იტვირთება...
| მთავარი » სტატიები » სტატიები |
| ჯვრისწერისთვის მშობლების კურთხევა აუცილებელია
ვაგრძელებთ წინა ნომერში დაწყებულ საუბარს მოძღვართან მშობლებისა და შვილების ურთიერთობაზე, ერთმანეთის პატივისცემასა და უფლებებზე. როგორც ითქვა, მშობელი უპირატესია, თუმცა მშობელმა არ უნდა განარისხოს შვილი. დღეს ვისაუბრებთ მშობლის წყევლაზე, შვილის მიერ მშობელზე აუგის თქმაზე და იმ სხვა საკითხებზე, რაც ეკლესიურად განმარტებული უნდა იყოს, რათა არც მშობელი და არც შვილი არ ჩავარდეს ნებსით თუ უნებლიე ცოდვაში. ამ თემაზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება.
– მამაო, წინა ნომერში ჩვენთან საუბარში აღნიშნეთ, რომ მშობლის უხეში ჩარევა შვილის არჩევანში არ არის მიზანშეწონილი. ეს ეხებოდა საკითხებს შვილის პროფესიულ არჩევანზე, ცხოვრების გზის გაგრძელებაზე და ა.შ. ასევე მნიშვნელოვანი საკითხია სიყვარული და ქორწინება. ხშირად მშობლები უხეშად ერევიან შვილის არჩევანში, უკრძალავენ, ემუქრებიან და ა.შ. შეიძლება თუ არა მშობელი ასე მკაცრად ჩაერიოს შვილის პირად ცხოვრებაში და აუცილებელი მოვალეობა არის თუ არა, შვილმა ამ დროს მორჩილება გამოიჩინოს? – საერთოდ მორჩილება აუცილებელია. ჯვრისწერა – ეს არის ის საიდუმლო, როცა ქრისტემ ქალსა და კაცს შორის აღადგინა დარღვეული კავშირი. გზა კი ჭეშმარიტებისკენ, ანუ ქრისტესკენ, ყველამ ინდივიდუალურად უნდა გაიაროს. ჯვრისწერის აღსრულება მოითხოვს მშობლების მიერ წყვილის ლოცვა–კურთხევას. მშობლების კურთხევის გარეშე ჯვრისწერა არ შეიძლება. თუმცა, როცა მშობელი ეწინააღმდეგება ჯვრისწერას, არა ეკლესიური თვალსაზრისით, არამედ ეგოცენტრიზმით ან სხვადასხვა პირადი მოსაზრებით, ან თუნდაც მისი არაეკლესიურობის გამო და ა.შ., ამ შემთხვევაში ის მორჩილება მშობლისადმი, რომელიც ადამიანს ღმერთს მოაშორებს, არ არის გამართლებული და ღვთისთვის სათნო. მშობლის მიერ უხეში ჩარევა და იმის ბლოკირება, რაც ადამიანს ღმერთთან აახლოვებს, რა თქმა უნდა, ღვთისთვის სათნო არ არის. მშობლის რჩევა აუცილებელია, რათა ადამიანი მძიმე ცოდვაში არ ჩავარდეს. მშობელმა შვილს რჩევა უნდა მისცეს, ზოგჯერ მკაცრი, მაგრამ არაძალადობრივი, ზოგჯერ მამხილებელიც, მაგრამ არა – უზურპატორული და დიქტატორული, რითაც შვილს ზიანს მიაყენებს. – მშობლის კურთხევის გარეშე შექმნილი ოჯახი განწირულია? – ყოფილა შემთხვევები, როცა მშობლის კურთხევის გარეშე შექმნილი ოჯახები ძალიან ხანგრძლივი ყოფილა, რადგან ზეციური მშობლის კურთხევა იყო მათზე. ამ შემთხვევაში მშობლის უცოდინარობა და სისუსტე მხოლოდ დამაბრკოლებელი ფაქტორი იქნებოდა წყვილისთვის და ღვთის ნებამ მას აუარა, ააცილა მშობელიც და შვილიც უფრო მეტს ცოდვას და მოხდა ისე, რომ ჯვრისწერა შედგა. ასეთები გამონაკლისია და არ შეიძლება გამონაკლისი კანონზომიერად ჩაითვალოს. ძირითად ხაზს, მაცხოვნებელ ხაზს ადამიანი არ უნდა შორდებოდეს. ამას კი მშობლის კურთხევა უწყობს ხელს. რა თქმა უნდა, იდეალური ვარიანტია, როცა მშობლების კურთხევით იქმნება ოჯახი, რადგან, თქვენ იცით, რომ დედის და მამის კურთხევით აღიშენება სახლთა და ოჯახთა საფუძველი, როგორც წმინდა წერილში წერია. – რა ძალა აქვს მშობლის წყევლას? – წყევლა ნებისმიერ ადამიანს შეუძლია. ყველა ადამიანი არ არის ვიღაცის მშობელი, მაგრამ ყველა ადამიანი არის ვიღაცის შვილი, მას მშობელი ეყოლება. წყევლის უნარი კი ყველა ადამიანს შეუძლია გამოიყენოს და ბოროტი ქმედებით გამოხატოს თავისი უარყოფითი პოზიცია. მშობელს შეუძლია შვილი დალოცოს და დაწყევლოს კიდეც. წყევლა ნებისმიერ შემთხვევაში ადამიანს ედება ძალიან ძლიერ სულიერ ნაღმად. ამ ნაღმმა კი დროთა განმავლობაში შეიძლება მძიმე შედეგები გამოიწვიოს ადამიანის ცხოვრებაში – როგორც ცხოვრებისეულ საკითხებში, ასევე სულიერში. იგი მისაწვდომი ხდება ბოროტი ძალებისათვის. წყევლა ნებისმიერ შემთხვევაში ცუდია, განსაკუთრებით მშობლის წყევლა, თუმცა ეს არ არის გამოუვალი და კატასტროფული სიტუაცია და ძველი აღთქმისეული შიში არ უნდა დაგვეცეს ამის გამო. ახალ აღთქმაში ჩვენ გვაქვს საშუალება, რომ მოვინანიოთ. აღსარების საიდუმლო იმის საშუალებას გვაძლევს, მადლი დაუბრუნებლად არ დავკარგოთ, ანუ წყევლისა და სიკვდილისაგან გამოიხსნა ღმერთმა ადამიანი. ნებისმიერ შემთხვევაში წყევლა შენდობით უნდა მთავრდებოდეს. ღმერთმა წყევლისაგან შვილიც გამოიხსნა და მშობელიც. არსებობს გახსნის ლოცვები, წყევლის მოხსნის ლოცვები, შენდობის ლოცვები და ა.შ. თუკი ადამიანი ნანობს, აღარ აგრძელებს იმ ცოდვის კეთებას, რის გამოც ის დაწყევლეს და წყევლა არ მოუხსნიათ, მაშინ წყევლა გაათმაგებულად უბრუნდება იმას, ვინც ეს გააკეთა. ეს იქნება მშობელი თუ სხვა ადამიანი. – რა ცოდვაშია შვილი, რომელიც მშობელზე იტყვის აუგს? – სულიერი სტაგნაცია, ანუ სულიერი სიკვდილი ხდება იმ ადამიანისა, რომელიც საკუთარ მშობელს უარყოფს, მიუტევებელ სიძულვილს, სიცივეს, უნდობლობა–დაუნდობლობას ავლენს მშობლის მიმართ. ელემენტარულად ეს არის ქრისტიანული ნორმების დარღვევა. რა თქმა უნდა, არ შეიძლება ასეთ შვილზე სულიწმინდა გაჩერდეს, მას შორდება მფარველი ანგელოზიც და ასეთი ადამიანი მიეცემა ბოროტ ძალებს საკუთარი, თავისუფალი ნების არასწორად, უკუღმა გამოყენების გამო. მას ბოროტი ძალები სდევნიან და ბოლო თეთრს გადაახდევინებენ იმ ცოდვაში, რასაც მოჰყვება სიძულვილი, სიცივე და სულიერების უკუღმა გამოყენება. ქრისტიანობის გასაღები შენდობასა და მიტევებაშია. თუ ჩვენს ცხოვრებას შენდობა და მიტევება წითელ ხაზად არ გასდევს, ამაო იქნება ჩვენი ლოცვაც, ღმერთისადმი მიმართვაც და ა.შ. – მართლმადიდებლური რელიგიით, ბავშვი დაბადებისთანავე რამდენიმე დღეში ინათლება. არის თუ არა მართებული, რომ ადამიანმა გარკვეულ ასაკში თავად გადაწყვიტოს, რა რელიგიის აღმსარებლობა სურს? – ეკლესია აკურთხებს იმას, რომ ბავშვმა დაბადებიდან მეორმოცე დღეს მიიღოს ნათლობა, თუმცა შეიძლება ეს იყოს ცოტა ადრე და ცოტა გვიანაც. ზოგჯერ წლების განმავლობაშია ბავშვი მოუნათლავი, ანუ სულიწმინდას და მფარველ ანგელოზს არ ჰქონია საშუალება, მისთვის შვიდი ნიჭი მიენიჭებინა. ამიტომ ის, რაც უფალმა ბავშვზე უნდა გადმოავლინოს, ის შეწევნა, მას რაც შეიძლება ადრე სჭირდება. უნდა ვიცოდეთ, რომ ადამიანი, რომელიც არ არის მონათლული, ჯერ კიდევ ძველი აღთქმის პერიოდში იმყოფება. მასზე ჯერ პირველქმნილი ცოდვაა და სულიერად დაზიანებულია. იგი იმ ავადმყოფს მიემსგავსება, რომელიც შველას და წამალს ითხოვს, მაგრამ თვითონ ამ წამალს ვერ იღებს, არ შესწევს ძალა. ამიტომ უნდა აღსრულდეს ნათლობის საიდუმლო, სანამ ადამიანში ცოდვისადმი მიდრეკილი სიმპტომები სრულიად გამოვლინდება, რომელმაც შეიძლება მასში ისეთი დეფორმაცია გამოიწვიოს, რომ სრულიად გართულდეს მისი მდგომარეობა და ძნელად გასარჩევი იყოს მისთვის, თუ რა არის ღვთის ნება და რა – ეშმაკის სამსახური. ამიტომ იმ ხელუხლებელ მასალას, რაც ღმერთმა მისცა ადამიანს, დადებითი და სწორი მიმართულება უნდა მიეცეს. ეკლესიაადამიანს ყველა საშუალებას აძლევს, იცხოვროს ქრისტიანულად. ნათლობა კი გადარჩენის პირველი ღუზაა, რასაც მოჰყვებას სხვა საიდუმლოებები. ანა ნოდია | |
| კატეგორია: სტატიები | დაამატა: mamao (2012-02-08) | ავტორი: მამა გიორგი (სხირტლაძე) | |
| ნანახია: 1158 | |
შესვლა საიტზე