი მისი გული არ იქნა განწმენდილი, თუკი ადამიანის სურვილი არ არის, ღვთის გზას დაადგეს, მაშინ მხოლოდ მედიცინა უძლურია, რადგან ადამიანის სული, რომელსაც არ აქვს ეკლესიასთან ურთიერთობა, ძველ მდგომარეობაში რჩება, დამონებულია ცოდვილ ლტოლვას და შედეგად ადრე თუ გვიან ყველაფერი თავიდან იწყება. სწორედ ამ შემთხვევაში, აუცილებელია ეკლესიის, მოძღვრის, სულიერი მამის დახმარება. არაეკლესიური მცდელობები, რომ მოსპონ ალკოჰოლზე ფსიქოლოგიური დამოკიდებულება, იმოქმედონ სულზე – არის ან ზედაპირული, ან ოკულტური. ეკლესიის დახმარება აუცილებელია. კი, შეიძლება ადამიანმა დაანებებოს თავი სასმელს, ამის შედეგად გამოჯანსაღდეს კიდეც, მაგრამ დაიღუპოს მისი სული, თუკი მას არ დაეხმარება ეკლესია და მოძღვარი. ლოთობის ვნება ქრება, მაგრამ მის ადგილზე რჩება უარესი, რომელიც სრულიადაც არ ჰგავს ლოთობას – ადამიანში ან ეშმაკეული სიბოროტე, ადამიანების სიძულვილი, ან ამპარტავნება იბუდებს. – მამაო, განქორწინებას ეკლესია არ ემხრობა და წყვილს აკურთხებს მარად ერთად ყოფნისთვის, მაგრამ თუკი მეუღლე ლოთობს და ამ ვნებისგან თავის დაღწევა არ სურს, როგორ მოიქცეს მეორე მეუღლე, მასთან ერთად გაუბედურდეს? – გეთანხმებით, რომ უფლის მიერ ნაკურთხი ოჯახი, განსაკუთრებული შემთხვევის გარდა, არ უნდა დაინგრეს. ამას უნდა ეცადოს წყვილიდან ორივე, ცოლიც და ქმარიც. ამ შემთხვევაში ლოთობა ან მეუღლის სხვა ნაკლი ქრისტიანისათვის აღიქმება, როგორც მისი სატარებელი ჯვარი, რადგან მისი მიზეზი შეიძლება იყოს ცოლი, რომელიც თავისი საქციელით უბიძგებს ქმარს ამ ავადმყოფური მიდრეკილებისაკენ. ჯვრის დაწერის დროს ერთმანეთს აძლევენ სიყვარულის პირობას, არამარტო ცხოვრების ნათელ პერიოდებსა და ბედნიერების წუთებში, არამედ იღებენ იმ პასუხისმგებლობას, რომ არ მიატოვებენ მეუღლეს ავადმყოფობისა და გაჭირვების ჟამს. ადამიანებს მოეთხოვებათ ლოცვითი შემწეობა მეუღლისათვის. განქორწინება ნამდვილად იოლი გამოსავალია საკუთარი ჯვრისაგან თავდასახსნელად. ამ ნაბიჯით შესაძლოა სავალალო შედეგები გამოვიწვიოთ. პირიქით, ასეთ დროს მეუღლეს გვერდში უნდა დავუდგეთ. ინტენსიურად ვიაროთ ეკლესიაში, აღსარება ჩავაბაროთ, ვეზიაროთ, მოძღვრისგან რჩევები მივიღოთ. ქმარს გვერდში უნდა დავუდგეთ, როგორც შეგვეძლება. ალკოჰოლიზმი ავადმყოფობა და საშინელი ბოროტებაა, რომელიც ერთნაირად ნთქავს ყველას – კაცსაც, ქალსაც. თავიდან ისინი, ვინც სასმელს მიეძალა, კიდევ შეიძლება შეჩერდნენ, თავი შეიკავონ ცდუნებისაგან, მაგრამ დროთა განმავლობაში ეს უფრო და უფრო ძნელდება. საბოლოო ანგარიშით, ვითარდება დაავადება, რომელიც ერთიანად სპობს ადამიანის ხორცს და სულს. სამწუხაროდ, ადამიანები ღვინოში ახრჩობენ წარუმატებლობას, გაუზიარებელ სიყვარულს, ოჯახურ უსიამოვნებას და სხვადასხვა სირთულეებს. ლოთობის მიზეზი შეიძლება იყოს საკუთარ თავში იმედგაცრუება, მეგობრის ღალატი. ზოგი ამ გზით სტრესული დაძაბულობისა და ცხოვრების მაღალი ტემპის შენელებას ცდილობს. ადამიანი, რომელიც პრობლემების, სირთულეებისა და მწუხარებისგან ამგვარ, ვითომ თავშესაფარს მიმართავს, ცხოვრებას იწყებს არარეალურ, ილუზორულ სამყაროში. ამასთან, მისი პრობლემები კი არ წყდება, არამედ მრავალჯერ იზრდება. სასმელი გამარჯვება კი არ არის, ეს არის მარცხი. ლოთობა არის გზა ჩიხისაკენ, სულიერი და ხორციელი დაღუპვისაკენ. ანა ნოდია | |
| კატეგორია: სტატიები | დაამატა: mamao (2012-02-04) | ავტორი: მამა გიორგი (სხირტლაძე) | |
| ნანახია: 1379 | |
შესვლა საიტზე