"ღამით ბავშვების ოთახში კანდელი აანთეთ" - სტატიები - სიახლეები - www.mama-giorg.moy.su
ЛСЛС
დახურვა
შეტყობინებები: 0
MESSAGE!:შეტყობინება არ არის
შესვლა საიტზე
იტვირთება...
 
მთავარი » სტატიები » სტატიები

"ღამით ბავშვების ოთახში კანდელი აანთეთ"
"ღამით ბავშვების ოთახში კანდელი აანთეთ"

ქრისტიანული სწავლებიდან ვიცით, რომ ბოროტი სულები სხვადასხვა ხერხებით ცდილობენ ადამიანებზე ზეგავლენის მოხდენას. "საჭიროა, გვქონდეს უდიდესი სიფხიზლე, რადგან ჩვენს მტერს, ეშმაკს, არ სძინავს. იგი დიდი ხნის წინ გამოიდევნა სასუფევლიდან, ახლა კი არ სურს ვინმეს ზეცად აღსვლის დაშვება", – გვასწავლის ერთ–ერთი წმინდა მამა. წმინდა იოანე ღვთისმეტყველის ტაძრის დეკანოზი, მამა გიორგი (სხირტლაძე) აღნიშნავს, რომ უხილავი ბრძოლები, თავდასხმები, ზრახვები ზოგჯერ სიზმრის სახითაც გამოვლინდებიან. სულიერი მოძღვარი "სარკის" ამ ნომერში გვესაუბრება ღამეულ შიშებსა და საფრთხეებზე, ასევე იმაზე, როგორ დავიცვათ თავი ენერგოვამპირებისგან. 
– მამა გიორგი,  წმინდა მამები ამბობენ, რომ ბოროტი ძალა განსაკუთრებით აქტიურდება ღამით, როდესაც ადამიანებს სძინავთ. რამდენად შესაძლებელია, დაცემული სულების ზეგავლენა სიზმარში გამოვლინდეს? 
– სიზმარი მართლაც საოცარი რამეა. იგი გამოუკვლეველი, ირაციონალურია ჩვენი გონებისთვის. მორწმუნე უნდა ეცადოს, რომ ღამე მკვდარივით არ დაიძინოს და ძილშიც სულიერი განწყობა ჰქონდეს. ამგვარი მდგომარეობა ჰქონდათ წმინდანებს, სხვათა შორის, ბევრ მორწმუნესაც. ამ დროს ადამიანს სძინავს, მაგრამ ამავე დროს ლოცვით მდგომარეობაშია და ზოგჯერ საკუთარი ლოცვა აღვიძებს. ყოფილა შემთხვევები, დილის 6 საათზე შვიდგზის ლოცვებს ბევრჯერ გამოუღვიძებია ადამიანი და მძიმე სიზმრისგან გადაურჩენია. 
ბოროტი როცა სიზმარში შედის, ზოგჯერ ადამიანს ცნობიერება უმრუდდება. დაცემული სული მას სიზმარში ისეთ ხილვებს უჩვენებს, რომ მისმა შინაგანმა ამბიციურობამ, პრეტენზიებმა ან სექსუალურმა მიდრეკილებებმა გამოიღვიძონ. ზოგჯერ ეს იმიტომ ხდება, რომ ადამიანი ვერ მივიდეს აღსარებაზე, ზიარებაზე. ან, თუ უკვე მიღებული აქვს წმინდა ზიარება, სულიერად დაეცეს, არ შეერგოს და სულისა და ხორცის საკურნებლად კი არ ექცეს, არამედ დასასჯელად და კვლავ ცოდვაში ჩასაგდებად. თუნდაც იმისთვის, რომ ადამიანს მეტი ამპარტავნება დაებადოს და ხიბლში შევიდეს. მაგალითად, გაჩნდეს ფიქრები, რომ თითქოს ის რჩეულია, განსაკუთრებული არსებაა და ა.შ. მით უმეტეს, რომ ადამიანებს ამგვარი ამპარტავნებისა და ცრურჩეულობის დიდი თუ მცირე განცდა ისედაც აქვთ. სიზმრისეული ხილვების გარდა, არსებობს რეალური ფსიქიკური თავდასხმები, უხილავი ბრძოლები, ბოროტი სულების შემოტევები. 
– მაგრამ მორწმუნე ადამიანს ხომ მფარველი ანგელოზი იფარავს ამგვარი ბოროტი შემოტევებისგან? 
