იტვირთება...
| მთავარი » სტატიები » სტატიები |
| "არ არის სამყაროში ადგილი უფლის გარეშე"
არსებობს თუ არა ღმერთი? პასუხი მარტივია, შევხედოთ სამყაროს, ღვთის ხატად და მსგავსად შექმნილ ადამიანებს. ღმერთი არსებობს და ჩვენ უნდა ვეძიოთ იგი. ადამიანის მოვალეობაც ეს არის, რომ მან გამუდმებით ეძიოს უფალი ჩვენი მაცხოვარი და მასთან ერთად იაროს, რომ არ დაიღუპოს. ადამიანი ღმერთზე დამოკიდებული არსებაა და მისი შეწევნით აღწევს ყველა წარმატებას და სიკეთეს. ამ თემაზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება.
– მამა გიორგი, ზოგადად ადამიანებს სწამთ ღმერთი და ცდილობენ შეასრულონ მისი მცნებები, კანონები, თუმცა ძალიან ბევრ მათგანს აინტერესებს მიუწვდომლის ჩაწვდომა. როგორია ღმერთი, რა ვიცით, რომ მართლა არსებობს, ვის უნახავს ის? – ადამიანის ცხოვრება ღმერთის ძიების პროცესია. ამ გზაზე ადამიანი ზოგჯერ უახლოვდება ღმერთს, ზოგჯერ – შორდება. ადამიანი ცდილობს ზოგჯერ დაინახოს ღმერთი, შეიგრძნოს მისი არსებობა, მაგრამ ურწმუნოების გამო ხშირად ამას ვერ ახერხებს. ჩვენ არ უნდა ვცდილობდეთ ზედმეტად ჩავიხედოთ უფლის საიდუმლოებებში. უბრალოდ უნდა ვირწმუნოთ ღმერთი, რადგან უფალი ცხოვრებას და ნეტარებას მხოლოდ იმას ჰპირდება, ვინც უხილავად ირწმუნებს. სწამს თუ არ სწამს ადამიანს, ღმერთი მაინც არსებობს. გვჯერა თუ არა ჩვენ ამის, მაინც არსებობს მზე, მთვარე, ვარსკვლავები, მთლიანად სამყარო. ჩვენი აზრი ვერაფერს ცვლის და ღმერთის არსებობაში დაურწმუნებლობით მხოლოდ ჩვენი სასოება და ჩვენი სული კნინდება. არ არის სამყაროში ადგილი უფლის გარეშე. გადით ქუჩაში – ხეებს, ყვავილებს, ფრინველებს, ცას ახედეთ. წვიმა მოვა, ქარი დაუბერავს, დაღამდება თუ გათენდება – ყველაფერში ღვთის ხელია. ჩვენ გარშემო ღმერთი სუნთქავს, იგი ყველგან იმყოფება. რაოდენ ბედნიერია ადამიანი, რომელსაც ამ ყველაფრის აღქმა შეუძლია. "ითხოვეთ და მოგეცემათ" – ჩვენ უნდა ვითხოვოთ, რომ მოგვეცეს სიკეთე და მადლი. უნდა ვითხოვოთ ყოველ დღე, ყოველ საათში, საქმის დაწყების წინ და დამთავრების შემდეგ, გამუდმებით უნდა ვევედროთ უფალს. ჩვენ უმძიმეს დროში ვცხოვრობთ. ჩვენი ცხოვრება განსაცდელებით არის სავსე, ამიტომ ხშირად უნდა გადავიწეროთ პირჯვარი და წარმოვთქვათ იესოს ლოცვა. ადამიანს გაუჭირდება მარტო სიარული, ღმერთის გარეშე ის დაიღუპება, ამიტომ მუდამ ღმერთის ძიებაში ვიყოთ, მისი დახმარების იმედი გვქონდეს, რადგან უფალთან სიარული ადვილია. რაოდენ დაბრმავებულია ადამიანის თვალი, რომელიც ვერ ხედავს ქრისტეს. როგორ შეიძლება, არ დაინახო მაცხოვარი ყველგან, ზეცაში, ხეში, ვარსკვლავებში?! ღმერთი ყველგან არის. იესო ქრისტე არის ყველა მონათლულ, ნაზიარებ ადამიანში. – არის ადამიანთა კატეგორია, რომლებიც უღმერთოდ, ამქვეყნიურ ცხოვრებაში კარგად არიან. მათ არ სწამთ ღმერთი, მაგრამ აქვთ ყველაფერი. რით აიხსნება ეს? – ადამიანი ისეთი არსებაა, რომ რწმენის გარეშე მისი ცხოვრება შეუძლებელია. ცოტათი ჯიუტია, ცოტათი ჟინიანი, აწუხებს გარკვეული სურვილები, მიზნები, მაგრამ ადამიანი არ არის დამოუკიდებელი არსება. მას არ შეუძლია არსებობა ღმერთის გარეშე. ხეს არ შეუძლია არსებობა წყლის გარეშე, გახმება და მოსაჭრელი გახდება, რადგან ვერ გამოიღებს ნაყოფს. ასევეა ადამიანიც, იგი გახმება. შეიძლება ის ხორციელად განაგრძობდეს არსებობას, მაგრამ მისი სული ექვემდებარება კვდომას. მადლს მოკლებული სული თითქმის მკვდარია. ჩვენ ჩვენს თავს ვერ ვაცხონებთ, მაცხოვნებელი ძალა აქვს სულიწმინდას. ზოგი ტრაბახობს სიმდიდრით, ზოგი – ძალაუფლებით, მაგრამ ვის შეუძლია ადამიანს სიცოცხლე მისცეს, მკვდარი გააცოცხლოს? ეს შეუძლია სულიწმინდას. ჩვენ არ უნდა ვიფიქროთ იმაზე, როგორები ვიყავით გუშინ ან როგორები ვიქნებით ხვალ, არც ხვალეზე და არც გუშინდელზე არანაირი ძალაუფლება არ გაგვაჩნია. ჩვენთვის, უბრალო მოკვდავთათვის, არსებობს ერთადერთი ძალაუფლება, რომელიც მხოლოდ ჩვენს წარსულს ეხება და ეს ძალაუფლება არის აღსარების მეშვეობით. სწორედ აღსარებით შეგვიძლია ჩვენი ცხოვრების წიგნიდან ამოვშალოთ ცოდვილი "ჩანაწერები". რაც შეეხება მომავალს, მასზე არავითარი ძალაუფლება არ გაგვაჩნია და მთლიანად ღვთის ნებაზე ვართ დამოკიდებული. თუ დღეს ცოდვილი ხარ, უნანელი, ამისთვის აუცილებლად მოგეკითხება, მიუხედავად იმისა, რომ შეიძლება წარსულში სათნო, მართალი იყავი და ქრისტიანული წესით ცხოვრობდი. ამიტომ წუთისოფელში ნეტარება არაფერს ნიშნავს მარადიულ ნეტარებასთან შედარებით. იმ ადამიანთა სულები, რომლებიც დედამიწაზე კარგად ცხოვრობენ უფლის გარეშე, ეშმაკის ხელშია და მის ნების მატარებლები არიან, თუმცა არც მათ აქვთ თუნდაც ამ ცხოვრებაში მუდმივი სიმშვიდე. – თუმცა ადამიანი ისეა შექმნილი, რომ ამქვეყნიური ნეტარებისკენაც აქვს მისწრაფება, გარდა იმისა, რომ სურს მარადიული სასუფევლის დამკვიდრება. – ადამიანი გაჭირვებაში იხსენებს ღმერთს. არ იქნება კარგი, თუ ყველაფერი მოგეცა და ღმერთი დაივიწყე. უფალი თავადვე არ დაუშვებს ამას. იგი იმდენს არ მოგცემს, რომ ღმერთი დაივიწყო, დაგმო, შენი თავიც დაიღუპო და სხვაც. ნურავინ იფიქრებს, თითქოს ღმერთს რაღაც აკლია ან ენანება, ძუნწია, ან იმდენი არ აქვს, რომ გვეყოს. არა, ღმერთს ყველაფერი აქვს. მისი საოცარი სიმდიდრე ყველასთვის საკმარისია, მეტიც არის. თუ არ გვაძლევს, ეს იმიტომ, რომ უფალი მეტს გვიმზადებს მომავალში. ცოტა ხნით მოიცადე, მაინცდამაინც ამქვეყნად ცხოვრების ორმოცდაათ, სამოცდაათ ან ოთხმოც წელიწადში გინდა მიიღო ყველაფერი? დაიცადე, ამის შემდეგ ხომ მარადიულობაა, იქნებ რას გიმზადებს ღმერთი! "მართალი გაბრწყინდება, ვითარცა მზე". უფალს უნდა ვთხოვოთ სასუფეველი ცათა და არა – საჭმელი. ეს ყველაფერი თავისთავად მოვა. უფალი გვაძლევს ყველაფერს, რაც ჩვენთვის საჭიროა, რაც ჩვენი გადარჩენისთვის არის და არა – ჩვენი განებივრებისთვის. ყოველი დღე ღვთის არსებობის დამადასტურებელია, ყოველი დღე ნაჩუქარია უფლისაგან. მან მოგვცა სამყარო თავისი კაცთმოყვარებით, სანაცვლოდ არაფერი მოუთხოვია. ჩვენ ყოველ წუთს ვგრძნობთ, რომ უფალი არსებობს. ჩვილი, ხელში რომ უჭირავს დედას, გრძნობს რომ ვიღაცას უყვარს, ვიღაცა ეფერება, ზრუნავს მასზე. ასევე არის ჩვილ მდგომარეობაში მყოფი სულიც, რომელიც სარწმუნოებაში სვლას იწყებს. იგი ვერ ხედავს თავის პატრონს, უფალს, მაგრამ უთუოდ აცნობიერებს, შინაგანად მაინც, რომ მასზე ვიღაცა ზრუნავს. თუნდაც აქტიური, ნამდვილი რწმენა არ ჰქონდეს ადამიანს, თუ ასეთი ბავშვური რწმენა მაინც ექნება, მას დაიფარავს ღმერთი, რომელმაც მოიყვანა ამქვეყანაზე. როდესაც ბავშვს რაიმე შეეშლება, ცუდად დაწერს, მასწავლებელი გაუსწორებს. ღმერთიც გვისწორებს შეცდომებს. არ უნდა ჩავიჭრათ, რომ არ წარვწყმდეთ, საღვთო "მართლწერის" გამოცდა უნდა ჩავაბაროთ. თუ რაღაც შეგვეშალა, სასურველია, ამოვშალოთ საშლელით – აღსარებით, სინანულით. ჩვენი ცხოვრება კეთილი ჩანაწერებისგან უნდა შედგებოდეს, რათა იგი სათნოეყოს უფალს. ანა ნოდია | |
| კატეგორია: სტატიები | დაამატა: mamao (2012-02-08) | ავტორი: მამა გიორგი (სხირტლაძე) | |
| ნანახია: 1247 | |
შესვლა საიტზე