იტვირთება...
| მთავარი » სტატიები » სტატიები |
| რატომ მიიჩნევს ეკლესია იოგას ვარჯიშებს ცოდვად
ვაგრძელებთ "სარკის" წინა ნომერში დაწყებულ თემას ოკულტიზმის შესახებ. ყოფილა არაერთი შემთხვევა, როცა ოკულტიზმით გატაცებული ადამიანის სიცოცხლე ფატალურად დასრულებულა და ის დაღუპულა არამარტო ფიზიკურად, არამედ, რაც ყველაზე სამწუხაროა, სულიერადაც. გვესაუბრება წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე).
– მამა გიორგი, გვითხარით იმ მეთოდების შესახებ, რისი დახმარებითაც ადამიანი იგებს შეუცნობელს და, აქედან გამომდინარე, რას უნდა ვერიდოთ? – არის მრავალი მეთოდი, რომ გავიგოთ დაფარული, რითაც სინამდვილეში ჩვენ სულს საშინლად ვაზიანებთ. არსებობს აღმოსავლური, ინდური, ჩინური, ირანული პრაქტიკები ოკულტური ფიზიოლოგიისა და ანატომიის სწავლების შესახებ, დასავლური გნოსტიციზმისა და ეგვიპტური ოკულტიზმის ნარევი, რომლითაც ხდება კავშირის დამყარება დაცემულ სულებთან. არსებობს სხვადასხვა საშუალება, მაგალითად, იოგას ვარჯიშები, სხვადასხვა მედიტაცია თუ სუნთქვითი ვარჯიშები, მანტრა–იოგა. აღმოსავლეთში არის სექსუალური მაგია, დასავლეთში – ნეკრომანტია, სულების გამოძახება. ნიჟარით შეიძლება სმენის გავარჯიშება და ეს ერთ–ერთი ცნობილი ხერხია, როცა ზღვის დიდ ნიჟარას ყურთან მიიტან და ზღვის ხმაურს იგებ, მერე ხდება სხვადასხვა ხმების ამოცნობა. არებობს ალქიმიის სხვადასხვა მეთოდები. ეს ყველაფერი, ჯამში, არის შავი მაგია, რითაც ცდილობენ ე.წ. უკვდავების ელექსირის მოპოვებას. არსებობენ მითოლოგიური, ოდიოზური პიროვნებები, რომლებსაც ვითომდა ეს ელექსირი ჰქონდათ, დაწყებული ნიკოლოზ ფლამელით, დამთავრებული გრაფ სენჟერმენით. ასევე თანამდეროვე მოგვები, როგორებიც არიან გიორგი გურჯიევი, ნიკოლოზ რერიხი, რომელსაც ინდურ მაგიასთან, აგნი ოგასთან, ცეცხლის შესწავლის მაგიასთან აქვს საქმე. ლენინთანაც ჰქონდათ მესიჯი ამ მაჰათმებს. ერთ–ერთს უწოდებდნენ და მიესალმებოდნენ, როგორც "განმანათლებელს". თუ როგორი ბოროტება დაითესა ლენინის დაბადებიდან, მთელი მსოფლიოს მასშტაბით, ამაზე, მგონი, ორი აზრი არ უნდა არსებობდეს. რაც შეეხება ოკულტიზმის "მრავალფეროვან" მეთოდებს, ისინი ძალიან ბევრია და მათი ჩამოთვლა შორს წაგვიყვანს. ძალიან პოპულარულია ასეთი წიგნები, იყიდება კიდეც და არსებობს უამრავი ბესტსელერი, რომლებითაც, სამწუხაროდ, უამრავი ადამიანი იკვებება. – ცოდნის დონეზეც არ შეიძლება მათი წაკითხვა? – ადამიანმა, სამწუხაროდ, არ იცის, თავის ხსნისათვის რა არის საჭირო და კითხულობს ამგვარ წიგნებს, თუ როგორ განივითაროს ძალაუფლების ტექნიკა. ეს ისეთი მაცდური და მაგიური სწავლებებია, რომ ადამიანს ადვილად ითრევს და ძალაუფლების ცდუნების სახით სთავაზობს ისეთ აბს, რომ ადამიანს მისი გადაყლაპვა ტკბილი ეჩვენება. შედეგად, მის ინფორმაციულ ინტოქსიკაციას იწვევს, რომლიდანაც გამოსვლა, როგორც წინა ინტერვიუში აღვნიშნეთ, საკმაოდ რთულია და ამის სპეციალური წესი არსებობს მართლმადიდებელ ეკლესიაში. ჯორჯ ვაშინგტონი მასონი იყო და თვითონ ქალაქი ვაშონგტონი დაგეგმილია ასტროლოგიური პროგნოზით, ასტროლოგიურ–მაგიური ქალწულის თანავარსკვლავედის გეგმით, იზიდას ანუ ეგვიპტური ოკულტიზმის მიხედვით არის დაგეგმილი. შეიქმნა ჰოროსკოპი სპეციალურად ქალაქ ვაშინგტონისთვის. ჯორჯ ვაშინგტონიდან დაწყებული, დამთავრებული ეპოქალური ოკულტისტი ქალით, რომელმაც სცადა, რომ გაეერთიანებინა მეცნიერება, ფილოსოფია და რელიგია და ე.წ. პანკუმენიზმი შესთავაზა ადამიანებს საიდუმლო დოქტრინის სახით. ეს ქალი არის ელენა პეტროვნა ბლავაცკაია, ე.წ. თეოსოფიური საზოგადოების დამაარსებელი. ეს ისეთი ლოჟები და მასონური კლუბები დღესაც მოქმედებს. მართლმადიდებელი ეკლესია დაყენებულ იქნა საფრთხის წინაშე ჯერ კიდევ კომუნისტური რეჟიმის დროს. ყველა კომისარი და რევოლუციის შემოქმედი იყო ოკულტისტი და ეზოთერიკოსი, დაწყებული ტროცკით, დამთავრებული ჰიტლერით და მისი კომპანიით. ისინი არც მალავდნენ თავიანთ ოკულტურ ინტერესებს. ოკულტისტების ძირითადი მიზანი არის ისეთი ცოდნის მიღება, რომელიც ძალაუფლებას მატებს ადამიანებს. – მამაო, ერთი შეხედვით ჩვეულებრივი ვარჯიში – იოგა – ოკულტურ დატვირთვას რატომ ატარებს? – თუ იოგას გამოვაცლით სულიერ დოქტრინას და გამოვაცლით იმ ოკულტურ–ეზოთერულ შინაარსს, მაშინ დაგვრჩება მხოლოდ და მხოლოდ გიმნასტიკა, რომელიც რაღაც უცნაურ ფორმას ატარებს, სხეულის არაბუნებრივ მდგომარეობებს. გვრჩება სხეულის მექანიკური პოზები, რომლებსაც არავითარი დატვირთვა არ აქვს. ეს პოზები ოკულტურ–ეზოთერული ანატომიური ფიზიოლოგიის მიხედვით არის შექმნილი, როცა გარკვეული მედიტაციური და მაგიური ტექნიკებით ხდება ორგანიზმში ენერგიების მართვა, რომ გაიხსნას ის შესასვლელები, საიდანაც ხდება ადამიანის შეპყრობილება სხვადასხვა არსებებით. – ცოდვაა იოგას ვარჯიშები? – რა თქმა უნდა, ცოდვაა, იმიტომ, რომ შეიძლება ამ შემთხვევაში გაუთვალისწინებლად გაიხსნას ადამიანში შესასვლელი ფანჯარა, რაც შემდეგ იწვევს მასში სხვადასხვა ძალის შესვლას. ის ფანჯარა შემდეგ ჭრილობად იქცევა. ადამიანის სულს აქვს ის სარკმელები, რომლებიც დახურული და ჯვრით დაბეჭდილი უნდა იყოს. იმიტომ არის ამდენი შეპყრობილებები და "კოსმიური ცნობიერებების" გახსნები. შემდეგ ადამიანი მარტო აღარ დადის, დაჰყვება მას ბოროტი ძალების გუნდი. – ეს მის ჯანმრთელობასაც აზიანებს? – პირველ რიგში, სპირიტუალიზმი და ნეკრომანტია ძალიან ცუდია ადამიანის ჯანმრთელობისათვის, რადგან მას შეიძლება ფსიქიკური და სასიცოცხლო ენერგია წაერთვას. ადამიანის ჯანმრთელობა ნახევრდება სხვადასხვა სპირიტუალური გამოძახების შემდეგ. ამის გარდა, ხდება ადამიანის შეპყრობილება, მარიონეტიზაცია, როცა მასში, ერთი ინდივიდის გარდა, შეიძლება აღმოჩნდეს მრავალი ბოროტი ძალა ლეგიონის სახით. ამ სულებს არ უყვართ ჯოჯოხეთის ტერიტორიაზე გასვლა, ისინი ითხოვენ სადმე გაშვებას, მაგრამ არა – ჯოჯოხეთში. დიდი საშიშროება არსებობს ამ სულების მიერ ადამიანის განადგურების. ასეთი შემთხვევა არაერთია კაცობრიობის ისტორიაში, როცა სულის გამოძახების შემდეგ ადამიანი მკვდარი, გაგუდული უნახავთ. ისეთი მოგვები, როგორებიც იყვნენ პარაცელსი, აგრიპა დაახრჩვეს იმ სულებმა, ვისთანაც ურთიერთობა ჰქონდათ. ადამიანს მრავალი განსაცდელი უჩნდება. წმინდა ანტონი დიდს ეჩვენა რამდენიმე დემონი, რომლებიც ქსელებს აბამდნენ. გაიკვირვა წმინდა ანტონიმ, ვინ აუვლის ამხელა და ამდენ მახეებს გვერდსო და ხმა მოესმა უფლისა, რომ მხოლოდ და მხოლოდ რწმენით, სასოებით და მორჩილებით აექცევა მათ მხარი. უფლის გარეშე ჩვენ დაცული ვერ ვიქნებით. უნდა ითქვას აღსარება, რომ მოვინანიოთ ოკულტიზმის ცოდვა. ასეთ ადამიანს ეძლევა მეტანიები. მან უნდა ილოცოს და იმარხულოს. ფაქტობრივად, ქრისტეს უარყოფის მონანიება ხდება. აუცილებელია ნაკურთხი წყლის სხურება და ზეთის ცხება. ანა ნოდია | |
| კატეგორია: სტატიები | დაამატა: mamao (2012-02-21) | ავტორი: მამა გიორგი (სხირტლაძე) | |
| ნანახია: 3027 | |
შესვლა საიტზე