იტვირთება...
| მთავარი » სტატიები » სიახლენი |
7 (ახალი სტილით 20) მაისს ქართული ეკლესია აღნიშნავს სასწაულსა პატიოსნისა ჯვარისა, რომელი გამოცხადდა ცასა შინა იერუსალიმს (351) და ღირსი იოანე ზედაზნელისა და ათორმეტთა მოწაფეთა მისთა (VI) ხსენების დღეს. მთელ საქართველოს ვულოცავთ დღევანდელ დღეს! ათცამეტი ასურელი მამა არა მარტო ქართული ეკლესიის წმინდანები, არამედ ქართული სახელმწიფოებრიობის მესაძირკვლენიც არიან, რა თქმა უნდა, სხვებთან ერთად. ისინი მაშინ მოვიდნენ იბერიაში, როცა ყველაზე მეტად უჭირდა ჩვენს ქვეყანას (VI საუკუნის შუა წლები). მეფობა გაუქმებული იყო სპარსთა მიერ (არის ვარაუდი, რომ ქართლის ერთ ნაწილში გაუქმებული არ იყო). შემოტევაზე იყო სპარსეთის მოკავშირე არმენული ეკლესია, მონოფიზიტიზმი. მაზდიანები ცდილობდნენ ქართველთა გადაჯიშებას... სომეხ და ზოგიერთ ქართველ მეცნიერს უნდოდა ცამეტი ასურელი მამა მონოფიზიტად გამოეცხადებინა. ამისთვის არგუმენტად მოჰყავდათ იმ დროის სირიაში (ასურეთში) მონოფიზიტობის გავრცელება. მაგრამ, გარდა მონოფიზიტებისა, იქ ორთოდოქსებიც იყვნენ, მით უმეტეს შავ სამღვდელოებაში. ანტიოქიაში და შავ მთაზე, სადაც აღნიშნული წმინდა მამები მოღვაწეობდნენ, ორთოდოქსია, მართლმადიდებლობა ჰყვაოდა. მით უმეტეს, ისინი იყვნენ წმინდა სვიმეონ მესვეტის სულიერი ძმები. ასევე ფაქტია, ასურელი მამები ჩამოდიან ბიზანტიის მართლმადიდებელი იმპერატორების მოკავშირე ქართლის ქვეყანაში, - რომელიც არის მტერი მართლმადიდებლური ბიზანტიის მტრისა და მონოფიზიტი არმენიის ეკლესიის მოკავშირისა, სპარსეთისა, - და არა არმენიაში. ისინი რომ მონოფიზიტები ყოფილიყვნენ არმენიაში, სომხეთში დამკვიდრდებოდნენ. არის ვარაუდიც, რომ ცამეტი ასურელი მამა წარმოშობით ქართველი იყო. თუმცა ამას არა აქვს მნიშვნელობა. ასურელი მამები ჩამოდიან და აძლიერებენ იბერიას სულიერად, ეკლესიურად. სამონასტრო ცხოვრება მანამდეც არსებობდა საქართველოში, მაგრამ, იოანე ზედაზნელისა და მისი თორმეტი მოწაფის მოსვლის მერე უფრო აყვავდა. ცამეტ მამას ცხვებიც მოჰყვნენ. გარდა ამისა, არა ერთი ქართველი დაუმოწაფდა მათ. დამარცხებულ, დაპყრობილ ქართველებს მოკავშირეები მოუვიდათ, თუნდაც მცირერიცხოვანნი, თუნდაც ბერნი, არა შეჯავშნულნი. სამაგიეროდ, ქართველებმა დაინახეს, რომ ღმერთმა ისინი მარტო არ დატოვა და დამხმარენი გამოუგზავნა.... მაშასადამე, ხსნა მართლმადიდებლობაში ყოფილა, მიხვდენ დაბნეულნი ქართველთა შორის... მცხეთის შემოგარენში წმინდა მამაბს შეეგება კათალიკოსი ევლავიოზი (ევლალე), რომელმაც გამოცხადებით წინასწარ იცოდა მათი მოსვლის შესახებ. თავიდან ცამეტი მამა ზედაზენზე დამკვიდრდა, მერე კი გაიშალნენ იბერიის სხვადასხვა ადგილებში. ასურელი მამების წინამძღვარი და მოძღვარი, იოანე დამკვიდრდა ზედაზენზე, სხვებმა დაიკავეს რელიგიურად და სახელმწიფოებრივად სტრატეგიული ადგილები (ამ საკითხზე უფრო დაწვრილებით იხილეთ ჩემი წერილი „მართლმადიდებლური საკრალური გეოპოლიტიკა V-VI საუკუნეების საქართველოში (მეორე ნაწილი) პრესა.