– მორწმუნეს მფარველი ანგელოზი ადგას თავზე და ბოროტებისგან იფარავს, მაგრამ ღამით განსაკუთრებით საშიშია ურწმუნო, ულოცველი, სულიერად მოუმზადებელი ადამიანის მდგომარეობა. რადგან იგი არც ნაზიარებია, ჯვარი არც სახლში აქვს, არც გულზე და უკვე ადვილად მისაწვდომი ხდება გონიერი მგლისთვის და განსაკუთრებით ღამე, ძილში. ყოფილა შემთხვევები, როდესაც ადამიანს ძილში რაღაც დაესხა და უკბინა ან დაარტყა, რაღაც გაუჭრა. მერე გაღვიძებისას ის ნაიარევი ამა თუ იმ ფორმით გამოვლენილა. უხილავი ბრძოლები, ზრახვები, თავდასხმები ზღაპრები არ არის, ეს ყველაფერი რეალურად არსებობს. ამიტომ განსაკუთრებით დაცული უნდა იყოს ადამიანი სულიერად. "გარეშე მიცავ, უფალო, ჯვარითა შენითა", – აღნიშნულია ძილის წინა ლოცვებში. ყოველი ჩვენგანი ჯვრით უნდა იყოს დაცული. 
– რა საშუალებებით არის შესაძლებელი ამგვარი შემოტევების აცილება ღამით? 
– ამ დროს ძალიან ძლიერია კანდელი. ღამე, სადაც სძინავთ, იქ კანდელი უნდა ენთოს და ბჟუტავდეს, რომ ოთახი აბსოლუტურ სიბნელეში არ იყოს. განსაკუთრებით, ბავშვებს ებრძვით ასეთი რაღაცეები, მით უფრო, მოუნათლავებს. ბავშვი ნაზია და ამიტომაც ის განსაკუთრებით მისაწვდომია მათთვის. პატარების ოთახშიც უნდა ენთოს კანდელი, ჯვარი ეკიდოს, მკერდზე თუ არ ექნება, საწოლთან აუცილებლად უნდა იყოს ნაკურთხი ჯვარი. საერთოდ, ყოველი ქრისტიანის სახლი უნდა იყოს ნაკურთხი და განსაკუთრებით ის ადგილი, სადაც ბავშვი იმყოფება. 
– საძინებელში კანდელი უნდა ენთოსო, აღნიშნეთ, ე.ი. სინათლე ოთახიდან ბოროტებას განდევნის? 
– მართალია, კანდელს არ აქვს დიდი სინათლე, მაგრამ წყვდიადს ანათებს. ის ცეცხლით განწმენდს იმ ადგილს და დადებით ენერგიებს დაატრიალებს, რის შემდეგაც იქ ბოროტის ბრძოლა უკვე აღარ იქნება. ამას ძალიან დიდი მნიშვნელობა აქვს და განსაკუთრებით ღამე. ამიტომ, როგორც უკვე აღვნიშნე, სასურველია, ღამე კანდელი ენთოს, როგორც ბავშვებთან, ისე მოზრდილებთან და დიდებთან. ზოგს ღამით ეშინია. აბსოლუტურ სიბნელეში რომ წვება, შიში იპყრობს. ერთი ადამიანი იყო, რომელიც ღამე ვერ იძინებდა, ეშინოდა. როდესაც ვწვები, ვგრძნობ, რაღაც მოდის და ჩემს საწოლში წვებაო, ამბობდა. ლამის მის ხმასაც იგებდა და ლოგინში მის სიმძიმესაც გრძნობდა. ზევიდან მაწვება და მახრჩობსო, ყვებოდა. მერე, როგორც იქნა, სხვადასხვა ლოცვებით, ზიარებით, აღსარებით და ა.შ. ეს შიში დაძლია. აკურთხებინა სახლი და უკვე არაფერი აწუხებდა, ჩვეულებრივად იძინებდა. ასეთი უამრავი შემთხვევაა აღწერილი. 
ძალიან მძიმე მდგომარეობაში იმყოფება ურწმუნო ადამიანი, მით უმეტეს, დღეს, როდესაც ბოროტის ძალიან დიდი გავლენები არსებობს საქართველოში, აქ განსაკუთრებული ბრძოლებია და, თუ სხვაგან გარკვეული ძალისხმევაა საჭირო, აქ 10–100–ჯერ მეტი ძალისხმევა გჭირდება. მაგრამ სამაგიეროდ, რადგან ყოვლადწმინდა ღვთისმშობლის ქვეყანა ვართ, მადლიც მეტი არის ჩვენთან. 
