იტვირთება...
| მთავარი » სტატიები » სტატიები |
| "ეჭვი ღვთის არსებობისადმი ბინდავს ადამიანის გულსა და გონებას"
წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) "სარკის" მკითხველებს უფლის ათ მცნებას განუმარტავს, რომელთაგან თითოეულს რიგრიგობით მომდევნო ნომრებში შემოგთავაზებთ. პირველი მცნება გვასწავლის – "მე ვარ უფალი ღმერთი შენი და არა იყვნენ შენდა ღმერთნი უცხონი ჩემსა გარეშე", რაც ნიშნავს იმას, რომ ადამიანმა უნდა დაიწყოს ღვთის შემეცნება, ძებნა და ერთგულება ჭეშმარიტი სარწმუნოების. სამწუხაროდ, ამ მცნებას ადამიანები ნებსით თუ უნებლიეთ ხშირად ვარღვევთ.
მამა გიორგი: – პირველი მცნება საფუძველს წარმოადგენს დანარჩენი მცნებებისათვის. ის მოითხოვს, რომ ჩვენ გვწამდეს, გვიყვარდეს და თაყვანს ვცემდეთ ჭეშმარიტ ღმერთს. ამ მცნების გარეშე შეუძლებელია კაცმა ღვთისათვის სათნო კეთილი საქმენი მოიმოქმედოს. პირველი მცნებით ღმერთი გვიბრძანებს, ვიცნოთ და პატივი ვცეთ მას, გვწამდეს ღმერთი, იმედი გვქონდეს მისი, გვიყვარდეს და ვემორჩილებოდეთ მის ნებას, თაყვანი ვცეთ, ვადიდოთ იგი, ვმადლობდეთ მას, ყოველი კაცის წინაშე ვაღიაროთ იგი ჩვენს ღმერთად და არ უარვყოთ. ადამიანი შექმნილია იმისათვის, რათა ყველაზე და ყველაფერზე მეტად უყვარდეს უფალი და, ამასთან, იგი უნდა უყვარდეს უმაღლესი სიყვარულით. როცა მთელი შენი გული, მთელი შენი სული, მთელი ფიქრები ღვთისადმი იქნება მიძღვნილი, მაშინ ყოველი შენი სურვილი კეთილი იქნება, ყოველი ზრახვა – შეურყვნელი, ყოველი მსჯელობა – წმინდა. ღვთის ყველა მცნება, აღთქმა, ბრძანება, რჩევა, გამომდინარეობს სიყვარულიდან, როგორც წყალი მოედინება წყაროდან. სიყვარული არის ღვთის მცნებათა დედა. გიყვარდეს ღმერთი, მოყვასი და კეთილი საქმის დაწყებისას ვერავითარი განსაცდელი ვერ მოგერევა. უფალს სურს, შეიყვარო იგი, რადგან მის სიყვარულშია შენი ბედნიერება, შენი ქვეყნიური კეთილდღეობა, სიმშვიდე სულისა, სიხარული და მარადიული ნეტარება. ყოველი კეთილი საქმე მხოლოდ მაშინ იქნება ღვთისათვის მოსაწონი, როცა ის გამთბარია სიყვარულით, რომელიც მოდის ჩვენი სულის სიღრმიდან. ღმერთს სურს, რომ გიყვარდეს იგი მთელი შენი გულით, მთელი შენი სულით, მთელი შენი აზროვნებით. – რომელია პირველი მცნების საწინააღმდეგო ცოდვა? – მორწმუნემ უნდა იცოდეს, რომ არის ერთი ღმერთი, რომ მისი უფალი ჭეშმარიტია და ერთადერთი ღმერთი ის არის. უფალ იესო ქრისტეს გარეშე სხვა ღმერთის აღიარება პირველი მცნების დარღვევაა. ბუნებრივია, რომ სამყარო, ყოველივე ხილული თუ უხილავი, ერთი უფლის მიერ არის შექმნილი. ხშირად ადამიანები ამას ივიწყებდნენ და მრავალღმერთიანობას ქადაგებდნენ. სამწუხაროდ, ზოგჯერ ეს ახლაც მეორდება. ამ მცნების საწინააღმდეგო ცოდვა მრავალია, რომელსაც წმინდა მამებიც გვასწავლიან. ესენია: უღმერთობა, ანუ ათეიზმი, როცა უგუნური კაცი კითხულობს: "რა არის ღმერთი?". ასევე