"თავისუფლება ნიშნავს – არ გახდე ვნებების მონა" - სტატიები - სიახლეები - www.mama-giorg.moy.su
ЛСЛС
დახურვა
შეტყობინებები: 0
MESSAGE!:შეტყობინება არ არის
შესვლა საიტზე
იტვირთება...
 
მთავარი » სტატიები » სტატიები

"თავისუფლება ნიშნავს – არ გახდე ვნებების მონა"
"თავისუფლება ნიშნავს – არ გახდე ვნებების მონა"

ხორციელი ვნება, ხშირად გაუკუღმართებული სახისაც, შვიდ სასიკვდილო ცოდვათაგან ერთ–ერთია და მის მონანიებას სულიერი მოძღვრები განსაკუთრებით გვირჩევენ. 21–ე საუკუნის "სლოგანი" – ყოველგვარი შინაგანი ზღუდის მოშლა და ვნებებისათვის სრული თავისუფლების მიცემა, ეკლესიის შეფასებით, ფსევდოთავისუფლებაა, რომელიც ადამიანს სინამდვილეში სულიერი დაღუპვისკენ მიაქანებს. რა ცოდვაა ხორციელი ვნებებისადმი მორჩილება და რა არის ჭეშმარიტი თავისუფლება, ამ თემაზე წმინდა იოანე ღვთისმეტყველის სახელობის ტაძრის დეკანოზი, მამა გიორგი  (სხირტლაძე) გვესაუბრება. 
– მამაო, ბევრი ამბობს, რომ ქორწინებამდე სექსის უარყოფა არ შეიძლება, რადგან ეს ფიზიოლოგიური მოთხოვნილებაა. რატომ იკრძალება ის ეკლესიის მიერ? 
– იმიტომ, რომ ღმერთმა აკრძალა 10 მცნებაში და ბრძანა: "არა იმრუშო", თუმცა უტოვებს ადამიანს უფლებას, გაიხადოს ცხოვრების თანამგზავრად საპირისპირო სქესის წარმომადგენელი, რომელთანაც დაიწერს ჯვარს და მათი შეერთება და სარეცელი იქნება ნაკურთხი ზეციდან. სხვა სახის ურთიერთობა კატეგორიულად აკრძალულია წმინდა წერილის მიხედვით და იწვევს ღვთის სასჯელს. 
– ონანიზმი მძიმე ცოდვაა? 
– ეს ნამდვილად სახიფათო და სასიკვდილო ცოდვაა. ბიბლიურ პიროვნება ონანს (აქედან არის სიტყვა "ონანიზმი") ჰყავდა ცოლი. მას არ უნდოდა შვილის ყოლა და ამიტომ ცოლთან სჩადიოდა მსგავს ცოდვას. ამის გამო ღმერთმა იგი მოკლა. ღმერთს არ მოუკლავს ძმის მკვლელი კაენი და მოკლა ანონი. აქედან ჩანს ამ ცოდვის სიმძიმე. ახალ აღთქმაში მოციქული პირდაპირ ბრძანებს, რომ ჩუკენები სასუფეველს ვერ დაიმკვიდრებენ. აქედან გამომდინარე, მე ვფიქრობ, ყველაზე საშიში ჩვენი სულიერი და ფიზიკური სიჯანსაღისათვის ეს ცოდვაა და ამიტომაც უკეთესი იქნება, მთელი ჩვენი ძალები ამ ცოდვასთან ბრძოლისთვის მივმართოთ. ამისთვის საუკეთესო საშუალებაა ხშირი აღსარება და ზიარება. მოძღვართან სირცხვილი ამ დროს ეშმაკისგან მოვლენილი ხრიკია და ამიტომაც ჩვენ სწორედ ხშირი აღსარებით უნდა დავძლიოთ ეს ცოდვა. 
– შვიდგზის ზეთისცხება ადამიანს ამ ცოდვისგან არ განწმენდს? 
– რაც შეეხება ზეთის კურთხევის საიდუმლოს – შვიდგზის ზეთისცხებას, რა თქმა უნდა, ეს კარგია, მაგრამ ამ დროს ჩვენ გვეპატიება ცოდვები, რომლებიც არ გვახსოვს ან გამოგვრჩა აღსარების თქმისას, მაგრამ არა – ისინი, რომლებსაც ვმალავთ სირცხვილის გამო. 
– როგორ სჯის ეკლესია ამ ცოდვის ჩამდენს? 
– ამ ცოდვისთვის ეკლესია ადამიანებს, მინიმუმი, ორკვირიან სასჯელს ადებს, მეტანიებით (ათიდან ოცამდე), იესოს ლოცვით და სასჯელის დროს უზიარებლობით. 
– ბევრი ამბობს, რომ იმგვარ ცოდვას, როგორიცაა მამათმავლობა, მოძღვართან ვერ გაამხელენ, რადგან მაინც არ მიეტევებათ. რამდენად სწორია ეს აზრი? 
– რა თქმა უნდა, არ არის სწორი. ეკლესიური სწავლებით, არ არის ცოდვა, რომელიც ღვთის მოწყალებას აღემატება. იესო ქრისტეს უდიდესი ცოდვილები უდიდეს წმიდანებად უქცევია. ლონგინოზ ასისთავი, რომელიც ქრისტეს ჯვარცმას ხელმძღვანელობდა და ჯვარცმულ მაცხოვარს ფერდში შუბი უგმირა, შემდგომში მოწამებრივად აღესრულა და წმინდანია. პირველი სამოთხეში ჯვარზე გაკრული მონანული ავაზაკი შევიდა. მარიამ ეგვიპტელი, რომელიც უცოდვილესი იყო, სინანულისა და ქრისტიანული ცხოვრების დაწყების შემდეგ უდიდეს წმინდანად იქცა. რა თქმა უნდა, მამათმავლობა უდიდესი ცოდვაა, ამ ცოდვის გამო ღმერთმა წარღვნისა და სოდომ–გომორის სასჯელი დაუშვა დედამიწაზე. მოციქული ბრძანებს, რომ "ნუ სცთებით, არცა მეძავთა, არცა კერპთმსახურთა, არცა მემრუშეთა, არცა ჩუკენთა, არცა მამათ–მავალთა, არცა ანჰგართა, არცა მპარავთა, არცა მემთვრალეთა, არცა მაგინებელთა, არცა მტაცებელთა სასუფეველი ღმრთისა ვერ დაიმკვიდრონ" (1 კორინთელთა, 6, 9–10). გულწრფელი სინანულის შემთხვევაში ღმერთი ყველაფერს გვპატიობს. მე ვფიქრობ, აუცილებელია ამ ადამიანისათვის აღსარების თქმა, ქრისტიანული ცხოვრების დაწყება და ეკლესია მიეხმარება მას ცხონებაში, რაც ჩვენს მთავარ მიზანს წარმოადგენს. 
– დღეს საინფორმაციო საშუალებების უმრავლესობა ე.წ. კომპლექსებისგან გათავისუფლების პროპაგანდას ეწევა. ითვლება, რომ თავისუფლება ნიშნავს ადამიანის ნებისმიერი სურვილის ასრულებას თუ ვნების დაკმაყოფილებას. ამავდროულად ვიცით, რომ უფალმა ადამიანი თავისუფალი ნებით და არჩევანით დააჯილდოვა. არის თუ არა კომპლექსებისგან გათავისუფლება და უფლის მიერ მონიჭებული თავისუფლება ერთი და იგივე? რას ნიშნავს გამოთქმა: "ადამიანი ღმერთმა თავისუფალი გააჩინა. 
– ეს ნიშნავს, რომ ადამიანი თავად წყვეტს, თავად არჩევს, საკუთარი თავის უფალი იყოს თუ თავის თავზე ვნებები აბატონოს, ანუ ეშმაკს დაემორჩილოს. ადამიანი არის შემოქმედი თავისი მომავალი ცხოვრებისა. თავისუფლება ნიშნავს, იყო საკუთარი თავის უფალი და არ გახდე ვნებებისა და კაპრიზების მონა. თუ თავისუფლება მართლაც ნებისმიერი სურვილის, რაც კი თავში გაგიელვებს, ასრულების უფლებაა, მაშინ გამოდის, რომ ყველაზე თავისუფალნი ცხოველები ყოფილან, რადგან ინსტინქტურად, არ უფიქრდებიან ისე, ნებისმიერ დროს და ნებისმიერ ადგილზე ემორჩილებიან საკუთარ ვნებებს. ჩემი აზრით კი, თავისუფლება ნიშნავს, იყო საკუთარი თავის უფალი და არ გახდე ვნებების მონა. 
– დაბოლოს, ნებისმიერი სურვილის ასრულება შესაძლებელია ლოცვით? 
– ჩვენ მთელი სასოება გვაქვს ღმერთზე. ღმერთია სამყაროს შემქმნელი, იგია ჩვენი სიცოცხლის წარმმართველი, იგია მამა ყოველი სულიერისა და უსულოსი და ჩვენ, როგორც შვილები, მამას ვთხოვთ შეწევნასა და დახმარებას. სახარება ბრძანებს, არ შეიძლება შვილები მამას სთხოვდნენ პურს და მან მათ გველი მისცესო. ამიტომ უნდა გვახსოვდეს, რომ ღმერთი გვაძლევს იმას, რაც ჩვენი სულისთვის არის უმჯობესი. თუკი ხანგრძლივი ლოცვის შემდეგ მოწყალე ღმერთი არ გვაძლევს იმას, რასაც ვითხოვთ, დარწმუნებული იყავით, რომ ის ჩვენთვის საზიანო იქნებოდა. ამიტომაც ვამბობთ: "იყოს, უფალო, ნება შენი და არა – ჩვენი". 
მანანა ნოდია 


კატეგორია: სტატიები | დაამატა: mamao (2012-12-18) | ავტორი: მამა გიორგი (სხირტლაძე)
ნანახია: 848 |
გააზიარე ეს სიახლე სადაც გინდა: