იტვირთება...
| მთავარი » სტატიები » სტატიები |
გვავნებს თუ არა მისტიკური ლიტერატურის კითხვა კითხვა და განათლება ადამიანს ისევე სჭირდება, როგორც პური და ჰაერი, მაგრამ გააჩნია – რისი კითხვა. საეკლესიო მამები გვაფრთხილებენ, რომ ზოგი წიგნი სულს ვნებს და ადამიანი შეიძლება დაღუპოს კიდეც. საბედნიეროდ, არსებობს ლიტერატურა – იგულისხმება არამარტო სასულიერო, არამედ მხატვრულიც, რომელიც ადამიანს აკეთილშობილებს, სულიერად ზრდის, მასში საუკეთესო თვისებებს აღვიძებს. როგორ შევარჩიოთ საკითხავი? ამ თემაზე წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება. – მამაო, რა კრიტერიუმებით უნდა შევარჩიოთ საკითხავად მხატვრული ლიტერატურა? – კითხვა აუცილებელია თვალსაწიერის გასაფართოებლად. ადამიანმა კი, რომელიც ეკლესიურად ცხოვრობს, სულის გადარჩენაზე ფიქრობს და იცის, რა არის წუთისოფელი, აუცილებლად უნდა იკითხოს საეკლესიო ლიტერატურა. ამასთანავე, რა თქმა უნდა, საჭიროა მხატვრული ლიტერატურის კითხვა, არამარტო იმიტომ, რომ წაკითხული უნდა გქონდეს ესა თუ ის ნაწარმოები, არამედ ცნობიერების გასაღრმავებლად. კითხვა ძალიან კარგი საშუალებაა საიმისოდ, რომ ბავშვებმა თავი დააღწიონ კომპიუტერს. სამწუხაროდ, ახალი თაობა მონიტორებს არის მიჯაჭვული. ჯობია, ვიკითხოთ რომანები, სასიყვარულო და სათავგადასავლო ლიტერატურა, ვიდრე კომპიუტერში ვითამაშოთ და სრულიად ამაოდ გავფლანგოთ დრო. დროის დაკარგვა ერთ–ერთი მძიმე ცოდვაა, რადგან ადამიანებს წუთისოფელში ცოტა დრო გვაქვს. კითხვა და განათლების მიღება ძალიან მნიშვნელოვანი თემაა, რომელსაც ეკლესია სრულებით ემხრობა და არანაირად უშლის მორწმუნე ადამიანებს ხელს. წმინდა მამებმა, რომელთა ცხოვრებასაც დღეს ვკითხულობთ, თავის დროზე საერო განათლება მიიღეს. ნეტარმა ავგუსტინემ, ნეტარმა იერონიმემ თავისი დროის საუკეთესო სასწავლებლებში მიიღეს განათლება. მათ შეისწავლეს ყველა მეცნიერება და წარმართ მასწავლებელთა ქებაც დაიმსახურეს. თავისი დროის ცნობილი მასწავლებელი ლიბანიოსი ასე ახასიათებს წმინდა ბასილი დიდს: "ესაა ჰომეროსი, ესაა პლატონი, ესაა არისტოტელე, ესაა კაცი ყოვლისმცოდნე". ამგვარი შეფასება მით უფრო საგულისხმოა, რომ ლიბანიოსი წარმართი იყო. განათლება მიიღო ყველა იმ წმინდა მამამ, რომელიც ჩვენ დღეს ასე ძალიან გვიყვარს და რომელთა მიმართაც ლოცვას აღვავლენთ. ძალიან მნიშვნელოვანია წმინდა წერილის კითხვა. მამა არსენ მღვიმელს ჰკითხეს, რა უნდა ვიკითხოთ წმინდა წერილიდანო. მან მიუგო, რომ წმინდა წერილი მთლიანად ღვთივსულიერია და იგი სრულად უნდა ვიკითხოთ, მაგრამ განსაკუთრებული ყურადღება ფსალმუნის კითხვას უნდა დავუთმოთ, რადგან ეს ძალიან ძლიერი ლოცვააო. – რას მოგვცემს ისეთი შინაარსის წიგნები, სადაც ძირითადი თემა მისტიკა და ჯადოქრობაა? – გააჩნია წიგნის დანიშნულებას და ადამიანის მისდამი ინტერესს. თუ ეს წიგნები მხოლოდ საგანმანათლებლო ხასიათს ატარებს, რათა ადამიანმა იცოდეს, რა არის ბოროტი და რა – კეთილი, რა დემონური და რა – ღვთიური, ამ შემთხვევაში დასაშვებია, მსგავსი შინაარსის წიგნები ვიკითხოთ, თუმცა ესეც მოძღვართან შეთანხმებით უნდა მოხდეს. ყველა წიგნი წიგნი არ არის და მათი წაკითხვით ცნობიერებას ვერ გაიღრმავებ. როცა ვკითხულობთ ისეთ მოთხრობას, ზღაპარს თუ ამბავს, სადაც ჯადოქრობა ან მსგავსი რამაა აღწერილი, რაც არანაირად არის ადამიანის ცნობიერებისთვის საჭირო, ასეთ შემთხვევაში ეკლესია უარყოფს მსგავს ლიტერატურას. მთავარი ის არ არის, ასეთი წიგნების კითხვა ცოდვაა თუ არა, არამედ ამ შემთხვევაში ადამიანი დემონურ ძალებთან შედის კონტაქტში და ეს ყველაფერი მის ქვეცნობერზე აისახება. ადვილი შესაძლებელია, ასეთი ადამიანი გახდეს აგრესიული, გაუცხოვდეს და, საბოლოო ჯამში, ამან მისი პიროვნული დეგრადაცია გამოიწვიოს. თუკი ადამიანს მაინც ძალიან აინტერესებს ამგვარი წიგნების კითხვა, არსებობს ორი გზა: ან უნდა დაგმოს და მივიდეს ტაძარში, დაიწყოს ეკლესიური ცხოვრება და უარყოს ყოველივე, რაც ჯადოქრობას ეხება, მაგრამ თუ გააგრძელებს მსგავსი წიგნების, წერილების თუ სტატიების კითხვას, მას გაუჩნდება ეშმაკთან სიახლოვის სურვილი. ბოროტი იმისათვის არ არის მოწოდებული, რომ ადამიანს დაუმეგობრდეს, არამედ პირიქით, ის ადამიანის დაღუპვას ცდილობს. ის ყოველთვის იყო, არის და იქნება მისი მტერი. ამიტომ აჯობებს, თავი შევიკავოთ. – არიან ადამიანები, ვინც თავად გვარწმუნებენ ან მათზე ამბობენ, რომ მათ მოვლენების წინასწარ განჭვრეტა ძალუძთ. რამდენად სარწმუნოა ადამიანის ეს უნარი? – ადამიანი ყველაფერს სიფრთხილით უნდა მიუდგეს. შეიძლება დღეს ფსევდოწინასწრმეტყველები ეკლესიაშიც დადიოდნენ და მოძღვრისგან დალოცვილებიც იყვნენ, მაგრამ ადამიანის პიროვნულად დალოცვა არ ნიშნავს იმას, რომ ამის კურთხევა აქვთ. სახარებაში წერია: "პური ჩვენი არსობისა". მაგრამ პურმა შესაძლოა ადამიანი დაახრჩოს კიდეც. უფალი სახარებაშიც ამბობს, რომ "ბევრნი გამრავლდებიან ცრუ წინასწარმეტყველნი". დღეს ის დროა, როცა რომელია მართალი და რომელი ცრუ, ვეღარ გაიგებ. ბევრი კითხვის ნიშანი ჩნდება დღევანდელ წინასწარმეტყველებზე, რომლებიც ამბობენ, რომ მათ საიდანღაც ეუწყათ ესა თუ ის ამბავი. ჩვენ ვერ გავიგებთ ეს უფლისგან არის თუ ბოროტისაგან. ჩვენ, მორწმუნეებმა, ჯობია, ვიაროთ ეკლესიაში, დავუჯეროთ მოძღვარს, ხშირად ვეზიაროთ, ჩავაბაროთ აღსარება, დავიცვათ მარხვა, ვიკითხოთ სახარება, წმინდა მამების ცხოვრება და ა.შ. ვიცხოვროთ სიმშვიდით, მორჩილებით, თავმდაბლობით, სიყვარულით და არ გვჭირდება ზედმეტი წინასწარმეტყველებები. ვინაიდან ამ ყველაფერმა შესაძლოა სრულიად ურყოფითი შედეგი მოგვიტანოს. ანა ნოდია | |
| კატეგორია: სტატიები | დაამატა: mamao (2012-04-08) | ავტორი: მამა გიორგი (სხირტლაძე) | |
| ნანახია: 1488 | |
შესვლა საიტზე