იტვირთება...
| მთავარი » სტატიები » სტატიები |
| მაგია არაფერია, თუ არა სიცრუეზე აღმოცენებული მოძრაობა
ადამიანთა გარკვეული ნაწილი ექსტრასენსებთან სამკურნალოდ დადის. როგორია ეკლესიის დამოკიდებულება ამის შესახებ, გვესაუბრება წმიდა იოანე ღმრთისმეტყველის სახელობის ტაძრის მოძღვარი, დეკანოზი გიორგი (სხირტლაძე).
– მამა გიორგი, რას ნიშნავს ექსტრასენსორია და ეკლესიას როგორი დამოკიდებულება აქვს მის მიმართ? – ექსტრასენსორია ზემგრძნობელობას ნიშნავს, ანუ ექსტრასენსი არის ადამიანი, რომელიც პრეტენზიას აცხადებს, რომ აქვს იმის შეგრძნება, რასაც ვერ გრძნობს ორდინალური, ჩვეულებრივი ადამიანი 5 გრძნობით. მას ზემგრძნობელობა ახასიათებს. აქვს მე–6, 7 და ა.შ გრძნობა. ეს გრძნობადობა მათთვის გამოიხატება პიროვნების სულიერ ენერგეტიკისა და მასში მიმდინარე პროცესების, ასევე, მისი შინაგანი ორგანოების მდგომარეობის ხილვაში, ადამიანის წარსულის, აწმყოსა და მომავალი ცხოვრების ჭვრეტაში და სხვა. რასაკვირველია, ეს ყველაფერი არსებობს, მაგრამ მხოლოდ ღმრთის დაშვებით და ისიც წმიდა ცხოვრების შემთხვევაში. ადამიანებს, როგორებიც იყვნენ წმიდა ქსენია პეტერბურგელი, სერაფიმ საროველი, სერგი რადონეჟელი, შიო მღვიმელი, გაბრიელ ბერი და სხვები, ჰქონდათ ზეგრძნობადი ხედვა, რაც მათ ბრძნულ დარიგებებსა და კურნებებში გამოიხატებოდა. ამის უნარი მათ ღმრთისგან ჰქონდათ ბოძებული, ეს გახლდათ მათი წმინდა მოღვაწეობის, ეკლესიურ ცხოვრებაში მაქსიმალური თანამონაწილეობის შედეგი და არა მაგიური ტექნოლოგიებით და მედიტაციებით მიღებული მაგიურ–ეზოთერული ცოდნა, რომელიც ადამიანის სხეულზე, სულსა და სამშვინველზე ძალადობის ხასიათს ატარებს. აქედან გამომდინარე, შეუძლებელია, რომ ექსტრასენსორია მოქცეული იყოს ღმრთის ქმედების ქვეშ. ექსტრასენსორია არის ადამიანთათვის დაცემული სულების მიერ მიცემული ძალაუფლება, რომელიც მათ საშუალებას აძლევს, პიროვნებებზე უარყოფითად იმოქმედონ. ადამიანისთვის მინიჭებული რაიმე ძალაუფლება, თუ ის წმიდანობის ხარისხით არ არის დაჯილდოებული, უარყოფითად ზემოქმედებს, ანუ შეიძლება მისმა ქმედებებმა განკურნოს პატარა რამ, მაგრამ დამართოს უფრო დიდი სნეულება, მცირე მსხვერპლის შეწირვის ხარჯზე, შეიძლება უარესი დესტრუქცია შეიტანოს ორგანიზმში. ამიტომ ზეგრძნობადი რეალობის ფარდის ხელოვნური ახდა ღმრთისგან კურთხეული არ არის. ეს ენერგიები ჩვენთვის საჭირო რომ იყოს, ცხადი და თვალნათელი გახდებოდა. არსებობდნენ რჩეული ადამიანები, რომლებსაც ღმრთისგან კურნების განსაკუთრებული კურთხევა ჰქონდათ. სხვადასხვა წმიდანები – წმიდა გრიგოლ ხანძთელი, შუშანიკი, ქეთევან დედოფალი. ისინი სიცოცხლის განმავლობაში ახდენდნენ სასწაულებს და მიწიერი ცხოვრების დასრულების შემდეგაც, მათი სხეულის წმიდა, მირონმდინარე, სურნელოვანი