რასაც ურწმუნო იღბალს ან ბედს ეძახის, მფარველი ანგელოზია - სტატიები - სიახლეები - www.mama-giorg.moy.su
ЛСЛС
დახურვა
შეტყობინებები: 0
MESSAGE!:შეტყობინება არ არის
შესვლა საიტზე
იტვირთება...
 
მთავარი » სტატიები » სტატიები

რასაც ურწმუნო იღბალს ან ბედს ეძახის, მფარველი ანგელოზია
რასაც ურწმუნო იღბალს ან ბედს ეძახის, მფარველი ანგელოზია

ცხოვრებაში ხშირად ხდება, როცა ადამიანი უბედურ შემთხვევას, ხიფათს სასწაულად გადარჩება. ასეთ დროს იტყვიან ხოლმე, იღბლიანი ადამიანიაო. სასულიერო პირები კი ამბობენ, რომ შემთხვევითობა არ არსებობს, იღბალი კი საერთოდ გაურკვეველი ცნებაა. ადამიანს უბედურებისგან ღმერთი და ღვთისგან მონიჭებული მფარველი ანგელოზი იცავს. თუმცა არის სამწუხარო შემთხვევებიც, როცა მფარველ ანგელოზს ადამიანისგან განშორება უწევს... ამ თემაზე წმინდა იოანე ღვთისმეტყველის სახელობის ტაძრის წინამძღვარი, დეკანოზი მამა გიორგი (სხირტლაძე) გვესაუბრა. 
– მამაო, როგორც ვიცით, ყველა ქრისტიანს ჰყავს მფარველი ანგელოზი, რომელიც ღვთისგან ნათლისღების დროს ეძლევა. უფრო რომ დაგვიკონკრეტოთ, რას ნიშნავს მფარველი ანგელოზი? 
– მფარველი ანგელოზი უკვდავი სულია, რომელიც ადამიანს ღვთისგან ჰყავს მინიჭებული. ეს საიდუმლო აღესრულება ნათლობის დროს, რათა ადამიანს უხილავად მიეცეს მადლი. მფარველ ანგელოზს დავალებად აქვს, რომ ადამიანს მთელი ცხოვრება უხელმძღვანელოს სულიერად, იმ ჯვრისმტვირთველობაში მიეხმაროს, რაც მას აკისრია. ანგელოზი ადამიანს ბოროტისგან იცავს. 
– მფარველი ანგელოზი ადამიანს სიკეთის ჩადენას აიძულებს? 
– ღვთის კურთხევით, მფარველი ანგელოზი ადამიანს არჩევანის გაკეთებას არ აიძულებს. მას უყვარს, როცა ადამიანი სიკეთეს ჩადის და არ უყვარს, როცა ბოროტებას ირჩევს, მაგრამ ეს იმას არ ნიშნავს, რომ სიკეთის ქმნას აიძულებს. ის ადამიანისთვის არის როგორც დამკვირვებელი, მფარველი სული. 
– როგორ გრძნობს ადამიანი მფარველი ანგელოზის ძალას? 
– სხვა ანგელოზებთან შედარებით მფარველი ანგელოზი ყველაზე ახლოს არის ადამიანთან. მისი ძალა და დახმარება ნებისმიერ მორწმუნეს უგრძვნია. მისი მფარველობის ბევრი შემთხვევაა აღწერილი, თუ როგორ გადაურჩა ადამიანი სიკვდილს, ხიფათს. სამწუხაროა, რომ ამას ურწმუნო იღბალს ან ბედს ეძახის. გვსმენია, როგორ გამოცხადებია ადამიანს სიზმარში მფარველი ანგელოზი ბებიის ან ბაბუის სახით და გაუფრთხილებია, რომ, მაგალითად, სახლიდან გასულიყო. შემდეგ კი იმ სახლში ბომბი აფეთქებულა და ა.შ. 
– მაგრამ ხომ ამბობენ, რომ სიზმარს არ უნდა ენდო, რადგან ზმანება შეიძლება ბოროტი ძალისგან იყოს... 
– რა თქმა უნდა, არ უნდა ვენდოთ. ამას სულიერი ხედვა სჭირდება, მოძღვრის რჩევას უნდა დავუგდოთ ყური. შეიძლება სიზმარი საცდუნებლადაც იყოს მოვლენილი. ხშირად ადამიანი ინტუიციით, გუმანით ხვდება, სად უნდა წავიდეს და სად – არა, ვის უნდა ენდოს და ვის – არა და ა.შ. ამაში კი მფარველი ანგელოზი ეხმარება, ცხადი თუ დაფარული სახით ბევრ ინფორმაციას აძლევს. მფარველი ანგელოზი ადამიანს ბოროტი სულებისგან იცავს. მოუწოდებს, სულიერად გაძლიერდეს, გათავისუფლდეს მავნე ჩვევებისგან, ვნებებისგან. მფარველი ანგელოზი ადამიანის გულს ალბობს. მას ღვთის წინაშე დიდი პასუხისმგებლობა აქვს აღებული. ასე ვთქვათ, ანგარიში უნდა ჩააბაროს ღმერთს იმ ადამიანის შესახებ, ვინც უფალმა მას ჩააბარა. უნდა უთხრას, როგორ მიეხმარა, რომ გადარჩენილიყო და არ დაღუპულიყო. ღმერთს სურს, რომ ყველა გადარჩეს. 
– მაინც როგორ უნდა ვირწმუნოთ მფარველი ანგელოზის არსებობა, თუ მის ხილვას ან თუნდაც გამოცხადებას გამოვრიცხავთ? 
– ყურადღება უნდა მივაქციოთ ჩვენს ხასიათს, ლაპარაკს, ქმედებას, აზროვნებას, ჩვენს გულისთქმას და მფარველი ანგელოზის მოქმედებასაც ვიგრძნობთ. არ არსებობს, რომ ამას ვერ მივხვდეთ. შეუძლებელია ადამიანს გრძნობები, გული ისეთი გაუხეშებული ჰქონდეს, რომ, მაგალითად, ვერ იგრძნოს, სიზარმაცე როგორ ახრჩობს ან ვერ იგრძნოს, რომ ნერვიულობს ქონების დაგროვებაზე. ესეც და სიზარმაცეც ბოროტი სულისგან არის. და როცა უმიზეზო ან ამაო სევდის დროს ადამიანი მოულოდნელ სიხარულს, აღტკინებას, ენერგიას გრძნობს – ეს მფარველი ანგელოზისგან მოდის. ამ დროს ენთუზიაზმი იპყრობს, ეკლესიაში წავიდეს, ილოცოს, წმინდა მამების წერილები იკითხოს. ეს კი სწორედ მფარველი ანგელოზის შთაგონებით ხდება. 

– როდის შორდება მფარველი ანგელოზი ადამიანს? 

– როცა ადამიანი ეკლესიურ ცხოვრებაზე ხელს ჩაიქნევს, ასეთ დროს მფარველი ანგელოზი უკვე შორს არის მისგან. სულ არ შორდება, მაგრამ დაკვირვების ქვეშ ჰყავს. ეს ღვთისგან არის დაშვებული, რომ დაცვა მოშორდეს, რათა გამოიცადოს ბოროტისაგან. ღმერთს ადამიანის წვალება არ სურს, თავად ადამიანი უშვებს საკუთარ თავზე განსაცდელს, რადგან მფარველი ანგელოზის სიკეთეს წინ უდგება და მის შთაგონებებს ებრძვის. 
ღმერთი ადამიანისკენ არის, მაგრამ ადამიანი ხშირად ზურგს აქცევს უფალს. ღმერთი კი ადამიანის თავისუფალ ნებას არ ზღუდავს. უფალმა მას თავისუფალი ნება იმისთვის მისცა, რომ არჩევანი თავად გააკეთოს, ეს მადლი სწორად უნდა გამოიყენოს. არასწორად გამოყენების შემთხვევაში კი დაისჯება, ოღონდ ეს იქნება მისი არჩევანი და არა – უფლის სასჯელი. მფარველი ანგელოზის სიკეთე უნდა დავაფასოთ. არსებობს მფარველი ანგელოზის ლოცვები. მისი ხატის ტარება კი დიდი მადლია. 
– თუ აქვს მფარველ ანგელოზს სახელი, რომ ლოცვისას მოვიხსენიოთ? 
– სხვათა შორის, ამას ხშირად მეკითხებიან. არა, მფარველ ანგელოზს არ აქვს სახელი. რომელი წმინდანის სახელიც გქვიათ, ანგელოზსაც იმ სახელით მიმართეთ. არც არის საჭირო, მფარველი ანგელოზის სახელი ვიცოდეთ. ადამიანის ცხონებისთვის მთავარია, ანგელოზის მითითებებს დაემორჩილოს. 
– რომელ ანგელოზს უწოდებენ ოჯახის მფარველს? 

– ეს კითხვა პირდაპირ არის დაკავშირებული სახლის კურთხევის რიტუალთან. ტერიტორია, სადაც ადამიანი ცხოვრობს, მოძღვარმა უნდა აკურთხოს. სახლს მფარველი ანგელოზი კურთხევის დროს ენიჭება. ყველას მოვუწოდებ, ნუ იცხოვრებთ უკურთხებელ სახლებში. ეს განსაკუთრებით კორპუსებში მცხოვრებლებს ეხებათ. შეიძლება ერთ ოჯახს არ უტევდეს ბოროტი ძალა, მაგრამ მეორეს შეუტიოს, ამან კი სხვებზეც მოახდინოს გავლენა. ამიტომ სახლი აუცილებად უნდა ვაკურთხოთ. არსებობს სპეციალური ლოცვები, რომლებიც ოჯახს იცავს მახვილისგან, ქურდობისგან და ა.შ. 
სხვათა შორის, კურთხევა ნივთებსაც უნდა. ვინ ატარებდა, რა ძალა მოქმედებდა ამ ნივთზე, ხომ არ ვიცით? ამიტომ უნდა ვაკურთხოთ. რაიმე ნივთს თუ იპოვით, ჯერ უნდა აკურთხოთ და ამის შემდეგ ატაროთ. ამიტომ არ შეიძლება მოპარული ნივთების, მოპარული ხატების შეძენა. ამ ნივთის მფარველი ანგელოზი (დიახ, ნივთებსაც ჰყავთ მფარველი ანგელოზები და ზოგადად ანგელოზი უთვალავია) ამ დროს გაბრაზებულია და მაინც არ მოგასვენებს, უკან დაგაბრუნებინებს. ამიტომ, თუ ვინმეს მოპარული ხატი ან ჯვარი აქვს, ეკლესიას უნდა შესწიროს ან პატრონს დაუბრუნოს. გაყიდვა არ შეიძლება! მნიშვნელობა არ აქვს, რომელ ეკლესიას შესწირავს. 
მანანა ნოდია 
კატეგორია: სტატიები | დაამატა: mamao (2012-10-17) | ავტორი: მამა გიორგი (სხირტლაძე)
ნანახია: 1240 |
გააზიარე ეს სიახლე სადაც გინდა: