იტვირთება...
| მთავარი » სტატიები » სიახლენი |
ჯვრის თაყვანისცემის კვირა მართლმადიდებელი ეკლესია დიდმარხვის მესამე კვირიაკეს ჯვრის თაყვანისცემის დღესასწაულს აღნიშნავს. დიდი მარხვის მესამე კვირას ყველა მოქმედ ტაძარში უფლის ცხოველსმყოფელ ჯვარს გამოასვენებენ და მორწმუნეებს მთელი კვირის განმავლობაში აქვთ შესაძლებლობა, მას თაყვანი სცენ. ჯვარი უკიდურესი თავმდაბლობის, ღვთისგან ადამიანისადმი უსასრულო და თავგანწირული სიყავრულის გამოვლინებაა; ჯვარი იარაღია ბოროტებასა და უზნეობაზე გამარჯვების; ჯვარი მოწოდებაა ადამიანისადმი თავგანწირული სიყვარულისა და ქრისტესათვის მოწამეობის; ჯვარი ნიშანია ქრისტესი და იგი წინამორბედად გამოისახება ცაზე მისი მეორედ მოსვლის წინ; და ბოლოს, ჯვარი ძალაა ღვთისა ქრისტეს მიერ ჩვენთვის მოცემული, რათა მისი გაძლიერებულებმა ქრისტეს მოწაფეობა და ამქვეყნად მისი საქმის გაგრძელება შევძლოთ. მართლმადიდებელი ქრისტინები ჯვრისადმი თაყვანისცემას პირჯვრის წერითაც გამოვხატავთ. ამ დროს ჩვენ ვაღიარებთ რწმენას ჯვარცმული უფლისადმი და ვადიდებთ მას. წმიდა იოანე ოქროპირი გვმოძღვრავს : „თუკი იგრძნობ, რომ გული შენი ღიზიანდება და მძიმდება, პირჯვარი დაიწერე და ამ გზით დაიცავი მკერდი შენი." ჯვრის სიმბოლო ქრისტიანობამდეც არსებობდა. თუმცა მაცხოვრის განკაცებამ ჯვარს ახალი უჩვეულო დატვრითვა მისცა . იგი გახდა უფლისა და მაცხოვრის იესო ქრისტეს სიმბოლო და კაცობრიობის გამოხსნის მოწმობა! ქრისტესშობამდე სიკვდილით დასჯის ყველაზე სამარცხვინო იარაღი - ჯვარცმა კი ცხონების სიმბოლოდ იქცა! წმიდა კირილე იერუსალიმელი წერს: „დაე, ნუ შეგვრცხვება ჯვარცმულის თაყვანისცემა, გაბედულად გამოვისახოთ პირჯვარი; ჯვარი გადავსახოთ პურს, რომელსაც მივირთმევთ, ფინჯნებს, რომელთაგან ვსვამთ, ჯვარი გამოვსახოთ კარიბჭეებზე. გამოვისახოთ პირჯვარი, როცა ვიძინებთ, როცა ვიღვიძებთ, როდესაც ვმგზავრობთ და როცა ვისვენებთ. ჯვარი - უდიდესი დაცვაა გლახაკთათვის ძღვნად მოცემული და უძლურთათვის უშრომელად ბოძებული. წყარო: http://sstv.ge/ | |
| კატეგორია: სიახლენი | დაამატა: mamao (2012-03-18) | ავტორი: ჯვრის თაყვანისცემის კვირა | |
| ნანახია: 1802 | |
შესვლა საიტზე