იტვირთება...
| მთავარი » სტატიები » სტატიები |
| "ვინც ბედისწერას აღიარებს, ყველაფერი წაერთმევა"
ადამიანთა უმრავლესობას ბედისწერის სჯერა. ეს ყოფილა ჩემი ბედისწერაო – ხშირად გაიგონებთ ამგვარ სიტყვებს მათგან, ვინც თავის ხვედრს შეგუებულია. ყველა არასასურველ შემთხვევას ბედისწერას აბრალებენ. თავსაც იმართლებენ – რომ მეცადა, მაინც არაფერი შეიცვლებოდა, რადგან ბედისწერა ასეთი იყოო. ეკლესია კი გვასწავლის, რომ ადამიანის ცხოვრების შესახებ წინასწარ არსად არაფერია დაწერილი და ადამიანი თავის ბედს თვითონვე საზღვრავს. ამ თემაზე გვესაუბრება წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე).
– მამაო, არსებობს ბედისწერა და თუ არსებობს, რა არის იგი? – საეკლესიო დოქტრინის თანახმად, ყოველგვარი ბედისწერა, ბრმა ფატალიზმი და მითოლოგიური ცნობიერება გამორიცხულია. ქრისტემ ადამიანი გაათავისუფლა პირველყოფილი ცოდვისგან, წყევლისაგან და პარალელურად ადამიანი გამოიყვანა მონობის მდგომარეობიდან, ბოროტი ძალებისგან. საერთოდ, ღვთის ხატად და მსგავსად ქმნულ არსებას მიცემული აქვს თავისუფალი ნება, გონება და შემოქმედების უნარი, დამოუკიდებელი არჩევანის უნარი, რაც ადამიანის მხრიდან გულისხმობს იმას, რომ თავის ჯვართმტვირთველობას სწორი რეალიზება უნდა გაუკეთოს ცხოვრებაში. ისეთ ადამიანებს, რომლებსაც შემოაქვთ ჭეშმარიტ რწმენაში ცრურწმენები, ბედობა, ბედისწერა და ა.შ. ელით არასასიამოვნო მოულოდნელობები. იქიდან გამომდინარე, რომ ადამიანს აქვს თავისუფალი ნება და აქვს არჩევანის საშუალება სიკეთესა და ბოროტებას შორის, გამორიცხულია ყოველგვარი წინასწარგანსაზღვრულობა. წმინდა წერილში უამრავი დამასაბუთებელი ციტატაა იმისა, რომ ბედისწერა არ არსებობს და ჩვენს ძალისხმევაზეა დამოკიდებული, თუ როგორ წარვმართავთ ჩვენს ცხოვრებას და სულიერ წინსვლას. არ ნებავს უფალს სიკვდილი ცოდვილისა, არამედ სურს მოქცევა და ცხონება მისი. არ ნებავს, რომ ადამიანი ცოდვილი იყოს და ჯოჯოხეთი ელოდებოდეს მას, მისი არჩევანის ან არაარჩევანის მიუხედავად. არ არსებობს, მონათლული ადამიანი წინასწარ იყოს განსაზღვრული სამოთხისთვის ან ჯოჯოხეთისთვის. ადამიანის წინაშე ყოველთვის რაღაც გზაჯვარედინი და ალტერნატივაა. ზოგჯერ მტერი ჰყავს, ზოგჯერ საშიშროება ელოდება, მაგრამ მონათლულ ადამიანს უფლის წყალობა აქვს და მფარველი ანგელოზი არ ტოვებს მას. ადამიანის ინდივიდუალური არჩევანია, ამ გზაჯვარედინზე საით წავა. მის თავისუფალ ნებაში უფალი არ ერევა. არსებობს დოქტრინა, რომ არის ცხოვრებათა სხვადასხვა ციკლი. არსებობს მითოლოგიური ცნობიერება, სადაც ფატალიზმია. ეს არის პირველქმნილი ცოდვით დაცემის შემდეგ მიღებული მდგომარეობა, რომლისგანაც ჩვენ ქრისტემ გაგვათავისუფლა. არ არსებობს არავითარი წინა ცხოვრება და მისი გაგრძელებები. ცრურწმენები, საწოლიდან რომელი ფეხით გადმოვალთ, თავს ორშაბათს დავიბანთ თუ არა, მარილი არ უნდა დაიპნეს და ა.შ., ადამიანს უჩენს ნევროზს, შიშებს და სულმოკლეობას. ადამიანის ცხოვრების წინსვლა როგორ შეიძლება დამოკიდებული იყოს იმაზე, მას შავი კატა გადაურბენს წინ თუ არა?! – მრავალ ადამიანს სჯერა, რომ როგორც ბედობადღეს დაიბედებს, მთელი წელი ისეთი ებნება. ზოგჯერ მართლაც ხდება ასე. ეს რის გამოა? – არსებობს სამი ნება – ღვთის, რომელიც მაცხოვნებელია, ბოროტი სულის, რომელიც წარმწყმედელია და ადამიანის თავისუფალი ნება. ადამიანი რომელ ნებასთან მოინდომებს თანხვედრას, ისე წარიმართება მისი ცხოვრება. ადამიანი რა სულსაც შეიცნობს, იმ სულს დაემსგავსება. თუ ადამიანი იტყვის, მატარებელი ყოველთვის მასწრებს, ეს ჩემი ბედიაო, სინამდვილეში მას საათი არ აქვს სწორად დაყენებული ან თვითონ აგვიანებს მატარებელთან მისვლას. ნუ იტყვი, რომ შენი ბედია უსწავლელობა და გაუნათლებლობა, თუ წიგნის გადაშლა გეზარება. ღმერთმა ყველა ობიექტური პირობა მოგვცა იმისთვის, რომ წინ წავიდეთ. არცოდნა არცოდვააო, რომ გაჰყვირიან, განა ჩვენი ბედია არცოდნა?! ეს არის ადამიანების უწიგნურობის, მოუნდომებლობის, თავისუფალი ნების არასწორად გამოყენების ბრალი. ჯვარს თუ დავაკვირდებით, დავინახავთ ორ შემადგენელ ხაზს – ჰორიზონტალურს და ვერტიკალურს. ესენი იკვეთებიან ცენტრში. ადამიანი დგას ამ ცენტრში. ჯვარი არის თავისუფალი ნების გამომხატველი, ყველა მიმართულების მაჩვენებელი. აღსარება არის ის საშუალება, რომლითაც ადამიანს შეუძლია წარსული შეცდომები გამოასწოროს. – ცოდვად გვეთვლება, როდესაც ბედისწერის გვჯერა? – ასეთი ადამიანები ადრე თუ გვიან მომაკვდინებელ ცოდვებში ჩავარდებიან. ასეთები ან ნევროზს დაიმართებენ, ან სულიერ ავადმყოფობებს. ეს ადამიანები ჰგვანან იმ გველს, რომელიც თავის კუდს კბენს, თვითგანადგურებამდე მიდიან. ამ აპოკალიფსურ პერიოდში, ადამიანებს, რომლებიც ბედისწერას აღიარებენ, მრავალი პრობლემა შეექმნებათ როგორც პირად ცხოვრებაში, ისე ზოგადად. წაერთმევათ ყველაფერი, რადგან, რასაც ღმერთზე მაღლა აყენებ, ის წაგერთმევა. ანა ნოდია | |
| კატეგორია: სტატიები | დაამატა: mamao (2012-02-24) | ავტორი: მამა გიორგი (სხირტლაძე) | |
| ნანახია: 2606 | |
შესვლა საიტზე