იტვირთება...
| მთავარი » სტატიები » სტატიები |
| ყოვლადწმინდა სამების დოგმატი – ქრისტიანობის უდიდესი საიდუმლო
მოძღვართან ჩვენი დღევანდელი სასაუბრო თემა შეეხება ყოვლადწმინდა სამების დოგმატს. ქრისტიანობა ერთ, მაგრამ სამგვამოვან ღმერთს აღიარებს – მამას, ძეს და სულიწმინდას. ღმერთის შემეცნება – ეს არის ის მარადიული საკითხი, რომელსაც ქრისტიანი ადამიანი მთელი ცხოვრების მანძილზე ცდილობს, მაგრამ სრულყოფას ვერასოდეს აღწევს. რა თვისებები აქვს ღმერთს? ამ და სხვა საკითხებზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება.
– მამა გიორგი, შეიძლება თუ არა, რომ ღმერთის თვისებები იცოდეს მორწმუნემ, არის რაიმე ცნობილი ამის შესახებ? – ვიცით, რომ ღმერთი ერთია. ღმერთის ერთობის შესახებ ლაპარაკი თავისთავად ზედმეტია, რადგან რომ ვთქვათ, არსებობს ორი სრულყოფილი არსება, ორი ღმერთი, არ შეიძლება. ორი სრულყოფილი არსება ერთმანეთს შეზღუდავდა. ღმერთი არის ერთი, ეს კარგად უნდა ვიცოდეთ. ღვთის არსებობის დამადასტურებელი უამრავი ხილული და უხილავი მოწმობა არსებობს. ეს მოწმობებიც უნდა ვიცოდეთ. აუცილებელია ვიცოდეთ, წმინდა მამები და ეკლესიის მასწავლებლები რას ამბობენ ამის შესახებ. რა თვისებები აქვს ღმერთს? პირველ რიგში, იგი არის სული, მარადიული, ყოველნეტარი, ყოვლადთვითკმარი, ე.ი. მას არაფერი სჭირდება. ღმერთი რომ სულია, ამის დამადასტურებელი ნიშნები წმინდა წერილიდანაც არის. იგი არის თვითმყოფადი. შეიძლება ეს სამყარო არ ყოფილიყო, მაგრამ ყოვლადწმინდა სამება ყოვლადწმინდა სამებად დარჩებოდა. ღმერთი არის ყოვლისმცოდნე. ყველაფერი იცის უფალმა. ის არის უმაღლესი სიბრძნე. ღვთის ნების თვისებაა უმაღლესი თავისუფლება, რადგან აბსოლუტურად დამოუკიდებელი არსებაა. ჩვენც გვაქვს თავისუფლება, მაგრამ დამოკიდებული არსებები ვართ. ადამიანის სულიც უკვდავია, ღვთის ხატად და მსგავსად არის შექმნილი, მაგრამ მისი უკვდავებაც ღმერთზე დამოკიდებული უკვდავებაა. უფალი უსასრულოდ კეთილი და უსასრულოდ მოწყალეა. ყოველთვის მართალია მისი ნება. – ღმერთი ერთია, მაგრამ სამგვამოვანი – მამა, ძე და სულიწმინდა. ადამიანის გონებისთვის ეს რთული აღსაქმელია, შეუძლებელიც. ამის შესახებ გვესაუბრეთ. – ზოგი ორი სიტყვით ამბობს დოგმატს ყოვლადწმინდა სამების შესახებ: "მწამს მამა, ძე და სულიწმინდა. მამა უშობელია, ძე იშობა, სულიწმინდა მამისაგან გამოვალს". ეს ყველა მორწმუნემ უნდა იცოდეს, მაგრამ არის უფრო მეტის ცოდნა საჭირო. ყოვლადწმინდა სამების დოგმატი უმაღლესი გამოცხადებაა, რადგან არც კაცმა, არც ვინმე მკვლევარმა, არც ვინმე წმინდანმა, არამედ თვითონ უფალმა მოგვცა. მონოთეისტური, ანუ ერთღმერთიანი რელიგიები თითქოსდა იუდაიზმიცაა და მუსლიმანობაც, მაგრამ ქრისტიანობაში ღმერთის სამ ერთობაზეა ლაპარაკი. ე.ი. სამი ღმერთი კი არ გვწამს, ერთი გვწამს. ერთია, მაგრამ სამგვამოვანი. თურმე რიცხვი 3 ღვთის არსებაში იდუმალად დევს და მის შინაგან ცხოვრებაზე მიგვითითებს. მივედით იქამდე, რომ ღმერთი ერთია არსით, მაგრამ ჰიპოსტასით – სამი, სამგვამოვანი. საერთოდ სამების დოგმატი ნაწილობრივ შემეცნებადია, ბოლომდე კი ადამიანის გონებისათვის შეუცნობადია. ადამიანის გონება ამას ევრ იტევს. ადამიანის გონება ამას ნაწილობრივ აღიქვამს და ნაწილობრივ, როგორც წმინდა მამა ამბობს, ჯვარად ექცევა ხოლმე. წმინდა გრიგოლ ღვთისმეტყველი ამბობს, როდესაც ვახსენებ ღმერთს, ვგულისხმობ მამას, ძეს და სულიწმინდასო, რადგან რიცხვობრივ–რაოდენობად კი არ ვყოფ ღვთაებას, რათა სიმრავლე არ შევიტანო მასში, ასევე არც ვაღარიბებ და არ ვვარდები იუდაიზმშიო. არათუ ადამიანი, ანგელოზებიც ბოლომდე ვერ იგებენ განკაცების დოგმატს, გამოხსნის დოგმატს. უმაღლესი ანგელოზებიც ვერ იგებენ ამას, როგორ შეიძლებოდა ღმერთი განკაცებულიყო, კაცად დაბადებულიყო. ესეც შეუცნობადია, მაგრამ ყველაზე უფრო ძნელად გასაგები ყოვლადწმინდა სამების დოგმატია. ქრისტიანობის უდიდესი საიდუმლო არის დოგმატი ყოვლადწმინდა სამების შესახებ – ერთ ღმერთში როგორ არის სამი ჰიპოსტასი. ამ დოგმატზე, როგორც წმინდა მამები აღნიშნავენ, უამრავი ერეტიკოსი იტეხდა კისერს, რომლებიც ცდილობდნენ აღეწერათ და გაეგოთ ყოვლადწმინდა სამების დოგმატი, სარწმუნოების ეს დიდი ჭეშმარიტება, თავიანთი გონებრივი ინტელექტუალური მცდელობებით და სპეკულაციებით შეეღწიათ ამ დოგმატის გაგებაში. ჩვენ განსაკუთრებით მკაცრად გვმართებს, მივენდოთ ეკლესიის სწავლებას, რომელიც იცავს და ინახავს ამ დოგმატს ყოველგვარი ერეტიკული მოსაზრებისაგან. – სამყაროს შექმნაში სამივე ჰიპოსტასი – მამა, ძე და სულიწმინდა – იღებდა მონაწილეობას? – ღმერთმა შექმნა სამყარო არარაისაგან. ღმერთმა ეს სამყარო შექმნა ისტორიულ დროში. ფაქტობრივად დროც ღვთის ქმნილებაა. იყო ჟამი, როცა დრო არ იყო. თანამედროვე ფიზიკაში დრო მეოთხე განზომილებაა. სამყაროს შექმნაში მონაწილეობდა სამივე ჰიპოსტასი: მამა, ძე და სულიწმინდა. შემდეგ ვუახლოვდებით ადამიანის შესახებ სწავლებას. ადამიანი მცირე შესაქმეა, მცირე სამყარო. ადამიანი შეიქმნა, როგორც გვირგვინი ქვეყნიერებისა. ზოგს ვერ გაუცნობიერებია ღმერთის ერთობა. მუსლიმანიც გვეუბნება: "მეც ერთი ღმერთი მწამს". იუდეველიც ამასვე ამბობს ან ამდაგვარს, მაგრამ სამება არ სწამთ. პირველ რიგში, ჩვენ უნდა ვთქვათ, რომ ვართ ერთღმერთიანები, მონოთეისტები – მამის, ძის და სულიწმინდის მადიდებელნი. ეკლესიის სწავლება – "მრწამსი" იწყება "მრწამს ერთი ღმერთი"–თ. ეს ყოველთვის იყო და არის მთავარი დოგმატი. ეს არის ღვთის მიერ მოცემული სარწმუნოების, ჭეშმარიტი რელიგიის – ქრისტიანობის განსხვავება წარმართული რელიგიებისგან, რომლებიც ქადაგებენ მრავალღმერთიანობას. მონოთეისტები კი, რომლებიც აღიარებენ ერთ ღმერთს, მაგრამ სამებას გმობენ, ფაქტობრივად ძველ აღთქმაში იგდებენ თავს. ისინი არ აღიარებენ ღვთის გამოცხადებას. ეს დოგმატი მართლმადიდებელი ეკლესიისა გვიცავს ბოროტებისაგან და სხვა წარმართული სწავლებებისაგან. დამამტკიცებელი საბუთი იმისა, რომ ღმერთი ერთია, მრავლადაა მოცემული წმინდა წერილში. გონებრივადაც რომ მივუდგეთ, ლოგიკურია ერთი ღმერთის არსებობა. ყოვლის საწყისი ერთი უნდა იყოს და ერთია. დიდი მეცნიერებიდან დაწყებული დიდი მოაზროვნებით დამთავრებული, ყველა ამას აღიარებს. წარმართებს, როლებიც უამრავ ღვთაებას ევედრებიან, მაგალითად, კეთილდღეობის ღვთაებას, წარმატების ღვთაებას და სხვას, ერთიანი სასოება არ აქვთ. როგორ ექნებათ სასოება ერთი ღმერთის შესახებ, როცა ჭეშმარიტ ღმერთზე წარმოდგენა არ აქვთ?! აქედან გამომდინარე, ვერც იმედი აქვთ ცხონებისა, რადგან ჩვენ ერთ ღმერთზე ვამყარებთ იმედს და სასოებას, რომელიც გადაგვარჩენს. ამ ერთ ღმერთს აქვს თვისებები. ზოგადად ღმერთის არსების თვისებები იყო უსასრულობა, თვითმყოფადობა, დამოუკიდებლობა, განუზომელობა და ყოველგან მყოფობა. შემდეგ მოდის ღმერთის ყოვლისშემძლეობა, მან ყველაფერი იცის. არ შეიძლება თქვა, რომ მე ვიცი ღმერთი, როგორც ვიცი საკუთარი თავიო. ეს აბსურდია. მარტო ღმერთმა იცის საკუთარი თავი მთელი სისავსით. ღმერთს სიბრძნესაც ეძახიან. არ შეიძლება, რომ ღმერთის ნებამ რაიმე ბოროტება ან ცოდვა ჩაიდინოს. მისი ნება ჭეშმარიტია, მტკიცე და მართალი. ანა ნოდია | |
| კატეგორია: სტატიები | დაამატა: mamao (2012-02-15) | |
| ნანახია: 1881 | |
შესვლა საიტზე