– მამაო, არის შემთხვევები, როდესაც გარდაცვლილი ადამიანები სიზმარში გვეჩვენებიან. ეს რას უნდა ნიშნავდეს?
– ასეთი სიზმრები ძალიან ხშირია. ეს ალბათ გარდაცვლილის სულისგან რაღაცის მოთხოვნის ნიშანია. ყველაფერი ბოროტისგან ხომ არ არის? როცა მიცვალებული გვესიზმრება, შესაძლოა მისი სული გარკვეულ ლოცვითმსახურებას, მოხსენიებას, პანაშვიდებს ან მოწყალებას ითხოვს. ამ დროს მფარველი ანგელოზი იღებს გარდაცვლილი ადამიანის სახეს და ანიშნებს ახლობელს, რომ მან, დავუშვათ, ესა თუ ის მოწყალება გაიღოს ან პანაშვიდი გადაახდევინოს მღვდელს, ან ფსალმუნები წაიკითხოს, ან სასაფლაოზე გავიდეს, გაიტანოს რაღაც, სანთელი აანთოს, მოიხსენიოს. 
მიცვალებულის დასიზმრება ზოგიერთს პანიკაში აგდებს, ჰგონია, რომ ისიც მალე გარდაიცვლება. ასეთი შიში საჭირო არ არის. პირიქით, რადგანაც მას დაესიზმრა მიცვალებული, ე.ი. უფრო დიდხანს იცოცხლებს. 
– როგორ უნდა მიხვდეს ადამიანი, სიზმარი ღვთისგანაა თუ ბოროტისგან, ზოგჯერ უფალი ხომ სიზმრისეული ხილვებითა და ჩვენებებით უმჟღავნებს ადამიანს თავის ნებას? 
– სიზმარი ზოგჯერ ძალიან მაცდური რაღაცაა. ამიტომ თუ სიზმარი არ გვეშვება და ჩვენც ინტერესი გვაქვს მის მიმართ, სასურველია, მოძღვართან მივიდეთ და მისი რჩევა გავითვალისწინოთ. ის არ დაიწყებს სიზმრის ახსნას, მაგრამ გეტყვის, უნდა მიაქციო თუ არა ყურადღება. 
– ადამიანი უნდა მოერიდოს თუ არა ისეთ პიროვნებას, რომელთან ყოფნის დროსაც აშკარად გრძნობს, რომ ენერგიისგან იცლება? 
– აუცილებელი არ არის, ადამიანს ეშვები ჰქონდეს და სისხლს წოვდეს, არსებობენ ენერგოვამპირები, რომლებიც მრავლად არიან ჩვენთან. ასეთი ადამიანი შესაძლოა სულიერად საოცრად მომხიბვლელიც იყოს. მას პირმოთნეობისა და თავის შეცოდების ძალიან დიდი უნარი აქვს. შეუძლია ადამიანს თავი შეაცოდოს და შემდეგ გამოსწოვოს ენერგია, მერე კიდევ შეაცოდოს და ასე წოვოს მისი სულიერი ენერგია. ფაქტობრივად ასეთი ადამიანი სხვისი ენერგიით იკვებება და ისიც შესაძლებელია, რომ ეს თავად არ ჰქონდეს გაცნობიერებული, თვითონაც არ იცოდეს, რომ, მაგალითად, ბოროტი თვალი, მზერა აქვს, რომ სხვას ენერგიას ართმევს. შესაძლოა ასეთმა ადამიანმა სხვას მხოლოდ ერთი შეხედვით, შეხებით, დალაპარაკებით მთელი დღის ენერგია წაართვას და ცუდად გახადოს. 
– ამგვარი ადამიანების ზეგავლენისგან როგორ შეიძლება თავდაცვა? 
– ამ დროს ყველაზე ძლიერი საშუალება, პირველ რიგში, ზიარება და აღსარებაა. მფარველი ანგელოზი განსაკუთრებით იფარავს მორწმუნეს და იგი ყველაზე ახლოს ადამიანთან მაშინაა, როდესაც ის ახალი ნაზიარებია. ზოგადად, ახალნაზიარები ადამიანი ხელშეუხებელი და მიუწვდომელია ბოროტი გავლენებისგან და ასევე ენერგოვამპირებისგანაც. 
მანანა ნოდია 


კატეგორია: სტატიები | დაამატა: mamao (2012-12-18) | ავტორი: მამა გიორგი (სხირტლაძე)
ნანახია: 1412 |
გააზიარე ეს სიახლე სადაც გინდა: