იტვირთება...
| მთავარი » სტატიები » სტატიები |
| მამა გიორგი: "უფალი ყოველივეს აძლევს საზრდოს, ვინც მას უხმობს!"
ადამიანი ხშირად ფიქრობს,Öრა არის ღმერთი, როდის ან როგორ შეიქმნა სამყარო, რატომ არის ღმერთი სიყვარული, ესმის თუ არა მას ჩვენი ფიქრები... მსგავს კითხვებზე ეკლესიის პასუხი საკმაოდ მოკლე და გამოკვეთილია – ვისაც უნდა გაიგოს და განსაზღვროს, რა არის უფალი, იგი ემსგავსება იმას, ვისაც ბრმა გონებით სურს გაზომოს ზღვაში ქვიშა. ამ თემაზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება.
– მამაო, შეგვიძლია თუ არა ადამიანებს შევიცნოთ უფალი ან საერთოდ რამდენად გვჭირდება ეს? – ღვთის არსი შეუცნობელია. წმინდა წერილში არსებობს ადგილები, სადაც ლაპარაკი არის თითქოსდა უფლის ღვთაებრივ თვისებებზე, მაგალითად, "მე ვარ, რომელი ვარ", "ღმერთი არის ნათელი", "ღმერთი არს სიყვარული", "ღმერთი სული არს" და ა.შ. ყველა ამგვარი მტკიცება წმინდა წერილისა გამოხატავს მხოლოდ იმას, თუ როგორ ეცხადება უფალი სამყაროს, ქვეყნიერებას. მაგალითად, როცა ადამიანი შეიმეცნებს უფალს, როგორც სიცოცხლისა და ყოფიერების წყაროს, მას უწოდებს ყოფიერებისა და სიცოცხლის არსს. ადამიანი შეიმეცნებს რა, რომ ღმერთი უსხეულოა და დამოუკიდებელია სივრცისგან, დროისგან, მაშინ მას უწოდებს სულს. ქმედებებში შეიმეცნებს მას, როგორც სიყვარულს, მშვიდობას, ნათელს, ძალას, სიბრძნეს და ა.შ., შესაბამისად უწოდებს მას ამ სახელებს, მაგრამ არც ერთი ცალკე აღებული სახელი ღვთისა და არც მათი ჯამი ერთად ვერ გამოხატავს ღვთაებრივი ცხოვრების მთელ სიმდიდრეს. ყველა სახელი, რომლებსაც ვამბობთ ჩვენ ღმერთზე, გვიჩვენებს არა მის არსს, არამედ იმას, რაც თან ახლავს ამ არსს. წმინდა იოანე კიბისაღმწერელი ამბობს, რომ ღმერთი არის სიყვარული და ვისაც უნდა გაიგოს და განსაზღვროს, რა არის უფალი, იგი ემსგავსება იმას, ვისაც ბრმა გონებით სურს, გაზომოს ზღვაში ქვიშა. – მამაო, ხანდახან ადამიანებს უჩნდებათ კითხვა, თუნდაც ეჭვი, იცის თუ არა უფალმა ჩვენი ფიქრები, აღწევს თუ არა ღმერთამდე ჩვენი ვედრება... – უფალი ყოვლისმცოდნეა, უფალი მარადიულ ცოდნას ფლობს ყოველივე არსებულისა. "საქმე მოციქულთა"–ში ნათქვამია: "უკუნისამდე ღვთისათვის ცნობილია ყოველი მისი საქმე". უფალი არ საჭიროებს შესწავლას არსებული საგნებისა, მან უწყის სამყარო, თავისი განგებულებით; მან იცის ყოველი ადამიანის ცალკეული ნაბიჯები; აღწევს ყოველი ადამიანის გულის სიღრმეებში; უწყის ყოველი ადამიანის ზრახვანი; უფალმა ყოველივე იცის ადამიანის შესახებ და ისიც იცის, რა წარმოიშვება მისი გულის სიღრმეებში. "უფლისათვის თანასწორად არის ცნობილი აწმყოც, წარსულიცა და მომავალიც. ღმერთმა წინასწარ იცის ყოველივე – კეთილიცა და ბოროტიც, რაც უნდა მოხდეს, მაგრამ წინასწარ არ განსაზღვრავს გონიერი არსებების ქმედების ხაზს", – ამბობს წმინდა იოანე დამასკელი. უფალმა ყოველივე უწყის და ჭვრეტს, რაც იმყოფება ჩვენი ძალაუფლების ქვეშ. ღმერთი არ განაპირობებს ადამიანის, გონიერი არსებების ქმედებებს. ღვთაებრივი წინასწარხედვა არ ბოჭავს ჩვენს თავისუფალ ნებას. მაგალითად, ჩვენი ახლობლების თავისუფალი ნება არ ირღვევა იმის გამო, რომ ჩვენ ხანდახან წინასწარ ვხვდებით მათ საქციელს. უფალმა წინასწარ განსაზღვრა, რომ ჩვენ გვეცხოვრა და გვესარგებლა თავისუფალი ნებით. ასევე ჩვენთვის სათნოებანი და სიკეთე მოცემული არის ღვთის მიერ ჩვენს ბუნებასთან ერთად. ღვთის შეწევნის გარეშე შეუძლებელია ვაკეთოთ სიკეთე. ჩვენ ღმერთი არც სიკეთის კეთებას