ნაწილები ნებისმიერ ექსტრასენსზე უფრო ძლიერ განწმენდასა და კურნებას ახდენდნენ ადამიანებზე. ასე რომ, ეკლესია, ლოცვით და წმიდანების სახით, ნებისმიერ ექსტრასენსზე უფრო მეტ კურნებისა და განწმენდის შედეგს იძლევა. – თუმცა, მათაც აქვთ ხატების კუთხე, სანთელი, ნაკურთხი წყალი. – მაგიისა და ეზოთერიზმისთვის დამახასიათებელია სინკრეტიზმი, დაუნაწევრებლობა. ქრისტიანული სომბოლიკა დასავლური მაგიის კულტებშიც უხვადაა გამოყენებული. ერთ–ერთი მაგიური ქმედების თილისმად მაცხოვრის ხატიც კი არის გამოყენებული. ჯვარი, ღმრთის სახელები, რომლებიც ჯერ კიდევ ძველ აღთქმაში საკრალურ ხასიათს ატარებდა, დღეს მაგიური და კაბალისტური ქმედებების წყაროდ იქცა. ის, რაც თავის დროზე, ღმრთის მიერ ჩვენთვის მოცემული განღმრთობის საშუალება იყო, დღეს მაგიაში უარყოფით ქმედებებში გამოიყენება. მაგრამ თუ ჯვარი შავი მაგიის ქმედებებში გამოიყენება, ეს არ ნიშნავს იმას, რომ ის მნიშვნელობას კარგავს. ადამიანები, რომლებიც სიბოროტეს არიან შეჩვეულნი, მათ შეუძლიათ ნებისმიერი საგანი, სიწმინდე, სიმბოლიკა გამოიყენონ თავიანთი ბოროტი მიზნების აღსასრულებლად. იერემია წინასწარმეტყველი ამბობს, წყეული იყოს ის, ვინც ღმრთის საქმეს ბოროტად იყენებსო. რაც ჭეშმარიტად კარგია, ყველაფერი ღმრთისგან არის და რაც უარყოფითია, ბოროტისგან არის. ამავე დროს, რაც კარგად გვეჩვენება, ყველაფერი ღმრთისგან არ არის და რაც ბოროტებად გვეჩვენება, ის ყველაფერი ეშმაკისგანაც არ არის. – ზოგჯერ მათ მიერ მართლაც აღესრულება კურნებები და წინასწარმეტყველებებიც სრულდება. – თუკი ჩვენ, მასაჟების სახით, გვამის რეანიმაციას შევეცდებით, შეიძლება, ელექტრო–მაგნიტური ველის ზემოქმედებით, გვამს გარკვეული მოძრაობაც კი ვაიძულოთ, ხელი ან ფეხი გავამოძრავებინოთ, მაგრამ ეს არ ნიშნავს, რომ გვამი გაცოცხლდა. ასევე, თუკი ადამიანს ექსტრასენსების მეშვეობით, მოჩვენებითი უკეთესობა მიეცა, არ ნიშნავს იმას, რომ იგი სრულიად განიკურნა და იგივენაირი კურნება მიიღო, რა კურნებასაც მიიღებდა საეკლესიო საიდუმლოებებში მონაწილეობის შედეგად. ადამიანის სულიერ ცხოვრებაში ნებისმიერი ექსტრასენსორულ–მაგიური ჩარევა გვამის რეანიმაციას ჰგავს, რაც რეალურად შეუძლებელია. არამარტო ქრისტიანული ეკლესიის ტრადიციებში, არამედ ნებისმიერ არაქრისტიანულ ტრადიციაშიც კი ექსტრასენსორია, მაგია, მისნობა და სხვა, უარყოფითი და ჯადოქრული დატვირთვის მქონე გამოვლინებად აღიქმებოდა. – რამდენად მძიმე ცოდვაა მათი ქმედება–მოღვაწეობა? – ეს არის მომაკვდინებელი ცოდვა, რომელიც სჯულის კანონით, 20 წლით უზიარებლობას გულისხმობს, რადგან მკვლელობის ცოდვას უტოლდება. ადამიანებმა, რომლებმაც დიდი ხანია ზნეობას გადაუხვიეს და ქრისტიანული ცხოვრების ჩარჩოებიდან გამოვიდნენ, ეს ცოდნა სულიერ გარყვნილებასთან დააკავშირეს და ჯადოქრობა და გრძნეულება შემატეს. ასეთ მაგიურ ქმედებებსა და ცრუ სასწაულებს ადამიანები ადრეც აღასრულებდნენ. მაგალითად, წმიდა კვიპრიანე ეპისკოპოსი, ვიდრე ის მოექცეოდა, კურნებებს ასრულებდა. ასევე კვინოპ გრძნეულს, რომელიც იოანე ღმრთისმეტყველს ებრძოდა, უამრავი ცრუ სასწაულები და კურნებები ჰქონდა მოხდენილი და სადაც ის ცხოვრობდა, იმ კუნძულის ხალხი დიდ პატივსა და თაყვანს სცემდა, როგორც დიდ მკურნალს და გრძნეულს. ასევე, სვიმონ მოგვი, რომელიც მეფე ჰეროდეს პირადი გურუ–მოძღვარიც გახლდათ, კედლებშიც გადიოდა და ჰაერშიც დაფრინავდა და სწორედ ჰაერში ფრენის დროს, პეტრე მოციქულის ლოცვით იქნა ჩამოგდებული, რის შემდეგაც დაიმტვრა და გარდაიცვალა. იგი უამრავ ცრუ სასწაულებს, მათ შორის, კურნებებსაც აღასრულებდა. საკვირველი ის კი არ არის, ჩვენ ამ საკითხს რომ ვარჩევთ და ვიკვლევთ, კარგია თუ ცუდი, საკვირველი ის არის, რომ ეს საკითხი კიდევ ისმება. იმდენად დიდი ხანია, რაც ეკლესიამ ექსტრასენსორია დაგმო და უარყო, რომ დღეს ამის სიკარგე–სიცუდის საკითხი არც უნდა დგებოდეს. მაგრამ დღეს, როდესაც ადამიანებს ცრუ ფასეულობები გამოეცალათ, ძველმა სიცრუემ ახალი სიცრუე დაბადა, რადგან არ შეიძლება ადამიანებმა, რომლებიც გუშინ სიცრუეს თესავდნენ, დღეს სიკეთე დათესონ. მაგია არაფერია, თუ არა სიცრუეზე აღმოცენებული მოძრაობა. – რას ეტყვით იმ ადამიანებს, ვისაც ექსტრასენსების სჯერათ? – ქრისტიანის სამი თვისება, კეთილსინდისიერება, ღმრთისმოშიშება და მართლმადიდებლური სარწმუნოებით განათლება არის ის სამი წყარო, რომლებიც შეიძლება ამ დინებას დაუპისრისპირდეს. ვისაც მათი სჯერა, ვურჩევ, რომ ირწმუნონ ქრისტე. რადგან მათი ურწმუნოება უცოდინარობითაა გამოწვეულია, ვურჩევდი, რომ მართლმადიდებლურ სარწმუნოებაში მეტი ცოდნა შეიძინონ. ადამიანები, რომლებიც ფუნდამენტალურ, მართლმადიდებლური ეკლესიის ცოდნას მოკლებულნი არიან, უხვად ეწაფებიან ამ ცრუ ცოდნას, რომელიც მათში დროებით განცვიფრებას ბადებს. აქედან გამომდინარე, ისინი ისეთივე ცდუნების წინაშე დგებიან, როგორი ცდუნების წინაშეც ერთ დროს ადამი და ევა იდგნენ. ადამიანს გონება იმისთვის აქვს მიცემული, რომ ერთმანეთისგან განასხვაოს სიკეთე და ბოროტება, ნებისყოფა კი – იმის შესარჩევად, თუ რომელი მიიღოს. ადამიანში ყველა პირობაა იმისთვის, რომ აირჩიოს რა სურს, სიცოცხლე თუ სიკვდილი. ადამიანმა მართლმადიდებლურ ეკლესიაში უნდა გაიდგას ფესვები. ადამიანებს ვუსურვებ, რომ მართლმადიდებლური სარწმუნოების, ცნობიერების სისავსეს მიაღწიონ და მიიღონ ნათელი ქრისტესი, რითაც ისინი დაცულნი იქნებიან ყოვლისაგან ბოროტისა. | |
| კატეგორია: სტატიები | დაამატა: mamao (2012-02-24) | ავტორი: დეკანოზი გიორგი (სხირტლაძე) | |
| ნანახია: 1533 | |
შესვლა საიტზე