იტვირთება...
| მთავარი » სტატიები » სტატიები |
| მამა გიორგი: "ლოცვა უნაყოფო არასოდეს არ არის"
წმიდა მართლმადიდებელი ეკლესია დედამიწაზე ადამიანთა სულების გადასარჩენად არის დაფუძნებელი და ყოველ მორწმუნეს დახმარების ხელს უწვდის მარადიული ცხოვრების მოპოვების გზაზე. როგორც სულიერი მამები გვასწავლიან, ეკლესიის ტრაპეზიდან აღვლენილ ლოცვას უდიდესი ძალა აქვს ქრისტიანთათვის. ამ საკითხის შესახებ, წმიდა იოანე ღმრთისმეტყველის სახელობის ტაძრის მოძღვარი, დეკანოზი გიორგი (სხირტლაძე) გვესაუბრა.
– მამა გიორგი, როგორც ვიცით, მართლმადიდებელი ეკლესია ლოცულობს ადამიანთათვის, ცოცხლებისა და მიცვალებულთათვის. მათი უშუალო მოხსენიება წირვის დროს, კვეთაში ხდება. რამდენად მნიშვნელოვანია საეკლესიო მსახურების დროს ადამიანთა სახელების მოხსენიება? – წირვა–ლოცვა ეს არის ერთი დიდი მოხსენიება უფლის წმიდა საქმეებისა, მაგრამ ლიტურგიაზე ჩვენ ვიხსენებთ ცოცხლებსაც და მიცვალებულებსაც. ეს ხდება სეფისკვერებზე კვეთის დროს, ანუ პროსკომიდიაზე. პროსკომიდია არის წირვის ნაწილი, როდესაც დიდი ჯვრის გამოსახულებიანი სეფისკვერიდან სრულდება ტარიგის ამოღება ჯერ უფლის სახელზე, შემდეგ, ყოვლადწმიდა ღმრთისმშობლისა და ანგელოზთა ცხრა დასის სახელზე. ამის შემდეგ უკვე, ცოცხალთა და მიცვალებულთა სახელებზე ხდება ნაწილების ამოკვეთა. სპეციალურ მოსახსენებელში, ან ფურცელზე დაწერილ სახელებს, სეფისკვერთან ერთად, მორწმუნეები საკურთხეველში წირვის წინა დღეს, ან წირვის დროს აგზავნიან. მოძღვარი კვეთაში, მათგან მცირე–მცირე ნაწილებს ამოიღებს იმ ადამიანთა სახელებზე, ვის სახელზეც სეფისკვერი არის შემოგზავნილი, დაასვენებს ფეშხუმზე, შემდეგ კი მოხდება ბარძიმში, ქრისტეს წმიდა სისხლში ჩასვენდება. ვისაც კვეთის დროს მოიხსენებს მოძღვარი, უფალი მათ, მფარველი ანგელოზის მეშვეობით, ლოცვით შეწევნას და მადლს უგზავნის. ცოცხლებს – მიწიერ, ხოლო მიცვალებულებს საიქიო ცხოვრებაში შეეწევათ. მოხსენიება სხვა არაფერია, თუ არა ლოცვა ადამიანის სახელის გამოთქმით, ხსენებით. როგორც უკვე აღვნიშნე, ადამიანთა მოხსენიება ხდება კვეთაში, კვერექსსა და ბარძიმში. სამივე შემთხვევაში მოხსენიება, როგორც ცოცხალ ადამიანზე, ასევე მიცვალებულთა სულზე, დადებით ზეგავლენას ახდებს. ეს მომენტი იმ წმიდანის შეწევნას იწვევს, რომელსაც ვიხსენებთ, ასევე მფარველ ანგელოზს უხარია. ამ სახით ადამიანთა მოხსენიება არის ძლიერი ლოცვითი შეწევნა. კვეთაში მოხსენიება ადამიანს პირდაპირ გზას უხსნის, წარმატებას, წინსვლას ანიჭებს იმისთვის, რომ გარკვეული მადლი მიიღოს. მიცვალებულს კი შეეწევა და მათი სულები უკეთეს მდგომარეობაში გადაყავს. – მიცვალებულთა მოხსენიება კიდევ როდის არის შესაძლებელი? – არსებობს მიცვალებულთა მოსახსენებელი სპეციალური დღეები, როდესაც განსაკუთრებული მსახურება აღესრულება მიცვალებულთა კვერექსებისა და სხვა საკითხავების ფონზე. მიცვალებულთა სახელზე არსებობს შეკვეთილი წირვები. გარდა ამისა, არსებობს მოწყალების ფორმა – შენაწირი, სანთელი, საკმეველი, ზეთი, ღვინო, რომელიც შეიწირება მიცვალებულთა სახელზე და იმქვეყნად მიდის არა როგორც პროდუქტი და ნივთი, არამედ, როგორც მოწყალება და ნათელი. – საკურთხეველში შესაგზავნ მოსახსენებელში ვისი სახელების ჩაწერა შეგვიძლია? – პირველ რიგში, უნდა მოვიხსენიოთ ჩვენი პატრიარქი, სულიერი მოძღვარი, ბიოლოგიური მშობლები, დედმამიშვილები, ნათლია–ნათლულები, მაგრამ ამავე დროს, აუცილებლად უნდა მოვიხსენოთ მოძულენი და მაჭირვებელნი ჩვენნი. რათა ისინი მოიქცნენ და უკეთესები გახდნენ. – ძალიან ძნელია ლოცვა ჩვენი მოძულეებისა და მაჭირვებლებისთვის. – ქრისტიანული თვალსაზრისით, ყველაზე დიდი სულიერებაა მოიხსენიო შენი მტრები და ილოცო მათთვის. თუ მონათლულებია, შეგიძლია, მათ სახელზე სეფისკვერიც შეაგზავნო. – საეკლესიო მსახურების დროს ვისი მოხსენიება იკრძალება? – საეკლესიო მსახურებაში არ შეიძლება მოხსენიება თვითმკვლელების, მოუნათლავებისა და არამართლმადიდებლების. ისინი მხოლოდ პირად ლოცვებში შეგვიძლია მოვიხსენოთ, 2–3–ჯერ და არა დაჟინებულად. – ბოლოს, რას ეტყვით მკითხველს? – მკითხველს ვუსურვებ, რომ ამ მარხვაში განსაკუთრებული ყურადღება მიაქციონ ცოდვების მონანიებას, ჯანმრთელობისთვის ლოცვას, რათა აღდგომას სულიერი ძალებით აღვსილნი შევხვდეთ და არა გამოფიტულნი. მარხვა ეს არ არის შიმშილი და მხოლოდ და მხოლოდ უჭმელობა. მარხვა, პირველ რიგში, ლოცვა და სინანულია. მარხვა ის დამხმარე საშუალებაა, რომელიც ადამიანს შესაძლებლობას აძლევს, უფრო წარმატებით მოიგონოს და გაიხსენოს განსაცდელში, სნეულებაში, ქვრივობასა თუ ობლობაში მყოფი მოყვასი. გაუნაწილოს მათ თავისი სამარხვო საჭმელი. ეფემია წიკლაური | |
| კატეგორია: სტატიები | დაამატა: mamao (2012-02-15) | |
| ნანახია: 2064 | |
შესვლა საიტზე