გვაიძულებს და არც ბოროტებისას, ეს ადამიანის თავისუფალ ნებაზეა დამოკიდებული. ღმერთმა ყველა ადამიანის ცხოვრების გზა წინასწარ უწყის, მაგრამ მას აძლევს თავისუფალ ნებას და არჩევანს. – რას ნიშნავს სიტყვები: "წმინდა", "წმინდანი", "სიწმინდე"... – თავიდან ებრაელებში სიტყვა "წმინდა" აღნიშნავდა გამოცალკევებულს, ცალკე მყოფს. ამ გაგებით, ისრაელი – ღვთისაგან რჩეული ერი – წარმართებისაგან იყო გამორჩეული, გამოცალკევებული. ასევე შაბათ დღეზე არის ნათქვამი, რომ დღე მეშვიდე თქვენთან უნდა იყოს წმინდა, ე.ი. გამოცალკევებული, გამოყოფილი ღვთისათვის კვირის სხვა დღეებისგან. რა თქმა უნდა, სიტყვას "წმინდა" ბიბლიაში სხვა მნიშვნელობებიც აქვს. სიწმინდე განსაკუთრებული თვისებაა ღვთისა. ამიტომ "წმინდა წერილში" ღმერთი ხშირად იწოდება სიტყვით "წმინდა". წმინდანებს ვუწოდებთ მათ, ვინც გახდნენ ღვთაებრივი მადლის თანაზიარნი და კურთხეულნი. წმინდა არის ყოველივე, რაც გამოდის ღვთისაგან ან ემსახურება უფალს. წმინდა არის სახელი მისი, მისი სიტყვა, მისი კანონი, მისი გზა, მისი ტახტი, მისი ტაძარი, მისი ფეხების კვარცხლბეკი. წმინდა არიან მოციქულები, წინასწარმტყველები, ანგელოზები მისნი და ა.შ. სიწმინდე და ნათელი – ეს ორი ცნება ღვთის შესახებ ერთმანეთთან ახლოს დგას. არის რა უფალი სიწმინდე, ითხოვს სიწმინდეს იმათგანაც, ვისაც სურს მასთან, უფალთან ურთიერთობა: "წმინდანნი იყავით, რამეთუ წმინდა ვარ მე უფალი, ღმერთი თქვენი". მორწმუნეებმა უნდა განამტკიცონ თავიანთი გული უბიწოდ, რამეთუ უწმინდურება ვერ შევა სასუფეველში. უფლის სიწმინდეზე ნათქვამია, რომ ღმერთი არის ნათელი და არავითარი სიბნელე არ არის მასში. ღმერთი იწოდება ნათლად თავისი ენერგიების მიხედვით. ზოგიერთი წმინდა მამა მიწიერ ცხოვრებაშიც კი ღირსი ხდებოდა ღვთაებრივი ნათელის ხილვისა. "მართალნი გაბრწყინდებიან, როგორც მზე თავიანთი მამის სასუფეველში". – რას ნიშნავს "ღმერთი სიყვარული არს"? – "ღმერთი სიყვარული არს" – ეს მოკლე გამონათქვამი არის ქრისტიანული სწავლების საფუძველი. გრიგოლ ღვთისმეტყველი ამბობს, რომ ჩვენ თუკი ვინმე შეგვეკითხება, თუ რას ვცემთ თაყვანს, ჩვენ მას ვეტყვით, რომ თაყვანს ვცემთ სიყვარულსო. ღვთის სიყვარული არის გამოუკვლეველი, უძირო უფსკრული. გამოუთქმელმა წყალობამ და სიყვარულმა შეაქმნევინა უფალს ეს სამყარო. ამ სამყაროს კი უბოძა თავისუფალი, გონიერი არსებები – ადამიანები. ადამიანი არის შექმნილი ღვთის ხატად და მსგავსად, რომელიც შეიძლება მიემსგავსოს ღმერთს, მადლით განიღმრთოს. ღვთაებრივი სიყვარული განივრცობა მთელ სამყაროზე, ყოველივეზე, რაც ცოცხლობს. უფალი აცოცხლებს ყოველივეს, აგზავნის წვიმას დედამიწაზე, ზრდის ბალახს, რათა ჭამონ ცხოველებმა და ფრინველებმა, ყოველივეს აძლევს საზრდოს, ვინც მას უხმობს. სიყვარული ყოველ ნიჭზე მაღლა დგას, სიყვარულის გარეშე ფასი არაფერს აქვს. სარწმუნოება, სასოება, წინასწარმეტყველებები და ცოდნა მარადიულობაში გადადის, სიყვარული კი არასოდეს მთავრდება. ღმერთის სიყვარული მარადიული, დაუსრულებელია. მორწმუნე ადამიანშიც სიყვარული სხვადასხვა დოზით არის. უნდა ითქვას, რომ ვერავინ ავა უმაღლეს საფეხურზე სიყვარულისა, თუ არ განმიწმინდება ვნებებისაგან სინანულით და არ იცხოვრებს ღვთის მცნებებით. ვერავინ მიაღწევს სიყვარულს ღვთის შიშის გარეშე. ღმერთი მარადის არის სიყვარული. ანა ნოდია, ჟურნალი სარკე N 26 | |
| კატეგორია: სტატიები | დაამატა: mamao (2012-02-04) | ავტორი: მამა გიორგი სხირტლაძე | |
| ნანახია: 928 | |
შესვლა საიტზე