მრავალღმერთიანობა, როცა ცრუღმერთებს აღიარებ და კერპს სცემ თაყვანს, ცოდვაში ხარ. ამ მცნებას ეწინააღმდეგება მწვალებლობა და განდგომილება. ასევეა მკითხაობა, ცრუმორწმუნეობა, სასოწარკვეთილება. დღეს, როგორც არასდროს, ეს მცნება დარღვეულია. ეჭვი ღვთის არსებობისადმი, სულის უკვდავებისადმი ბინდავს ადამიანის გულსა და გონებას. ზოგიერთნი მისდევენ მისნობას, ჯადოქრობას, ხშირია მწვალებლობა, მკრეხელობა მღვდლისადმი, ეკლესიის სიწმინდისა და წმინდა საიდუმლოებებისადმი: ნათლისღების, აღსარების, ზიარების და სხვა. ხშირია გულგატეხილობა და სასოწარკვეთილება, რადგან ადამიანები ღვთის ნაცვლად იმედს ამყარებენ მათზე, რომელნიც არიან ძლიერნი ამასოფლისანი, ანდა საკუთარ მაღალ თანამდებობასა და სიმდიდრეზე. თუ ჭეშმარიტი ღვთის თაყვანისმცემელი ხარ, მისი მოძღვრება მთელი სისავსით უნდა აღიქვა და დაემორჩილო, ვინაიდან რელიგიაში არ შეიძლება რაღაც ნაწილის მიღება და დანარჩენის უკუგდება. არ შეიძლება, ზოგი მივიღოთ, დანარჩენი უარვყოთ. ზოგჯერ ადამიანი სხვადასხვა რელიგიიდან, ფილოსოფიური მიმდინარეობებიდან ამოკრებს მისთვის მისაღებ მორალურ ნორმებს, ინტელექტუალურ თეორიებს, სხვადასხვა აზრებს და ქმნის თავის პირად სარწმუნოებას, მსოფლმხედველობას, რომელიც მხოლოდ მისთვის ან ადამიანთა ჯგუფისთვის არის მისაღები. ეს არ გახლავთ ჭეშმარიტება, არც ღვთის ერთგულება და ღვთის შეცნობა. – რას ნიშნავს ღვთის შეცნობა? – პირველი მცნებით ღმერთი საკუთარ თავზე მიუთითებს და, მაშასადამე, ადამიანს ღვთის შეცნობას უბრძანებს. ქრისტიანებმა უნდა ვეძიოთ ღვთის შეცნობა, რაც უმნიშვნელოვანესია ყველა ცოდნათა შორის. ბეჯითად ვისმინოთ ეკლესიაში სწავლანი ღვთისა და მისი საქმეების შესახებ. საჭიროა ისეთი წიგნების კითხვა ან მოსმენა, რომლებიც ღვთის შეცნობას გვასწავლიან – წმინდა წერილი, წმინდა მამათა ნაწერები. როცა ადამიანი ეძებს, აუცილებლად პოულობს. ღმერთი ხედავს არა მხოლოდ საქმეებს, არამედ ჩვენს ყველაზე დაფარულ ფიქრებსაც. იმისათვის, რომ შევიცნოთ უფალი, აუცილებელია, ვიკითხოთ სახარება, წმინდა მამათა შრომები, უნდა ვიაროთ და ვილოცოთ ეკლესიაში; შევისწავლოთ ღვთის ქმნილება – ბუნება და კაცთა მოდგმის ისტორია; შევისწავლოთ ჩვენი სულიერი სამყარო. მაშინ ვიგრძნობთ მას ყოვლითა გულითა, ყოვლითა სულითა, ყოვლითა გონებითა და ყოვლითა ძალითა ჩვენითა. უფლის ათივე მცნება უმნიშვნელოვანესია. თუმცა პირველი მცნება მარადიულია და დღესაც ისევე აქტუალურია, როგორც მაშინ, როცა მოსე წინასწარმეტყველს მიეცა. სწორედ ჩვენი უფალია ჭეშმარიტი ღმერთი, სწორედ ის არის ერთადერთი და არა – უცხო ღმერთები, რომლებსაც არც უნდა ვემონებოდეთ და არც ვუჯერებდეთ. სხვაგვარად არ ვიქნებით არც ჭეშმარიტი ქრისტიანები და არც ჭეშმარიტი მორწმუნეები. | |
| კატეგორია: სტატიები | დაამატა: mamao (2012-02-04) | ავტორი: მამა გიორგი სხირტლაძე | |
| ნანახია: 857 | |
შესვლა საიტზე