გე). ასურელმა მამებმა და სხვა ქართველმა წმინდა მამებმა, საფუძველი მოუმზადეს სახელმწიფოებრიობის აღდგენას - ერისმთავრის არჩევას ქართლში. მათი დამსახურება ძალიან დიდია. დღეს, როგორც ვთქვით, არის დღესასწაული პატიოსნისა ჯვარისა, რომელი გამოცხადდა ცასა შინა იერუსალიმს (351). ამგვარად, წმინდა ჯვრის მადლითა და ცამეტი ასურელი მამის, მათ შორის მამა დავით გარეჯელის ლოცვით, ვფიქრობთ, დავით გარეჯის სამონასტრო კომპლექსის გარშემო წამოჭრილი პრობლემა მოგვარდება. ეს ადგილი წმიდათაწმიდაა ქართველთათვის. ქართველები სტრატეგიული მოკავშირეები არიან აზერბაიჯანელთათვის. ჩვენ დაინტერესებულნი ვართ მეგობრული ურთიერთობით, რა თქმა უნდა. საქართველოს ტერიტორიაზე არავითარი პრობლემა არ ექმნებათ ეთნიკურად აზერბაიჯანლებს. იმედია, არავითარი პრობლემა არ შეგვექმნება ქრისტიან ქართველებსაც, ამიერიდან, არც დავით გარეჯის სამონასტრო კომპლექსის მთელ ტერიტორიაზე, არც საინგილოშიც... ისე კი, თუ ვინმეს აწყობს ამ პრობლემის გაჩენა, არსებობა თუ „აგორება", ეს რუსეთის იმპერია შეიძლება იყოს, და მისი მოკავშირეები თუ აგენტები კავკასიაში. კიდევ ერთხელ ვულოცავთ ქართველებს დღევანდელ დღეს! მივმართოთ ლოცვით ცამეტ ასურელ მამას. ლოცვა ჰოი ყოვლადღირსნო ღმერთშემოსილნო მამანო: იოანე ზედაზნელო, აბიბოს ნეკრესელო, ანტონ მარტყოფელო, დავით გარეჯელო, ზენონ იყალთოელო, თადეოზ სტეფანწმიდელო, ისე წილკნელო, იოსებ ალავერდელო, ისიდორე სამთავნელო, მიქაელ ულუმბოელო, პიროს ბრეთელო, სტეფანე ხირსელო და შიო მღვიმელო - ანგელოზთაებრ მგალობელნო, ნათლისმცემლისაებრ პატივცემულნო, ღირსთა შორის გჳრგჳნნო, მონაზონთა წინამძღვარნო, მამათა პატიოსნებანო, ქრისტიანეთა მფარველნო, მოსავთა თქუენთა შეწევნაო და ყოველთა მვედრებელთა სიწმიდისა თქუენისათა სასონო და შესავედრებელნო. ჰოი ყოვლადსანატრელნო ღმრთივსულიერნო მამანო, ვარსკულავნო ყოვლადბრწყინვალენო, მოგუფინეთ სხივებრ მადლი წმიდისა ლოცვისა თქუენისა და განანათლეთ კეთილმორწმუნე ერი ჩუენი, განაბრწყინვეთ უწმიდესი და უნეტარესი, სრულიად საქართველოს კათალიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, მამაჲ ჩუენი ილია და ყოვლადსამღვდელონი მიტროპოლიტნი, მთავარეპისკოპოსნი და ეპისკოპოსნი და ყოველნი სამღვდელონი და სამონაზვნონი წესნი; განაძლიერეთ ღმრთისმსახურნი და ყოველნი მართლმადიდებელნი ქრისტეანენი; ევედრეთ, მამანო, თქუენგან შეყუარებულსა ღმერთსა, რაჲთა ყოველნი შეგჳწყალნეს დიდითა წყალობითა თჳსითა. ჰოი ყოვლადპატიოსანნო მამანო წმიდანო: იოანე ზედაზნელო, აბიბოს ნეკრესელო, ანტონ მარტყოფელო, დავით გარეჯელო, ზენონ იყალთოელო, თადეოზ სტეფანწმიდელო, ისე წილკნელო, იოსებ ალავერდელო, ისიდორე სამთავნელო, მიქაელ ულუმბოელო, პიროს ბრეთელო, სტეფანე ხირსელო და შიო მღვიმელო - მზეებრ შარავანდედითა წმიდითა ლოცვითა თქუენითა დაგჳფარეთ თაყუანისმცემელნი ღმრთივშუენიერისა სიწმიდისა თქუენისანი და გჳჴსნენით სიყმილისაგან და სრვისა, უნაყოფობისაგან ქუეყანისა, სეტყჳსაგან და ყოვლისაგან მავნებელისა ჰაერისა, და ყოვლისაგან მწუხარებისა, არამედ ევედრენით ყოვლადწმიდასა სამებასა, რაჲთა მოგუმადლოს მშჳდობაჲ და სიმართლე, მამულისა ჩუენისა და სიწმიდეთა ჩუენთა დაცულობაჲ, კაცთმოქალაქობით ღმრთისა სათნოყოფაჲ, მართლმადიდებლობით გაბრწყინვებაჲ, ქველისსაქმით განათლებაჲ, სასუფეველსა ცათასა დამკჳდრებაჲ, მართალთა თანა სუფევაჲ, ღირსთა თანა გჳრგჳნოსნებაჲ და საუკუნოჲ დიდებაჲ და სიხარული, რამეთუ მამასა შუენის დიდებაჲ, ძესა მადლობაჲ და სულსა წმიდასა თაყუანისცემაჲ საუკუნითგან აწ და მარადის და უკუნითი უკუნისამდე. ამინ. წყარო: http://presa.ge
| |
| კატეგორია: სიახლენი | დაამატა: mamao (2012-05-20) | ავტორი: ადმინისტრაცია | |
| ნანახია: 2100 | |
შესვლა საიტზე