იტვირთება...
| მთავარი » სტატიები » სტატიები |
| "თუკი ეს რუსეთი არ მოექცა და არ გახდა მართლმადიდებელი ერის მხარდამჭერი, როგორიც საქართველოა, თვითონ შეიძლება გახდეს ანტიქრისტეს ტახტის განმზადებელი"
დასაწყისი წინა ნომერში
ვაგრძელებთ თემას, აპოკალიფსის, ანუ მეორედ მოსვლის შესახებ. დღევანდელი თემა შეეხება სამი 6–იანის მნიშვნელობას, რაც სატანის რიცხვად ითვლება. შეიძლება თუ არა რომ ადამიანმა თავისდაუნებურად მიიღოს ეს ნიშანი, რატომ არის ამ ნიშნის მატარებელი ადამიანი დაღუპული, რა ბედი ელის ისეთ უდიდეს მართლმადიდებლურ ქვეყანას, როგორიც რუსეთია, თუ ის ანტიქრისტიანულ ქმედებებს გააგრძელებს – ამ და სხვა საკითხებზე, წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება. – მამაო, ნათქვამია, რომ მხეცის რიცხვი ადამიანის ნების გარეშეც შეიძლება იქნეს შეყვანილი მის სხეულში. არის თუ არა ასეთი ადამიანი დაღუპული? – ჩვენი ნების გარეშე, ვერავითარი ძალა ვერ გაგვანადგურებს. თუ ჩვენი ნებით მივიღებთ მხეცის ნიშანს და ჩვენი ნებით დავემორჩილებით მას, მაშინ გასაგებია. თუ ჩვენი ნების საწინააღმდეგოდ დაგვარტყეს, ან საერთოდ გაუცნობიერებლად, ისე რომ ჩვენ ეს არც კი ვიცით, სხვადასხვა საშუალებების მეშვეობით, ტალონის, დოკუმენტის ან ბარათის, ეს არ ნიშნავს, რომ ჩვენ გაცნობიერებულად თაყვანი ვეცით მხეცს. ამან შეიძლება ირიბი, გაუცნობიერებელი ზიანი მოგვაყენოს. მთავარი ის არის, რომ ჩვენ შეიძლება, თუმცა თუ ადამიანი მუდმივად აღსარებას აბარებს და ეზიარება, მთლიანობას აღიდგენს. უამრავი რამ არის, რასაც ჩვენ ვერ ვაცნობიერებთ. ამიტომ არის ნათქვამი, იყავით ბრძენი, ვითარცა გველი და უმანკო, ვითარცა მტრედი, რომ გავარჩიოთ ჯვარი გადაჯვარედინებისაგან. სხვათა შორის, საბანკო სისტემა აგებულია ანტიქრისტიანულ საწყისებზე, რადგანაც ხარკისა და პროცენტების სისტემა არის პირდაპირპროპორციული მამონას, შავი მაგიის პრაქტიკული გამოვლინებისა. ადამიანების სულების შესყიდვის მცდელობა, ანუ უზურპაცია. ამიტომ ხდება ამდენი უბედურება და გაღატაკება. დღევანდელი საბანკო სისტემა არის ანტიქრისტეს სისტემის გამოვლინება. სულიერი კრიზისია ადამიანებს შორის. სიყვარულის, ჯანმრთელობის, ცოდნის კრიზისია. მონანიების ფორმები არ ჩანს, როგორც ვხედავთ. ეს კრიზისი უკიდურესია, განსაკურთებით ქართველებს შორის, ეგოცენტრიზმისა და ეგოიზმის გამოვლინებებით, რომელმაც ადამიანებს შორის უდიდესი ნაპრალები გააჩინა, საიდანაც შემდეგ შავი ძალები ამოვლენ. ეს ნაპრალები თუ არ იქნა ამოვსებული ქრისტიანული სიყვარულით და არ იქნა ამოვსებული ეკლესიის დაჯერებით, კიდევ უფრო გაღრმავდება და სავალალო შედეგებამდე შეიძლება მიგვიყვანოს. – რატომ არისა სამი 6–იანი მხეცის ნიშანი, რა დატვირთვას ატარებს იგი? – ეს არის მაგიური რიცხვი. სხვადასხვა სეიფებზე, საკეტებზე არის რიცხვები, რომლებიც თუ იცი, იმ რიცხვით გააღებ. ჯოჯოხეთი იღება ამ რიცხვით – 666–ით. ეს დიდი საიდუმლოა. ეს რიცხვი, პირდაპირ ნუ გავიგებთ, რომ არის საშიში სხვა შემთხვევებში, მაშინ ამოვაგდებდით და საერთოდ არ იარსებებდა. ეს ცოდვაა, თავისთავად რიცხვი არაფერ შუაშია. როგორც 13–ზე არ შეიძლება, თარსი რიცხვი ვუწოდოთ. 