იტვირთება...
| მთავარი » სტატიები » სტატიები |
აღიარებს თუ არა ეკლესია უცხოპლანეტელების არსებობას
ადამიანს აინტერესებს, არის თუ არა სიცოცხლე დედამიწის გარდა სხვაგანაც უკიდეგანო სამყაროში. მსოფლიოს განვითარებულ ქვეყნებში მუშაობენ გასაიდუმლოებული კვლევითი ცენტრები, რომლებიც ამოუცნობ მოვლენებს სწავლობენ. დრო და დრო ვრცელდება ხმები, ზოგჯერ მეცნიერულად დასაბუთებულიც, უცხო ცივილიზაციებთან კონტაქტების დამყარების თაობაზე... ეს ინფორმაციები ეწინააღმდეგება ბიბლიურ წარმოდგენებს სამყაროს შესახებ. რა დამოკიდებულება აქვს ეკლესიას უცხოპლანეტელთა არსებობს თეორიის მიმართ, ამის შესახებ წმინდა იოანე ღვთისმეტყველის სახელობის ტაძრის დეკანოზი, მამა გიორგი (სხირტლაძე) გვესაუბრება.
– მამა გიორგი, როგორ უყურებს და აფასებს ეკლესია უცხო ცივილიზაციების და უცხოპლანეტელთა არსებობის თეორიებს? – წმინდა წერილში არაფერი არის იმაზე ნათქვამი, რომ არსებობს კიდევ სადმე ცივილიზაცია, თუმცა ძალიან ბევრი არის იმაზე ნათქვამი, რომ ღმერთმა შექმნა ყოველი არარაისგან და ღმერთმა ყოველივე არაყოფიერიდან ყოფიერში მოიყვანა. ისიც კი არის ნათქვამი, რომ დედამიწა მრგვალია, ციური სხეულები არსებობენ, არსებობს ოთხი სტიქია და ა.შ. წმინდა წერილის წარმოდგენა სამყაროზე ანთროპოცენტრულია, ანუ, ამ გაგებით, ადამიანი დგას ქმნილების ცენტრში. თეოცენტრულიც არის, იქიდან გამომდინარე, რომ სამყაროს ცენტრში ღმერთი დგას. სხვა ცივილიზაციების არსებობის შესახებ არსად არაფერია ნათქვამი, თუმცაღა არსებობს ამ ბოლო დროს უამრავი მონაცემი და მთელი ენციკლოპედიებიც კი არის გამოქვეყნებული თავისი დასურათებით ამა თუ იმ გამოსახულებების. მაგრამ რეალური შეხვედრა–კონტაქტი, მეცნიერული დამადასტურებელი საბუთები რეალურად არ არსებობს. თუმცაღა მკითხავთ თქვენ, განა არ შეიძლება ამხელა სამყაროში და ამხელა მეტაგალაქტიკაში იყოს ალბათობა იმისა, რომ არსებობდეს რაიმე ცივილიზაცია, ადამიანის მსგავსი თუ არა, სხვა რაიმე გონის მატარებელი. ამის ალბათობა იმდენად მცირეა, რომ თითქმის ნულს უდრის. იმდენად უნიკალურია დედამიწის მდგომარეობა მზის მიმართ, ანუ იმდენად უნიკალურია დედამიწის ატმოსფეროს გაზავება ჰაერთან, სითბოსთან და ყველა ოთხ სტიქიასთან, იმდენად უნიკალურია დაშორება მზიდან, რომ ცოტათი უფრო ახლოსაც რომ ვყოფილიყავით მზესთან, დედამიწაზე სიცოცხლე არ იარსებებდა, ცოტათი უფრო შორსაც სიცოცხლე არ იარსებებდა და ცოტათი უფრო ჩქარა რომ ბრუნავდეს დედამიწა, არ ვიარსებებდით. აი, რამდენად უნიკალურია ღვთის მიერ მოცემული ქმნული სამყარო, რომელიც ბიბლიის შესაქმეში გვაქვს მოცემული. მაგრამ, ვიმეორებ, არსებობს პარადოქსული მონაცემები, რომლებიც არათუ უცხო გონის არსებობას, არამედ მათ ფოტოებსა და მათთან კავშირის შედეგად მიღებულ ინფორმაციებსაც კი აქვეყნებენ. მაშინ რას ვიტყვით ამაზე? ვიტყოდი, რომ ამას მეცნიერებაც ძალიან ეჭვის თვალით უდგება. ანუ, თანამედროვე მონაცემებზე დაყრდნობით, სამყაროში არსებობს შავი ხვრელები, რომლებიც ე.წ. უმოკლესი მანძილებია სამყაროს ერთი კუთხიდან მეორე კუთხეში გადასასვლელად. გადაადგილების უსწრაფესი და უმოკლესი საშუალებებია უსასრულო სამყაროში. აინშტაინმა თავისი ცხოვრების დარჩენილი წლები, 1905 წლის შემდეგ, მოახმარა მიკროკოსმოსისა და მიკროსამყაროს კვლევას და ფართობითობის ზოგადი თეორიის შექმნას, რაც სამყაროში ერთიანი ველის თეორიის შექმნას გულისხმობს. მან ვერ გაართვა თავი ბოლომდე ამ ამოცანას და, საბედნიეროდ, იგი საბოლოოდ ღმერთის არსებობამდე მივიდა. შეიძლება ცხოვრებით არ აღიარებდა ღმერთს, მაგრამ კოსმოლოგიური ანალიზის შედეგად უამრავი მეცნიერი, მათ შორის აინშტაინი, მივიდა შემოქმედის არსებობის იდეამდე, ანუ სამყაროში ყველაფერი ღმერთზე მეტყველებს. ამიტომ ძალიან დიდი ეჭვის თვალით უყურებს არა მარტო რელიგია, არამედ მეცნიერებაც სამყაროში სხვა ცივილიზაციის არსებობას. სერაფიმ როუზს, რომელიც არის თანამედროვე ღვთისმეტყველი მართლმადიდებელი, სპეციალური გამოკვლევაც აქვს ახალი რელიგიების შესახებ, რომლებიც სექტებისა და ოკულტური მიმდინარეობის ანალიზს ეხება. ამ მოვლენებს, რომლებიც დაფიქსირებულია პარანორმალური, ანომალიური მოვლენების სახით, მამა სერაფიმე აღიქვამს, როგორც ბოროტი ძალების მანქანებს, ანუ გარკვეული დემონური არსებების კლასიფიკაციას მიაკუთვნებს ამ მწვანე პატარა, ადამიანების მსგავს არსებებს, რომლებიც ხშირად კონტაქტში შედიან ადამიანებთან. იწერება ბესტსელერები, ცდუნებული, ოკულტისტური მიდრეკილებების ხალხი აქვეყნებს სხვადასხვა მაგიურ, ოკულტურ წიგნებს. არიან მედიუმები, რომლებიც შედიან ბოროტ ძალებთან კონტაქტში და იღებენ ინფორმაციას ვითომდა თანამედროვე მეცნიერების გასამდიდრებლად. ვითომ არსებობს ცხოვრება სხვა პლანეტებზე, სხვა გალაქტიკებში და ამ წიგნებით დიდი ფული კეთდება. უკვე იქამდეც კი მიდიან, რომ სპეციალური უფოლოგიური სექტებიც შეიქმნა, რომლებიც არამარტო უცხოპლანეტელების არსებობას აღიარებენ, არამედ თვლიან, რომ დედამიწა უცხოპლანეტელების მიერ ჩამოტანილი ცივილიზაციაა, რომ ჩვენ თვითონ უცხოპლანეტელების ნაშიერები ვართ. შეიქმნა სპეციალური უცხოპლანეტელების დამკვირვებელთა ჯგუფებიც და ამბობენ და "გვაფრთხილებენ", რომ, თუ ადამიანები არ მოეგებიან გონს და ერთმანეთის ხოცვას და ბირთვული იარაღის შექმნა–გამრავლებას არ შეწყვეტენ, ეს ცივილიზაცია თავის თავს ამოწურავს. ტექსტებიც კი არის გამოქვეყნებული გაურკვეველი რადიოსადგურებიდან, საიდანაც ვრცელდებოდა ასეთი მიმართვები. უცებ ირთვებოდა რაღაც რადიოსადგური, რომელიც ვერსად ფიქსირდებოდა და გვაფრთხილებდნენ, რომ ფრთხილად ვყოფილიყავით. ეს არის სუფთა დემონური, მაცდური აზრები, მეცნიერულ ფუთაში შეფუთული, რომ ადამიანებმა უფრო ადვილად მიიღონ. – მამაო, იქნებ ჩვენ არ გვაქვს ინფორმაცია საერთოდ პარალელურ სამყაროში არსებული ცივილიზაციების შესახებ. არის ვარაუდი, რომ ძალიან დიდი ხნის წინ გააქრეს ინფორმაცია, რომელშიც იყო ნახსენები მათი არსებობის შესახებ. – არსებობს ასეთი გარკვეული ჰიპოთეზები, რომლებიც სხვადასხვა ტექნიკური ობიექტების წარმოშობას ვერ ხსნიან. ამაზე ფილმიც კი არის გადაღებული. ვერ ხსნიან ბევრ მოვლენას, დაწყებული პირამიდების აშენებით, დამთავრებული მდელოებზე უზარმაზარი ფიგურებით. თვლიან, რომ ეს აეროდრომები იყო, რომლებზეც სხდებოდნენ უცხოპლანეტელები, რადგანაც ეს აშენებულია არაადამიანური ტექნოლოგიებით, ჩვენთვის მიუღწეველი ტექნიკით. ეს იმდენად ჰიპოთეტურია, რომ ამის დაჯერება ასე შიშვლად არ შეიძლება. ასევე არსებობს გარკვეული აუდიო–ვიდეომასალა, სადაც არის დაფიქსირებული ფოტოები და ადგილები, სადაც მოხდა კატასტროფა ამოუცნობი მფრინავი ობიექტის. გამოქვეყნებულია მასალები ამა თუ იმ ქვეყნის უშიშროების სამსახურების მიერ, დაწყებული ამერიკის შეერთებული შტატებიდან დამთავრებული საბჭოთა კავშირითა და სხვა ქვეყნებით, როგორ იქნა მიჩქმალული მათ სამხედრო ბაზებზე უფოლოგიური ფაქტების არსებობა. ჰიტლერის დროს იყო მცდელობა, გაეკეთებინათ მფრინავი თეფშის მსგავსი ობიექტი, რომელიც გაკეთებულიც იქნა და მისი ფოტოც არსებობს. ჰიპოთეზების დონეზე ძალიან ბევრი რამ შეიძლება ითქვას. რეალური, ხელჩასაჭიდი ფაქტები, რომლებიც უშუალოდ დაგვიდასტურებდა ყოველგვარი მიკიბვმოკიბვისა და მისტიციზმის გარეშე მათ არსებობას, არ არსებობს. აქედან გამომდინარე, მიუხედავად პარადოქსული მასალისა, რაც ჩვენ გვაქვს, მაინც არ და ვერ შეგვიძლია დავუშვათ სხვა ცივილიზაციების არსებობა. აქ ხშირად უფრო მაგიასთან გვაქვს საქმე, ვიდრე რეალურ ფაქტებთან. ანა ნოდია | |
| კატეგორია: სტატიები | დაამატა: mamao (2011-12-19) | ავტორი: მამა გიორგი სხირტლაძე | |
| ნანახია: 1999 | |
შესვლა საიტზე