666 რომ შევაბრუნოთ, არის 999 და ეს რიცხვი არის ბაჯაღლო ოქროს სიმბოლო, რომელიც არის მამონას დაქვემდებარებაში, მამონას სიმბოლო. უამრავი ინტერპრეტაციაა ამ რიცხვის სხადასხვა შებრუნებისა და გამოთვლისა. – ამბობენ, რომ მესამე მსოფლიო ომის შემდეგ მოხდება დარჩენილი სახელმწიფოების გაერთიანება, რომლის ერთი მეფეც იქნება ანტიქრისტე. – იოანე ღვთისმეტყველის "გამოცხადებაში", რომელიც უამრავ განსაცდელს მოასწავებს, აღნიშნულია, რომ იქნება ომი, რომელიც ისეთ კატაკლიზმებს გამოიწვევს, რომ შემდეგ ერთი მმართველი დაჯდება და ეს იქნება ის, ვისაც ელიან, ანუ მეშიახი – ცრუ მესია. მას წარმატებები ექნება პირველ ხანებში და ამ დროს მართლებიც კი ცდუნდებიან და მართლმადიდებლებიც კი მიიღებენ ბეჭედს. ამიტომ შემოკლდება ეს დღეები, თორემ მართლებიც ვეღარ გაუძლებენ. ნილოს მირონმდინარე საინტერესო აზრს გამოთქვამს, რომ ბეჭედდარტყმული ადამიანები სიმაღლეშიც დაპატარავდებიან და სიმაღლითაც მიემსგავსებიან ეშმაკს. ლენინს, ნაპოლეონს და სხვა ბელადებს თუ გავიხსენებთ, არცერთი იყო მაღალი. – მამაო, როგორ ფიქრობთ, მართალია თუ არა გავრცელებული მოსაზრება, რომ რუსეთის იმპერია არის ერთადერთი სახელმწიფო, რომელიც ანტიქრისტეს მოსვლას შეუშლის ხელს? – თუ დღევანდელ რუსეთს გულისხმობთ, ამაში ეჭვი მეპარება. შეიძლება ითქვას, რომ პირიქით, თუკი ეს რუსეთი არ მოექცა და არ გახდა მართლმადიდებელი ერის მხარდამჭერი, როგორიც საქართველოა, თვითონ შეიძლება გახდეს ანტიქრისტეს ტახტის განმზადებელი. რუსეთი ათასწლიანი ქრისტიანული რელიგიის ქვეყანაა, იგი სერაფიმ საროველის ქვეყნაა, სერგი რადონეჟელის ქვეყანაა, ქსენია პეტერბურგელის ქვეყანაა და ეს რუსეთი, რომელიც უზარმაზარი წმინდანებით გამოირჩეოდა, არის მართლაც ის ქვეყანა, რომელიც გაათავისუფლებს თავის თავს, პირველ რიგში და მერე იმ სხვა ქვეყნებს, ვისაც სურვილი ექნებათ. თუკი რუსეთი არ მოექცევა და გააგრძელებს ანტიქრისტიანულ ქმედებებს ისეთი მართლმადიდებელი ქვეყნის მიმართ, როგორიც საქართველოა, თვითონ რუსეთის წმინდანებმა უწინასწარმეტყველეს მას და გააფრთხილეს, რომ არ შეიძლება ბინძური ხელებით სუფთა საქმის გაკეთება, ამ ყველაფერმა შეიძლება დიდი კატაკლიზმები გამოიწვიოს რუსეთში. ღვთისმშობლის წილხვედრი ქვეყანაა საქართველო. არ შეიძლება ღვთისმშობლის ტახტზე ფეხის კვრა, ამან შეიძლება ძალიან მძიმე შედეგები გამოიღოს. იოანე ღვთისმეტყველის "გამოცხადებაში" წერია, რომ ყველა ეკლესიას თავის კანდელი აქვს ზეცაში და ღმერთმა დაიფაროს, რომ რომელიმე ეკლესიის კანდელი შეირყეს ან ჩაქრეს! | |
| კატეგორია: სტატიები | დაამატა: mamao (2012-07-01) | ავტორი: მამა გიორგი (სხირტლაძე) | |
| ნანახია: 2667 | |
შესვლა საიტზე